2 Каднебӧг 29 - Коми Библия 2023

Езекей ӧксы выльысь лӧсьӧдӧ крамын кесъялӧм

¹ Ӧксыӧ пуксигас Езекейлы вӧлі кызь вит арӧс. Кызь ӧкмыс во чӧж сійӧ юраліс Ерусалимын. Сылӧн мамыс вӧлі Авия, Закарлӧн нылыс.

² Давид пӧльыс моз Езекей вӧчис Господь водзын шогманасӧ.

³ Аслас медводдза ӧксыалан воӧ, медводдза тӧлысьнас, сійӧ восьтіс Господьлӧн крамлысь ӧдзӧсъяссӧ да дзоньталіс найӧс.

⁴ Попъяслы да левитъяслы сійӧ тшӧктіс чукӧртчыны асыввыв изэрд вылӧ.

⁵ Сэсся шуис налы: «Левитъяс, кывзӧй менӧ! Ӧні вежӧдӧй-сӧстӧммӧдӧй асьнытӧ да вежӧдӧй тіян батьяслӧн Господь Енлысь крамсӧ. Шыбитӧй вежаинысь став пежсӧ.

⁶ Миян батьяс мыж вӧчисны, вӧчисны Господь Енным водзын шогмытӧмсӧ. Найӧ эновтісны Господьӧс, бергӧдчисны Сылӧн оланінлы мышкӧн.

⁷ Найӧ йигналісны крам посводзлысь ӧдзӧсъяссӧ да кусӧдісны бияссӧ. Вежаинын найӧ эз тшынӧдны чӧскыд ӧвтанторъяс, эз вайны сотан висьяс Израильлӧн Енлы.

⁸ Та вӧсна Господь скӧрмис Иуда да Ерусалим вылӧ, вӧчис найӧс мукӧдлы повзьӧданторйӧн, сетіс найӧс сералӧм да янӧдӧм вылӧ, мый ті асьныд аддзанныд.

⁹ Та вӧсна миян батьясным кулісны шыпуртысь, а миянлысь ныв-пинымӧс да гӧтыръяснымӧс нуӧдісны пленӧ, и ӧнӧдз найӧ йӧз муынӧсь.

¹⁰ Но ӧні ме кӧсъя кӧртавны йитӧд Господькӧд, Израильлӧн Енкӧд, медым Сійӧ вештас миян вылысь Ассьыс ыпъялан скӧрлунсӧ.

¹¹ Пиянӧй, энӧ весьшӧрӧ коллялӧй каднытӧ, ӧд Господь бӧрйис тіянӧс, медым ті сулалінныд Сы водзын, кесъялінныд Сылы да сотінныд висьяс».

¹² Сэки сувтісны левитъяс: Кааф рӧдысь Амасайлӧн Махат пиыс да Азарийлӧн Йоиль пиыс, Мерари рӧдысь Авдилӧн Кис пиыс да Егаллеллӧн Азарий пиыс, Гирсон рӧдысь Зиммалӧн Йоах пиыс да Йоахлӧн Эден пиыс,

¹³ Элицафан рӧдысь Шимри да Евэл, Асаф рӧдысь Закар да Маттанай,

¹⁴ Еман рӧдысь Ехиэл да Шимей, Едутун рӧдысь Шемай да Узиэл.

¹⁵ Найӧ чукӧртісны вокъяснысӧ, вежӧдісны-сӧстӧммӧдісны асьнысӧ да ӧксылӧн тшӧктӧм серти мунісны весавны-сӧстӧммӧдны Господьлысь крамсӧ, кыдзи тшӧктіс вӧчны Господь.

¹⁶ Попъяс пырисны Господьлӧн крам пытшкӧ, медым весавны-сӧстӧммӧдны сійӧс. Став пежсӧ, мый аддзисны Господьлӧн крамысь, найӧ петкӧдісны йӧрас. А левитъяс нуисны ставсӧ Кедрон ковтысӧ.

¹⁷ Крам вежӧдӧмсӧ попъяс да левитъяс заводитісны вӧчны медводдза тӧлысьлӧн медводдза лунӧ, и крам посводзӧдзыс найӧ воисны кӧкъямысӧд лунӧ. Крамсӧ вежӧдісны нӧшта кӧкъямыс лун чӧж, и вежӧдӧмсӧ помалісны медводдза тӧлысьлӧн дас квайтӧд лунӧ.

¹⁸ Сэсся попъяс да левитъяс мунісны Езекей ӧксы дінӧ да шуисны: «Ми весалім-сӧстӧммӧдім Господьлысь крамсӧ, сотан висьлы висьпуктанінсӧ, вежа няньлы пызансӧ да став дозмук-кӧлуйсӧ.

¹⁹ Ми дасьтім да вежӧдім тшӧтш сійӧ дозмук-кӧлуйсӧ, мый Ахаз ӧксы петкӧдіс крамысь, кор сійӧ эновтіс Енсӧ. Ӧні ставыс тайӧ Господьлӧн висьпуктанін водзын».

