2 Каднебӧг 31 - Коми Библия 2023

Вежа вайӧмторъяс йылысь Езекейлӧн тшӧктӧм

¹ Гажӧдчӧм бӧрын став Израиль войтырыс разӧдчис иудаса каръясӧ. Найӧ жуглісны юрбитан изъяс, пӧрӧдісны юрбитан пуяс, пазӧдісны вись ваян мылькъяс да висьпуктанінъяс став Иуда му пасьталаысь, тшӧтш Венямин, Ефрем да Манассей чужанкотыръяслӧн муысь. Та бӧрти Израиль войтырысь быдӧн бӧр муніс аслас муӧ да карӧ.

² Езекей ӧксы индіс попъяслӧн да левитъяслӧн быд котырлы вӧчны ассьыс удж: вайны сотан да бурасян висьяс, сьывны-ошкыны да кесъявны Господьлӧн крамӧ пыранін дорын.

³ Ӧксы сетіс аслас овмӧсысь пемӧсъясӧс, медым Господьлӧн Индӧд серти вайны сотан висьяс асывнас и рытнас, шойччан лунӧ, выль тӧлысь чужигӧн да гажӧдчан лунъясӧ.

⁴ Ерусалимын олысьяслы ӧксы тшӧктіс, медым найӧ сетасны попъяслы да левитъяслы олӧм вылӧ колана пай. Тадзи попъяс да левитъяс ассьыныс олӧмсӧ вермисны сины Господьлысь Индӧд збыльмӧдӧмлы.

⁵ Кор тайӧ тшӧктӧмсӧ вӧлі юӧртӧма Израиль войтырлы, найӧ вайисны асланыс медводдза быдтасысь уна нянь, вина, вый, ма да мукӧдторъяс, мый быдмӧ видз-му вылын. Найӧ вайисны тшӧтш асланыс овмӧс-эмбурысь дасӧд юкӧнсӧ.

⁶ Иуда каръясын олысь Израиль да Иуда войтыр вайисны тшӧтш асланыс ыж-мӧскысь дасӧд юкӧнсӧ, нӧшта вайисны Господьлы, асланыс Енлы, мукӧд вежӧдӧм козинъяс. Вайӧмторъяссӧ тэчисны чукӧръясӧ.

⁷ Вайӧмторъяссӧ пондісны чукӧртны коймӧд тӧлысьнас, а помалісны – сизимӧд тӧлысьнас.

⁸ Кор Езекей да юралысьяс локтісны да аддзисны чукӧръяссӧ, найӧ ошкисны Господьӧс да Сылысь Израиль войтырӧс.

⁹ Езекей юаліс попъяслысь да левитъяслысь вайӧмторъясыс йылысь.

¹⁰ Садок рӧдысь Азарий аркирей вочавидзис сылы: «Сійӧ кадсяньыс, кор йӧзыс пондісны вайны Господьлӧн крамӧ козинъяс, ми пӧттӧдз сёям. И унатор кольӧ на, ӧд Господь бурсиис Ассьыс войтырсӧ. Со, тайӧ чукӧръясыс колисны на».

¹¹ Езекей тшӧктіс дасьтыны Господьлӧн крамын вежӧсъяс. Тадзи и вӧчисны.

¹² Сэтчӧ вуджӧдісны козинъяс, дасӧд юкӧнъяс да вежа вайӧмторъяс. Тайӧ уджсӧ вӧчисны ылӧдчытӧг. Став вайӧмторйыс вӧсна кывкутысьнас вӧлі Конаний нима левит, мӧд кывкутысьнас вӧлі сылӧн Шимей вокыс.

¹³ Езекей ӧксылӧн да Енлӧн крамӧн веськӧдлысь Азарийлӧн индӧм серти Конанийлӧн да Шимейлӧн веськӧдлӧм улын вайӧмторъяссӧ видзисны Ехиэл, Азазий, Нахат, Асаил, Еримот, Иозавад, Элиэл, Исмакий, Махат да Бенай.

¹⁴ Коре нима левит, Имнайлӧн пиыс, асыввыв дзиръя видзысь, тӧждысис войтырлӧн ас кӧсйӧм серти Енлы вайӧмторъяс вӧсна, юкліс попъяслы вежасьыс-вежаторъяс да Господьлы вайӧм козинъяс.

¹⁵ Попъяслӧн олан каръясын Коре веськӧдлӧм улын уджалісны-кесъялісны Эден, Минямин, Исус, Шемай, Амарей да Шеканий. Найӧ пӧръясьтӧг юклісны вайӧмторъяссӧ асланыс вокъяслы котыръяс серти – пӧрысьлы и томлы.

¹⁶ Но налы, кодъяс сійӧ кадас кесъялісны Господьлӧн крамын, эз юклыны. Чужанвуж гижӧдын вӧлі лыддьӧдлӧма куим арӧса да ыджыдджык арлыда став айуловсӧ налӧн удж вӧчӧмныс да котырныс серти.

¹⁷ Найӧс вӧлі лыддьӧдлӧма попъяслӧн чужанвуж гижӧдын рӧдныс серти. Кызь арӧса да ыджыдджык арлыда левитъясӧс вӧлі лыддьӧдлӧма налӧн удж вӧчӧмныс да котырныс серти.

¹⁸ Лыддьӧдлӧма вӧлі тшӧтш левитъяслысь гӧтыръяссӧ, ныв-писӧ да весиг ичӧт кагаяссӧ, ӧд левитъяс вӧлі вежӧдӧмаӧсь-сӧстӧммӧдӧмаӧсь асьнысӧ крамын кесъялӧм могысь.

¹⁹ Попъяслы, Ааронсянь чужысьяслы, кодъяс олісны сиктын, асланыс каръяскӧд орччӧн, быд карын вӧлі индӧма йӧзӧс, медым найӧ поп рӧдысь став айуловлы да чужанвуж гижӧдын лыддьӧдлӧм левитъяслы юклісны пай.

²⁰ Тадзи Езекей вӧчис став Иуда му пасьтала. Сійӧ вӧчис аслас Господь Ен водзын бурсӧ, шогманасӧ да веськыдсӧ.

²¹ Мыйӧ сійӧ босьтчыліс Енлӧн крамын кесъялӧм могысь, Индӧд да тшӧктӧмъяс збыльмӧдӧм могысь, ставсӧ вӧчис Енсӧ сьӧлӧмсяньыс корсьӧмӧн. Та вӧсна сылӧн ставыс артмис.