2 Каднебӧг 34 - Коми Библия 2023

Иуда муын Иосейлӧн ӧксыалӧм

¹ Ӧксыӧ пуксигас Иосейлы вӧлі кӧкъямыс арӧс. Комын ӧти во чӧж сійӧ юраліс Ерусалимын.

² Иосей вӧчис Господь водзын шогманасӧ. Сійӧ ветліс Давид пӧльыслӧн туйӧд, эз кежлыв сэтысь веськыдвылӧ ни шуйгавылӧ.

³ Аслас кӧкъямысӧд ӧксыалан воӧ, кор сійӧ вӧлі дзик на том, сійӧ кутіс корсьны аслас Давид пӧльлысь Енсӧ. А дас кыкӧд веськӧдлан воӧ сійӧ пондіс сӧстӧммӧдны Иуда му да Ерусалим кар. Сійӧ бырӧдіс вись ваян мылькъяс, юрбитан пуяс, идолъясӧс да бӧлбанъясӧс.

⁴ Иосейлӧн тшӧктӧм серти жуглісны Вааллысь висьпуктанінъяс да на весьтын сулалысь тшынӧдчан висьпуктанінъяс. Юрбитан пуяс пӧрӧдісны, идолъясӧс да бӧлбанъясӧс жуглісны торпыригӧдз, а торпыригъяссӧ шыблалісны сійӧ йӧзыслӧн дзебанінъяс вылӧ, кодъяс вайлісны идолъяслы вись.

⁵ Ылӧг енъяслӧн попъяслысь лыяссӧ Иосей сотіс налӧн висьпуктанін вылын, тадзи сійӧ сӧстӧммӧдіс Иуда му да Ерусалим кар.

⁶ Манассей, Ефрем да Симеон чужанкотыръяслӧн каръясын да нагӧгӧрса бырӧдӧм муын, весиг Неффалим муӧдз,

⁷ Иосей жугліс висьпуктанінъяс да пӧрӧдіс юрбитан пуяс. Израиль му пасьтала сійӧ торпыригӧдз жугліс бӧлбанъясӧс, пӧрӧдіс тшынӧдчан висьпуктанінъяс, сэсся бӧр бергӧдчис Ерусалимӧ.

⁸ Аслас дас кӧкъямысӧд ӧксыалан воӧ, мусӧ да Енлысь крамсӧ сӧстӧммӧдӧм бӧрын, Иосей мӧдӧдіс Ацалийлысь Шафан писӧ, Маасей нима карса юралысьӧс да вӧвлӧмторъяс пасъялысь Йоахӧс, Иохазлысь писӧ, медым найӧ дзоньталісны Господь Енлысь крамсӧ.

⁹ Найӧ локтісны Хилки аркирей дінӧ да сетісны сылы Енлӧн крамӧ вайӧм сьӧмсӧ, мый пыранін видзысь левитъяс чукӧртісны Манассейлӧн да Ефремлӧн чужанкотыръяслысь, Израиль войтырлӧн мукӧд чужанкотыръяслысь, став Иуда войтырлысь, Венямин чужанкотырлысь да Ерусалимын олысьяслысь.

¹⁰ Чукӧртӧм сьӧмсӧ сетісны Господьлысь крамсӧ дзоньталӧм вӧсна кывкутысьяслы, а найӧ юклісны сьӧмсӧ уджалысьяслы, кодъяс дзоньталісны-бурмӧдісны Господьлысь крамсӧ,

¹¹ юклісны тшӧтш тшупсьысьяслы да керка лэптысьяслы, медым найӧ ньӧбисны из да кер, дзоньталісны-зумыдмӧдісны иудаса ӧксыясӧн жугӧдӧм-пазӧдӧм керкаяс.

¹² Крам дзоньталысьяс сьӧлӧмсяньныс вӧчисны ассьыныс уджнысӧ. Наӧн веськӧдлыны вӧлі индӧма левитъясӧс – Мерари рӧдысь Яхатӧс да Овадийӧс, Кааф рӧдысь Закарӧс да Мешулламӧс. Левитъяс, кодъяс кужисны ворсны, асланыс ворсан шы улӧ

¹³ видзӧдісны из новлысьяс да мукӧд уджалысьяс бӧрся. Левитъяс пӧвстысь вӧліны тшӧтш гижалысьяс, чина йӧз да дзиръя видзысьяс.

¹⁴ Кор Господьлӧн крамысь босьтісны сэтчӧ вайӧм сьӧмсӧ, Хилки поп аддзис сэтысь Господьлысь Индӧд небӧг, кодӧс вӧлі сетӧма Мӧисей пыр.

¹⁵ Хилки шуис Шафан гижалысьлы: «Господьлӧн крамысь ме аддзи Индӧд небӧг». Хилки сетіс небӧгсӧ Шафанлы.

¹⁶ Шафан нуис небӧгсӧ ӧксылы да шуис: «Тэнад кесйӧгъясыд вӧчӧны ставсӧ, мый тэ тшӧктін.

¹⁷ Найӧ босьтісны Господьлӧн крамӧ чукӧртӧм сьӧмсӧ да сетісны крам дзоньталӧм вӧсна кывкутысьяслы да уджалысьяслы».

