2 Каднебӧг 32 - Коми Библия 2023

Ассурса ӧксы уськӧдчӧ Иуда му вылӧ

¹ Тайӧ лоӧмторъяс бӧртиыс, кор Езекей петкӧдліс Господьлы ассьыс эсканлунсӧ, Иуда му вылӧ уськӧдчис ассурса Сеннахирим ӧксы. Сійӧ кытшаліс изкаръяс, медым босьтны найӧс.

² Кор Езекей аддзис, мый Сеннахирим кӧсйӧ уськӧдчыны Ерусалим вылӧ,

³ сійӧ аслас юралысьяскӧд да тышкайӧзӧн веськӧдлысьяскӧд шуис тупкыны кар ортсыысь ва петанінъяс.

⁴ Чукӧртчис уна йӧз, и найӧ тупкисны му пытшті визувтысь васӧ да ва петанінъяссӧ. Найӧ шуалісны: «Ассурса ӧксыяс мед оз аддзыны татысь васӧ [да мед оз вынсяммыны]».

⁵ Езекей повтӧг босьтчис уджӧ. Сійӧ выльысь кыпӧдіс жугалӧм карса стен, сувтӧдіс стен вылӧ башняяс, карса стен ортсыладорас кыпӧдіс мӧд стен. Сійӧ зумыдмӧдіс Милло, Давид карлысь юкӧнсӧ. Сійӧ вӧчӧдіс уна сайӧд да шы.

⁶ Езекей индіс тышкайӧзӧн веськӧдлысьясӧс, чукӧртіс найӧс изэрд вылӧ карса стен дорӧ да шуис налы ышӧдана кывъяс:

⁷ «Лоӧй зумыдӧсь да повтӧмӧсь! Энӧ полӧй ассурса ӧксыысь, энӧ тіралӧй сылӧн уна лыда тышкайӧзысь. Сійӧ, коді миянкӧд, ыджыдджык сы дорысь, коді ассурса ӧксыкӧд.

⁸ Сыкӧд – мортлӧн выныс, а миянкӧд – Господь, миян Енным. Сійӧ пыр отсалӧ миянлы да тышкасьӧ миян пыдди». Иудаса Езекей ӧксылӧн кывъясыс ёнмӧдісны тышкайӧзӧс.

⁹ Та бӧрти ассурса Сеннахирим ӧксы мӧдӧдіс Ерусалимӧ ассьыс йӧзсӧ. Ачыс Сеннахирим да сылӧн тышкайӧзыс сэки кытшалісны Лакиш кар. Сійӧ тшӧктіс шуны иудаса Езекей ӧксылы да Ерусалимын олысь Иуда войтырлы:

¹⁰ «Ассурса Сеннахирим ӧксы тадзи шуӧ: ”Мый вылӧ ті понданныд лача кутны, кор колянныд кытшалӧм Ерусалим карӧ.

¹¹ Езекей шуӧ, мый Господь, тіян Енныд, мездас тіянӧс ассурса ӧксылӧн киысь. Но тадзи шуалігӧн сійӧ ылӧдлӧ тіянӧс, и ті куланныд тшыгныдла да горш косьмӧмныдла.

¹² Эз ӧмӧй Езекей бырӧд тіян Енлысь вись ваян мылькъяссӧ да висьпуктанінъяссӧ? Эз ӧмӧй сійӧ тшӧкты Иуда войтырлы да Ерусалимын олысьяслы юрбитны сӧмын ӧти висьпуктанін водзын да сы вылын сотны висьяс?

¹³ Но ті ӧмӧй онӧ тӧдӧй, мый вӧчи ме, и мый вӧчисны менам батьяс мувывса войтыръяскӧд? Мукӧд войтыръяслӧн енъяс ӧмӧй вермисны мездыны налысь мусӧ менам кипод улысь?

¹⁴ Вермис ӧмӧй кутшӧмкӧ ен мездыны ассьыс войтырсӧ менам киысь? Менам батьясӧй ставнысӧ бырӧдісны. Тіян Енныд сідзжӧ оз вермы мездыны тіянӧс менам киысь.

¹⁵ Сідзкӧ, энӧ лэдзӧй Езекейлы ылӧдлыны тіянӧс. Энӧ эскӧй сылы. Оз сюр сэтшӧм войтырыс, кодлӧн енмыс эськӧ вермис мездыны ассьыс войтырсӧ менам киысь да менам батьяслӧн киысь. Тіян Енныд сідзжӧ оз мезды тіянӧс менам киысь”».

¹⁶ Сеннахиримлӧн йӧзыс унатор на шуалісны Господь Енлы паныд да Сылӧн Езекей кесйӧглы паныд.

