2 Каднебӧг 27 - Коми Библия 2023

Иуда муын Иотамлӧн ӧксыалӧм

¹ Ӧксыӧ пуксигас Иотамлы вӧлі кызь вит арӧс. Дас квайт во чӧж сійӧ юраліс Ерусалимын. Сылӧн мамыс вӧлі Еруша, Садоклӧн нылыс.

² Озей батьыс моз Иотам вӧчис Господь водзын шогманасӧ, да нӧшта бурджыка на, ӧд сійӧ эз пыравлы Господьлӧн крамӧ тшынӧдчыны. А войтырыс водзӧ мыж вӧчис.

³ Господьлӧн крам йӧрын Иотам вӧчис Вылыс дзиръя. Офелын, ерусалимса кар юкӧнын, сійӧ зумыдмӧдіс-дзоньталіс карса стенсӧ.

⁴ Иуда керӧсвыв муын сійӧ лэптіс каръяс, вӧрын кыпӧдіс изкаръяс да башняяс.

⁵ Сійӧ тышкасис аммон войтырлӧн ӧксыкӧд да вермис сійӧс. Сійӧ жӧ вонас аммон войтыр вайис сылы вот пыдди сё эзысь талант, дас сюрс мешӧк шобді да дас сюрс мешӧк ид. Та мында жӧ аммон войтыр вайис сылы мӧд вонас и коймӧд вонас.

⁶ Иотам лои вына ӧксыӧн, ӧд сійӧ кывзысьӧмӧн ветліс аслас Господь Енлӧн туйӧд.

⁷ Иотам ӧксыалӧм дырйи мукӧд лоӧмторъяс йылысь, сылӧн тышъяс да уджъяс йылысь гижӧма израильса да иудаса ӧксыяслӧн небӧгӧ.

⁸ Ӧксыӧ пуксигас Иотамлы вӧлі кызь вит арӧс. Дас квайт во чӧж сійӧ юраліс Ерусалимын.

⁹ Иотам куліс да вуджис батьясыс дінӧ. Сійӧс дзебисны Давид карӧ. Иотам бӧрти ӧксыӧ пуксис сылӧн Ахаз пиыс.