¹⁸ Нӧшта Шафан шуис ӧксылы, Хилки поп пӧ сетіс меным небӧг. И Шафан лыддис тайӧ небӧгсӧ ӧксылы.

¹⁹ Кор ӧксы кыліс Индӧд небӧгысь кывъяссӧ, сійӧ косяліс паськӧмсӧ.

²⁰ Хилкилы, Шафанлӧн Ахикам пилы, Микейлӧн Авдон пилы, Шафан гижалысьлы да аслас Асай кесйӧглы ӧксы тшӧктіс:

²¹ «Мунӧй да юалӧй Господьлысь, мый меным, а сідзжӧ Израильын да Иудаын коляс войтырыслы колӧ вӧчны тайӧ небӧгас гижӧмаыс серти. Ӧд Господьлӧн ыджыд скӧрлуныс ыпнитіс миян вылӧ сыысь, мый миян батьяс эз кутчысьны Господьлӧн кывйӧ, эз овны сы серти, мый гижӧма тайӧ небӧгас».

²² Хилки да ӧксылӧн мӧдӧдӧм йӧзыс мунісны Олдана пророк ань дінӧ. Сылӧн верӧсыс вӧлі Шаллум, коді вӧлі вежа паськӧм видзысьӧн. Шаллумлӧн батьыс вӧлі Токхат, Токхатлӧн – Хасрах. Олдана оліс Ерусалим карлӧн мӧд юкӧнас. Локтысьяс висьталісны сылы ӧксылысь корӧмсӧ.

²³ Олдана шуис: «Господь, Израильлӧн Ен, тадзи висьталӧ: ”Тіянӧс мӧдӧдысьлы шуӧй,

²⁴ мый Господь тадзи висьталӧ: Ме ыста ыджыд шог тайӧ карыс да сэні олысьяс вылӧ. Ме олӧмӧ пӧрта став ёрӧмсӧ, мый гижӧма сійӧ небӧгас, кодӧс ті лыддинныд иудаса ӧксылы.

²⁵ Тайӧ войтырыс эновтіс Менӧ, найӧ сотісны висьяс мукӧд енъяслы, ёна дӧзмӧдісны Менӧ асланыс киӧн вӧчӧмторъясӧн. Таысь Менам скӧрлунӧй киссяс тайӧ карыс вылӧ да оз куслы”.

²⁶ Иудаса ӧксылы, коді ыстіс тіянӧс шыасьны Господь дінӧ, висьталӧй, мый Господь, Израильлӧн Ен, сійӧ кывъясыс йылысь, мый тэ кывлін, тадзи висьталӧ:

²⁷ ”Тэ небзьӧдін сьӧлӧмтӧ да раммӧдчин Ме водзын, кор тэ кылін, мый Ме висьтавлі тайӧ карыс да сэні олысьяс йылысь. Тэ раммӧдчин Ме водзын, косялін паськӧмтӧ да бӧрдін Ме водзын, та вӧсна Ме кылі тэнӧ, – висьталӧ Господь. –

²⁸ Ме вуджӧда тэнӧ батьясыд дінӧ. Тэ лӧня кулан, и тэнӧ пуктасны дзебанінӧ. Тэнад синмыд оз аддзыв сійӧ ыджыд шогсӧ, мый Ме ыста тайӧ карыс да сэні олысьяс вылӧ”». Мӧдӧдӧмаяс бӧр локтісны да висьталісны ӧксылы тайӧ кывъяссӧ.

Иосей ӧксылӧн Господьлы кӧсйысьӧм

²⁹ Иосей ӧксы чукӧртіс Иуда муысь да Ерусалим карысь став юрнуӧдысьсӧ.

³⁰ Сэсся ӧксы муніс Господьлӧн крамӧ. Сыкӧд тшӧтш мунісны Иуда войтыр да Ерусалимын олысьяс, попъяс да левитъяс – муніс став войтырыс, пӧрысь и том. Ӧксы гораа лыддис ставнас Йитӧд небӧгсӧ, мый аддзисны Господьлӧн крамысь.

³¹ Сэсся ӧксы сувтіс аслас местаӧ да Господь водзын кӧсйысис видзны йитӧд, мый Господь кӧртавліс Аслас войтыркӧд. Ӧксы кӧсйысис кывзысьны Господьлысь да став сьӧлӧмсяньыс овны Сылӧн индӧд-тшӧктӧмъяс серти, медым видзны небӧгӧ гижӧм йитӧдлысь кывъяссӧ.

³² Ӧксы тшӧктіс ставныслы, кодъяс вӧліны Ерусалимын, тшӧтш Венямин чужанкотырлы, вынсьӧдны йитӧдсӧ. Ерусалимын олысьяс пондісны овны йитӧд серти, мый налӧн батьяслӧн Ен кӧрталіс накӧд.

³³ Израиль войтырлӧн му пасьталаысь Иосей бырӧдіс став зывӧк идолсӧ да Израиль муын олысьяслы тшӧктіс юрбитны Господьлы, асланыс Енлы. Иосейлӧн олан кадӧ найӧ эз кежлыны Господьысь, асланыс батьяслӧн Енмысь.