¹⁷ Аслас гижӧдъясын Сеннахирим омӧльтіс Господьӧс, Израильлысь Енсӧ: «Войтыръяслӧн енъясыс эз мездыны менам киысь ассьыныс войтырсӧ. Тадзи жӧ Езекейлӧн Енмыс оз мезды менам киысь Ассьыс войтырсӧ».

¹⁸ Сеннахиримлӧн йӧзыс еврей кыв вылын гораа горзісны тайӧ кывъяссӧ карса стен вылӧ чукӧртчӧм ерусалимса войтырлы, медым повзьӧдны найӧс да босьтны карсӧ.

¹⁹ Найӧ шуалісны, мый ерусалимсаяслӧн Енмыс сэтшӧм жӧ, кутшӧм мукӧд войтыръяслӧн енъясыс, кодъясӧс вӧчӧма морт киӧн.

²⁰ Езекей ӧксы да Исай пророк, Амослӧн пиыс, кевмысисны да горзӧмӧн корисны отсӧг енэжсяньыс.

²¹ Сэки Господь мӧдӧдіс анделӧс, и сійӧ бырӧдіс ассурса ӧксылысь став вына тышкайӧзсӧ да налысь юралысь-веськӧдлысьяссӧ. Ассурса ӧксы яналӧмӧн бӧр бергӧдчис аслас муӧ. Кор сійӧ пырис аслас енлӧн крамӧ, сэні сылӧн пияныс виисны сійӧс шыпуртӧн.

²² Тадзи Господь мездіс Езекейӧс да Ерусалимын олысьясӧс ассурса Сеннахирим ӧксылӧн киысь да мукӧд вӧрӧгысь. Сійӧ видзис найӧс быд боксянь.

²³ Унаӧн вайисны Ерусалимӧ Господьлы вайӧмторъяс да иудаса Езекей ӧксылы дона козинъяс. Тайӧ кадсяньыс Езекей пондіс нимавны став войтыръяс пӧвстын.

Езекейлӧн висьӧм да асьсӧ вылӧ кыпӧдӧм

²⁴ Сійӧ кадас Езекей чорыда висьмис да вӧлі куланвыйын. Сійӧ кевмысис Господьлы, и Господь кыліс сійӧс да петкӧдліс сылы индысьпас.

²⁵ Но таысь Езекей эз ошкы Господьӧс, а вылӧ кыпӧдіс асьсӧ. Та вӧсна Енмыс скӧрмис сы вылӧ, тшӧтш Иуда да Ерусалим вылӧ.

²⁶ Но Езекей раммӧдчис, Ерусалимын олысьяс тшӧтш раммӧдчисны, и Езекейлӧн олан кадӧ Господьлӧн скӧрлуныс эз су найӧс.

²⁷ Езекей вӧлі зэв озыр, сійӧ ёна нималіс. Сійӧ вӧчис видзанінъяс, медым пуктавны сэтчӧ эзысь, зарни, дона изъяс, чӧскыд ӧвтанторъяс, сайӧдъяс да дона дозмук-кӧлуй.

²⁸ Вӧчис тшӧтш нянь, вина да олив вый видзанінъяс, сідзжӧ ыж-мӧслы лэбувъяс да йӧръяс.

²⁹ Сійӧ лэптіс аслыс каръяс, сылӧн вӧлі лыдтӧм-тшӧттӧм ыж-мӧс, ӧд Енмыс сетіс сылы уна озырлун.

³⁰ Езекей тупкис Гихон ва петанінлысь вылыс визувтанінсӧ да веськӧдіс васӧ визувтны увлань, Давид кар рытывладорӧ. Езекейлӧн артмис быд удж.

³¹ Но кор вавилонса юралысьяс мӧдӧдісны сы дінӧ ассьыс йӧзсӧ, медым тӧдмавны Иуда муын петкӧдлӧм индысьпас йылысь, сэки Енмыс колис сійӧс ӧтнассӧ, медым тӧдмавны сійӧс да аддзыны, мый сылӧн сьӧлӧмас.

³² Езекей ӧксыалӧм дырйи мукӧд лоӧмторъяс йылысь да сылӧн бур уджъясыс йылысь гижӧма Исай пророклӧн, Амос пилӧн, восьтӧмын да пыртӧма иудаса да израильса ӧксыяслӧн небӧгӧ.

³³ Езекей куліс да вуджис батьясыс дінӧ. Сійӧс дзебисны Давидсянь чужысьяслӧн дзебанінӧ, выліинӧ. Сылӧн кулӧм бӧрын став Иуда войтыр да Ерусалимын олысьяс нимӧдісны сійӧс. Езекей бӧрти ӧксыӧ пуксис сылӧн Манассей пиыс.