2 Каднебӧг 26 - Коми Библия 2023

Иуда муын Озейлӧн ӧксыалӧм

¹ Амасей ӧксы бӧрти Иуда войтыр пуктіс ӧксыӧ Амасейлысь дас квайт арӧса Озей писӧ.

² Амасейлӧн кулӧм да аслас батьяс дінӧ вуджӧм бӧрын Озей бӧр босьтіс Иуда мулы Элат кар да выльысь лэптіс сійӧс.

³ Ӧксыӧ пуксигас Озейлы вӧлі дас квайт арӧс. Ветымын кык во чӧж сійӧ юраліс Ерусалимын. Сылӧн мамыс вӧлі Ерусалимысь Еколия.

⁴ Амасей батьыс моз Озей вӧчис Господь водзын шогманасӧ.

⁵ Озей юрбитіс Енлы, кытчӧдз ловъя вӧлі Закар, коді велӧдіс войтырсӧ Енмысь вежавидзны. Кор Озей корсис Господьӧс, Ен отсӧгӧн сылӧн ставыс артмис.

⁶ Озей петіс филистимсаяслы паныд тышӧ да жугӧдіс-пазӧдіс Геф, Явне да Азот каръяслысь стенъяссӧ. Сэсся сійӧ Азот кар гӧгӧрын да мукӧдлаын Филистим муын лэптіс каръяс.

⁷ Енмыс отсаліс сылы тышкасьны филистимсаяслы паныд, Гур-Ваалын олысь арабъяслы да меунъяслы паныд.

⁸ Аммон войтыр мынтіс Озейлы вот. Озей нималіс весиг Египетын, ӧд сылӧн юралӧмыс вӧлі зумыд.

⁹ Ерусалимын Пельӧс дзиръя дорӧ, Ковтыс дзиръя дорӧ да стен пельӧс дорӧ Озей вӧчис зумыд башняяс.

¹⁰ Овтӧминын сійӧ тшӧтш вӧчис башняяс, изкыртаӧ кераліс уна вайӧртӧд, ӧд керӧсбердса муын да вывтасінын сылӧн вӧлі уна ыж-мӧс. Озей радейтіс му вӧдитӧм, та вӧсна керӧсъяс да ыбъяс вылын сылӧн йӧзыс быдтісны виноград да вӧдитісны му.

¹¹ Озейлӧн вӧліны тышкайӧз, кодъяс петлісны тышӧ котыръясӧн. Налысь лыдсӧ арталісны-гижалісны Евэл нима гижалысь да Маасей нима чина морт. Наӧн веськӧдліс Хананей, коді вӧлі ӧксылӧн киподувса юралысьяс пӧвстысь.

¹² Тышкайӧзӧн веськӧдлісны рӧдкутысьяс, кодъяслӧн лыдыс вӧлі кык сюрс квайтсё морт.

¹³ Налӧн веськӧдлӧм улын вӧліны куимсё сизим сюрс витсё тышкаморт, кодъяс вӧліны вына тышкасьысьяс, ӧксы вӧсна найӧ дасьӧсь вӧліны петны вӧрӧглы паныд.

¹⁴ Став аслас тышкайӧзлы Озей дасьтіс сайӧдъяс, шыяс, юртупкӧдъяс, кӧрт кышӧдъяс, ньӧввужъяс да лыйсян изъяс.

¹⁵ Ерусалимын башняяс вылӧ да карса стен пельӧсъясӧ Озей сувтӧдаліс кужӧмӧн вӧчӧм лыйсянторъяс, медым на отсӧгӧн лыйлыны ньӧвъяс да ыджыд изъяс. Озейлӧн нималӧмыс ылӧдз паськаліс. Кор сылӧн юралӧмыс эз на вӧв зумыд, Енмыс пыр отсавліс сылы.

¹⁶ Но кор Озейлӧн юралӧмыс зумыдмис, сійӧ пондіс ышнясьны, и тайӧ вайӧдіс сійӧс кулӧмӧдз. Сійӧ мыж вӧчис аслас Господь Енлы паныд, ӧд сійӧ пырис Господьлӧн крамӧ, медым тшынӧдчан висьпуктанін вылын тшынӧдчыны.

¹⁷ Сы бӧрся крамӧ пырис Азарий поп, сыкӧд тшӧтш пырисны Господьлӧн попъяс, кӧкъямысдас повтӧм морт.

¹⁸ Найӧ кыпӧдчисны Озей ӧксылы паныд да шуисны сылы: «Озей, тэныд оз позь тшынӧдчыны Господь водзын. Тайӧс вермӧны вӧчны сӧмын попъяс, Ааронсянь чужысьяс, кодъясӧс вежӧдӧма-торйӧдӧма тшынӧдчыны. Пет крамсьыс, ӧд тэ мыж вӧчин, и тайӧ оз вай тэныд Господь Ен водзын нималӧмсӧ».

¹⁹ Озей, кодлӧн киас вӧлі тшынӧдчан дозйыс, ёна скӧрмис. Тайӧ кадас сійӧ сулаліс попъяс водзын Господьлӧн крамын, тшынӧдчан висьпуктанін дорын. Кор сійӧ скӧрмис попъяс вылӧ, сылӧн плешкас мыччысис проказа.

²⁰ Азарий аркирей да попъяс видзӧдлісны Озей вылӧ, и сылӧн плешкысь аддзисны проказа. Найӧ тшӧктісны сылы ӧдйӧджык петны крамысь, но сійӧ и ачыс тэрмасис петны, ӧд Господь мыждіс сійӧс.

²¹ Аслас кулан лунӧдз Озей ӧксы висис проказаӧн да оліс торъя керкаын. Сылы оз позь вӧлі пырны Господьлӧн крамӧ. Ӧксы керкаӧн да Иуда войтырӧн веськӧдліс сылӧн Иотам пиыс.

²² Озей ӧксыалӧм дырйи лоӧмторъяс йылысь водзысяньыс и помӧдзыс гижис Исай пророк, Амослӧн пиыс.

²³ Озей куліс да вуджис батьясыс дінӧ. Сійӧс дзебисны ыб вылӧ батьясыскӧд орччӧн, но дзебисны эз ӧксыяслӧн дзебанінӧ, ӧд сійӧ висис проказаӧн. Озей бӧрти ӧксыӧ пуксис сылӧн Иотам пиыс.