²⁰ Мӧд луннас Езекей ӧксы чеччис водз асывнас, чукӧртіс карса юралысьясӧс да муніс накӧд Господьлӧн крамӧ.

²¹ Мыжысь вись пыдди найӧ вайисны сизим ӧшкӧс, сизим межӧс, сизим ыжӧс да сизим ай кӧзаӧс ӧксы вӧсна, крам вӧсна да став Иуда войтырыс вӧсна. Ӧксы тшӧктіс попъяслы, Ааронсянь чужысьяслы, сотны тайӧ пемӧсъяссӧ Господьлӧн висьпуктанін вылын.

²² Ӧшъясӧс начкӧм бӧрын попъяс чукӧртісны налысь вирсӧ да резісны вирнас висьпуктанінсӧ. Сэсся найӧ начкисны межъясӧс да налӧн вирнас тшӧтш резісны висьпуктанінсӧ. Та бӧрти попъяс начкисны ыжъясӧс да налӧн вирнас резісны висьпуктанінсӧ.

²³ Мыжысь вись пыдди ваян кӧзаясӧс вайӧдісны ӧксы водзӧ да чукӧртчӧм войтыр водзӧ, и найӧ пуктылісны кинысӧ кӧзаяс вылӧ.

²⁴ Попъяс начкисны кӧзаясӧс да налысь вирсӧ мыжысь вись пыдди вайисны висьпуктанін вылын, медым вештыны Израиль войтырлысь мыжсӧ, ӧд ӧксы тшӧктіс вайны сотан вись да мыжысь вись став Израиль войтыр вӧсна.

²⁵ Ӧксы тшӧктіс левитъяслы сулавны Господьлӧн крамын да ворсны кимвалӧн, арфаӧн да гуслиӧн, кыдзи тшӧктылісны вӧчны Давид ӧксы, сылӧн Гад нима пророк да Нафан пророк. Тайӧ тшӧктӧмыс вӧлі Господьсянь Сылӧн пророкъяс пыр.

²⁶ Левитъяс сулалісны Давидлӧн кодь ворсанторъясӧн, а попъяс – трубаясӧн.

²⁷ Езекей тшӧктіс вайны висьпуктанін вылын сотан вись. Кор попъяс пондісны вись вайны, сэки сьылысьяс пондісны сьывны Господьлы труба шы улӧ да израильса Давид ӧксылӧн кодь ворсанторъяс шы улӧ.

²⁸ Кытчӧдз эз помась вись вайӧмыс, став чукӧртчӧм войтырыс юрбитіс, сьылысьяс сьылісны, а ворсысьяс тутсісны трубаясӧ.

²⁹ Вись вайӧм бӧрын ӧксы да сыкӧд локтӧмаяс копыртчисны, медым юрбитны.

³⁰ Езекей ӧксы да юралысьяс тшӧктісны левитъяслы ошкыны Господьӧс Давидлӧн да Асаф пророклӧн кывъясӧн. Левитъяс нимкодьпырысь ошкисны Господьӧс да копыртчӧмӧн юрбитісны Сылы.

³¹ Сэсся Езекей шуис: «Ӧні ті сиинныд асьнытӧ Господьлы. Локтӧй да вайӧй Господьлӧн крамӧ висьяс да аттьӧалӧм могысь вайӧмторъяс». Сэки чукӧртчӧм войтырыс вайис висьяс да вайӧмторъяс. И быдӧн, коді кӧсйис, вайис тшӧтш сотан вись.

³² Чукӧртчӧм войтырыс вайис Господьлы сотан вись пыдди сизимдас ӧшкӧс, сё межӧс да кыксё баляӧс.

³³ Ставнас вежа вись пыдди вайисны квайтсё ӧшкӧс да куим сюрс ыж-кӧзаӧс.

³⁴ Но попъяс вӧліны этшаӧнӧсь, и найӧ эз удитны кульны сотан вись пыдди вайӧм пемӧсъяслысь кучиксӧ. Налӧн левит вокъясыс отсасисны налы, кытчӧдз эз помась тайӧ уджыс да кытчӧдз мукӧд попъяс эз вежӧдны-сӧстӧммӧдны асьнысӧ. Ӧд левитъяс, кодъяс вӧлі вежӧдӧмаӧсь-сӧстӧммӧдӧмаӧсь нин асьнысӧ, попъяс дорысь вӧліны унджыкӧнӧсь.

³⁵ Сотан висьяс кындзи колӧ вӧлі сотны бурасян вись пыдди вайӧм пемӧсъяслысь госсӧ и сотан виськӧд ӧтвыв вайны вина вись. Тадзи вӧлі выльысь лӧсьӧдӧма Господьлӧн крамын кесъялӧмсӧ.

³⁶ Ставыс артмис ӧдйӧ. Езекей да став войтырыс нимкодясисны сыысь, мый Енмыс вӧчис Аслас войтырлы.