2 Каднебӧг 25 - Коми Библия 2023

Иуда муын Амасейлӧн ӧксыалӧм

¹ Ӧксыӧ пуксигас Амасейлы вӧлі кызь вит арӧс. Кызь ӧкмыс во чӧж сійӧ юраліс Ерусалимын. Сылӧн мамыс вӧлі Ерусалимысь Еходань.

² Амасей вӧчис Господь водзын шогманасӧ, но эз став сьӧлӧмсяньыс.

³ Кор Амасейлӧн юралӧмыс зумыдмис, сійӧ виис ассьыс кесйӧгъяссӧ, кодъяс виисны сылысь батьсӧ, Йоас ӧксыӧс.

⁴ Но налысь челядьсӧ эз ви, а вӧчис Господьлӧн тшӧктӧм серти, кыдзи гижӧма Мӧисей Индӧдын: «Пиыслӧн мыж вӧсна батьсӧ оз ков вины, и батьыслӧн мыж вӧсна писӧ оз ков вины. Быдӧн мед аслас мыж вӧсна кулас».

⁵ Амасей чукӧртіс Иудаын олысь айуловӧс, сэсся Иуда да Венямин чужанкотырысь айуловсӧ юкліс рӧдныс серти да сетіс найӧс сюрс тышкамортӧн да сё тышкамортӧн веськӧдлысьяслӧн кипод улӧ. Кызь арӧса да ыджыдджык арлыда айуловӧс арталӧм бӧрти Амасей тӧдмаліс, мый сылӧн эм куимсё сюрс морт, кодъяс вермӧны тышӧ ветлыны. Налӧн быдӧнлӧн вӧлі шы да сайӧд.

⁶ Нӧшта Израиль войтыр пӧвстысь сё талант эзысь вылӧ сійӧ медаліс сё сюрс вына тышкамортӧс.

⁷ Но сы дінӧ локтіс Енлӧн морт да шуис: «Ӧксыӧй, израильса тышкайӧзӧс эн босьт аскӧдыд, ӧд Господь оз ло Израилькӧд, Ефремсянь чужысьяскӧд.

⁸ Мун да тышкась повтӧг! А мунан кӧ израильсаяскӧд, Енмыс пасьвартас тэнӧ вӧрӧг водзад, ӧд Енмыслӧн эм вын отсавны и уськӧдны».

⁹ Амасей юаліс Енлӧн мортлысь: «А мый лоӧ сё талант эзысьыскӧд, мыйӧн ме мынтыси израильса тышкайӧзлы?» Енлӧн морт вочавидзис: «Господь вермас сетны тэныд ёна унджык на».

¹⁰ Сэки Амасей чукӧртіс Ефрем муысь локтӧм тышкайӧзӧс да тшӧктіс налы бӧр мунны. Найӧ чорыда скӧрмисны Иуда войтыр вылӧ да ёна дӧзмӧмӧн бӧр мунісны.

¹¹ Амасей веніс ассьыс полӧмсӧ да нуӧдіс тышкайӧзсӧ Сола ковтысӧ. Сэні иудаса тышкайӧз виисны дас сюрс сеирса тышкамортӧс,

¹² а дас сюрс мортӧс босьтісны пленӧ. Сэсся вайӧдісны найӧс изкырта вылӧ да тойыштісны сэсянь. Ставныс найӧ пасьмунісны.

¹³ А медалӧм тышкайӧзыс, кодъясӧс Амасей эз босьт аскӧдыс тышӧ, но бӧр ыстіс гортаныс, уськӧдчисны Самария да Бет-Хорон костын сулалысь иудаса каръяс вылӧ. Сэні найӧ виисны куим сюрс мортӧс да мырддисны уна эмбур.

¹⁴ Эдомсаясӧс пасьвартӧм бӧрын гортас локтігӧн Амасей вайис аскӧдыс Сеир керӧсвыв муын олысьяслысь идолъяссӧ. Сійӧ пуктіс найӧс аслыс ен пыдди, юрбитіс налы да сотіс налы висьяс.

¹⁵ Господь ёна скӧрмис Амасей вылӧ да мӧдӧдіс сы дінӧ пророкӧс. Сійӧ шуис Амасейлы: «Мыйла тэ юрбитан мукӧд войтырлӧн енъяслы? Тайӧ енъясыс эз вермыны мездыны ассьыныс войтырсӧ тэнад киысь».

