2 Каднебӧг 3 - Коми Библия 2023

Соломон лэптӧ крам

¹ Соломон пондіс лэптыны Господьлы крам Ерусалимын, Мориа керӧс вылын, мый вӧлі индӧма сылӧн Давид батьлы. Давид водзвыв дасьтіс унатор, медым евусса Орнанлӧн гумла вылын сэсся лэптісны крам.

² Соломон пондіс вӧчны крамсӧ аслас нёльӧд ӧксыалан воӧ, мӧд тӧлысьлӧн мӧд лунӧ.

³ Медым лэптыны Енлысь крамсӧ, Соломон пуктіс подув, кодлӧн кузьтаыс важ муртӧс серти вӧлі квайтымын гырддза, а пасьтаыс – кызь гырддза.

⁴ Крамлӧн посводзыс пасьтанас вӧлі ӧткодь крам пасьтаыскӧд – кызь гырддза. Судтанас посводзыс вӧлі сё кызь гырддза. Посводз пытшкӧссӧ Соломон эжис весалӧм зарниӧн.

⁵ Крамлысь ыджыд вежӧссӧ пытшкӧссяньыс Соломон эжис кипарис пуӧн, сэсся вевттис медбур зарниӧн, нӧшта мичмӧдіс пальма да чеп серпасъясӧн.

⁶ Тайӧ вежӧссӧ Соломон мичмӧдіс дона изъясӧн да эжис Парваимысь вайӧм зарниӧн.

⁷ Ыджыд вежӧсысь матичьяс, тагӧсъяс, стенъяс да ӧдзӧсъяс [тшӧтш ӧшинь рамаяс] сійӧ эжис зарниӧн. Стенъяс вылас вундалӧмӧн серпасаліс херувимъясӧс.

⁸ Соломон тшӧктіс вӧчны Вежасьыс-вежаин. Кузьтанас и пасьтанас сійӧ вӧлі ӧткодь крам пасьтаыскӧд – кызь гырддза. Вежасьыс-вежаинсӧ Соломон тшӧктіс эжны медбур зарниӧн, кодлӧн сьӧктаыс вӧлі квайтсё талант.

⁹ Кӧрттувъяссӧ эжисны зарниӧн, зарниыс вӧлі ветымын сикель сьӧкта. Крамлысь вылысса жыръяссӧ тшӧтш эжис зарниӧн.

¹⁰ Соломон тшӧктіс вӧчны кык херувимӧс, эжны найӧс зарниӧн да пуктыны Вежасьыс-вежаинӧ.

¹¹ Ӧти херувимыслӧн бордйыс пасьтанас вӧлі вит гырддза и инмис крамлӧн стен бердас. Мӧд бордйыс пасьтанас вӧлі тшӧтш вит гырддза и йитчис мӧд херувимыслӧн бордйыскӧд. Ставнас бордъяслӧн пасьтаыс ӧти помсянь мӧд помӧдзыс вӧлі кызь гырддза.

¹² Мӧд херувимыслӧн бордъясыс пасьтанас вӧліны тшӧтш вит гырддза, ӧти бордйыс инмис крамлӧн стен бердас, а мӧд бордйыс йитчис мӧд херувимыслӧн бордйыскӧд.

¹³ Тадзи херувимъяслӧн бордъясыс шевкнитчисны кызь гырддза пасьта. Херувимъяс сулалісны кок выланыс, чужӧмнаныс крамлань бергӧдчӧмӧн.

¹⁴ Соломон тшӧктіс кыны гӧрдовлӧз, пемыдгӧрд да югыдгӧрд вурун шӧртъясысь да вӧсни шабді шӧртысь ӧшӧдан дӧра. Дӧра вылас сійӧ тшӧктіс вурны-серпасавны херувимъясӧс.

¹⁵ Крам водзвылас Соломон тшӧктіс вӧчны кык сюръя, судтанас комын вит гырддза. Быд сюръя помын вӧлі вит гырддза судта юр.

¹⁶ Сюръя помъяссӧ крамын моз Соломон тшӧктіс мичмӧдны чепъясӧн. Нӧшта тшӧктіс вӧчны гранат кодь сё сяр да пуктыны найӧс чепъяс вылас.

¹⁷ Тайӧ сюръяяссӧ Соломон сувтӧдіс крам водзӧ, ӧтисӧ – веськыдладорас, мӧдсӧ – шуйгаладорас. Веськыдвыв сюръяыслы сетіс Якин ним, а шуйгаыслы – Воаз ним.