¹⁶ Пророк эз на помав сёрнисӧ, а ӧксы шуис нин сылы: «Тэнӧ ӧмӧй индісны туйдӧдны ӧксыӧс? Дугды сёрнитнытӧ! Он кӧ, тэнӧ виасны». Но сёрни помавтӧдзыс пророк шуис: «Ме тӧда, мый Енмыс шуис бырӧдны тэнӧ сыысь, мый тэ вӧчин. Но менсьым туйдӧдӧмӧс тэ он кывзы».

¹⁷ Аслас туйдӧдысьяскӧд сёрнитӧм бӧрын иудаса Амасей ӧксы мӧдӧдіс израильса Йоас ӧксы дінӧ юӧртысьӧс. Йоас вӧлі Иохазлӧн пи, Иохаз – Ехулӧн. Амасей тшӧктіс висьтавны Йоаслы, мый кӧсйӧ аддзысьлыны сыкӧд.

¹⁸ Израильса Йоас ӧксы ыстіс иудаса Амасей ӧксылы татшӧм воча юӧр: «Ливанса йӧн ыстіс юӧр ливанса сус пулы. Сійӧ корис, сет пӧ менам пи сайӧ ассьыд нывтӧ. Но ливанса звер ветлӧдліс да таляліс йӧнсӧ.

¹⁹ Тэ шуан, мый пасьвартін эдомсаясӧс, и таысь тэ ышнясян да вылӧ кыпӧдчан. Пукав гортад, эн корсь аслыд шогсӧ, сэки тэ да тэкӧд тшӧтш Иуда войтырыд онӧ усьӧй».

²⁰ Но Амасей эз кывзы Йоасӧс, ӧд Енмыс вӧлі шуӧма сетны Иуда войтырӧс Йоаслӧн киӧ сыысь, мый найӧ юрбитісны эдом войтырлӧн енъяслы.

²¹ Израильса Йоас ӧксы петіс тышӧ иудаса Амасей ӧксылы паныд. Найӧ паныдасисны Иуда муын Бет-Шемеш карын.

²² Израильсаяс пасьвартісны иудаса тышкайӧзӧс, и найӧ пышйисны гортаныс.

²³ Бет-Шемешын израильса Йоас ӧксы босьтіс пленӧ иудаса Амасей ӧксыӧс, Ахазий Йоаслысь писӧ да нуӧдіс сійӧс Ерусалимӧ. Сэні Йоас жугӧдіс карса стенсӧ нёльсё гырддза пасьта – Ефрем дзиръясянь Пельӧс дзиръяӧдз.

²⁴ Йоас ӧксы петкӧдіс Енлӧн крамысь став эзысь-зарнисӧ да дозмук-кӧлуйсӧ, мый вӧсна кывкутіс Овед-Эдом. Сійӧ босьтіс ӧксы керкаысь озырлунсӧ, босьтіс аскӧдыс Амасейлӧн тӧдчана йӧз пӧвстысь ӧткымынӧс, медым Амасей эз кыпӧдчы сылы паныд. Сэсся Йоас бӧр муніс Самарияӧ.

²⁵ Израильса Йоас ӧксылӧн, Иохаз пилӧн, кулӧм бӧрын иудаса Амасей ӧксы, Йоаслӧн пиыс, оліс нӧшта на дас вит во.

²⁶ Амасей ӧксыалӧм дырйи лоӧмторъяс йылысь водзысяньыс и помӧдзыс гижӧма иудаса да израильса ӧксыяслӧн небӧгӧ.

²⁷ Сы бӧрти, кор Амасей эновтіс Господьӧс, йӧзыс кыпӧдчисны Амасейлы паныд Ерусалимын, и сійӧ пышйис Лакиш карӧ. Но паныд кыпӧдчысьяс мӧдӧдісны сэтчӧ ассьыныс йӧзсӧ, и сэні найӧ виисны Амасейӧс.

²⁸ Амасейлысь шойсӧ вайисны вӧв вылын Ерусалимӧ да дзебисны сійӧс Давид карӧ батьясыскӧд орччӧн.