2 Каднебӧг 17 - Коми Библия 2023

Иуда муын Иосафатлӧн ӧксыалӧм

¹ Аса бӧрти ӧксыӧ пуксис сылӧн Иосафат пиыс. Сійӧ зумыдмӧдіс ассьыс мусӧ, медым израильсаяс эз вермыны сійӧс.

² Иосафат мӧдӧдіс ассьыс тышкайӧзсӧ иудаса став изкарӧ. Сійӧ сувтӧдіс тышкакотыръясӧс Иуда му пасьтала да Ефрем чужанкотырлӧн каръясӧ, тайӧ каръяссӧ босьтліс сылӧн Аса батьыс.

³ Господь вӧлі Иосафаткӧд, ӧд сійӧ ветліс веськыд туйӧд, кыдзи сылӧн Давид пӧльыс вӧчис аслас медводдза ӧксыалан воясӧ. Иосафат эз юрбит Ваал идолъяслы,

⁴ а корсис аслас батьыслысь Енсӧ да оліс Енлӧн тшӧктӧмъяс серти, а эз израильсаяс моз.

⁵ Господь ёнмӧдіс сылысь юралӧмсӧ. Иуда войтыр вайисны Иосафатлы козинъяс. Иосафатлӧн вӧлі уна озырлун, сійӧ ёна нималіс.

⁶ Став сьӧлӧмсяньыс сійӧ кывзысис Господьлысь. Иуда муысь сійӧ бырӧдіс вись ваян мылькъяс да юрбитан пуяс.

⁷ Аслас коймӧд ӧксыалан воӧ Иосафат мӧдӧдіс ассьыс чина йӧзсӧ – Бен-Хаилӧс, Авдийӧс, Закарӧс, Нафанаилӧс да Микайӧс, медым Иуда каръясын найӧ велӧдісны войтырсӧ.

⁸ Накӧд тшӧтш Иосафат мӧдӧдіс Шемай, Нетаний, Зевадай, Асаил, Шемирамот, Ионафан, Адоний, Товий да Тов-Адоний левитъясӧс, нӧшта Элишам да Иорам попъясӧс.

⁹ Найӧ велӧдісны Иуда войтырӧс. Иуда муысь став карсӧ кытшовтігӧн налӧн аскӧдныс вӧлі Господьлӧн Индӧд небӧг.

¹⁰ Иуда му гӧгӧр олысь войтыръяс пӧвстӧ Господь ыстіс ыджыд полӧм, та вӧсна найӧ эз лысьтны тыш панны Иосафаткӧд.

¹¹ Филистимсаяс вайлісны Иосафатлы козинъяс да вот пыдди эзысь, арабъяс вайлісны сылы сизим сюрс сизимсё межӧс да сизим сюрс сизимсё ай кӧзаӧс.

¹² Иосафатлӧн юралӧмыс ёнджыка на зумыдмис. Иуда муын сійӧ лэптіс изкаръяс, лэптіс нянь да эмбур видзӧм могысь каръяс.

¹³ Иуда каръясын сылӧн вӧлі уна тышкасян кӧлуй, но тышкайӧзыс олісны Ерусалимын.

¹⁴ Тані лыддьӧдлӧма Иосафатлысь тышкайӧзсӧ рӧдныс серти. Иуда чужанкотырысь тышкайӧзӧн веськӧдлісны Аднай, куимсё сюрс тышкамортлӧн юралысь,

¹⁵ Иоханан, кыксё кӧкъямысдас сюрс тышкамортлӧн юралысь,

¹⁶ да Зикрилӧн Амасий пиыс, кыксё сюрс тышкамортлӧн юралысь. Амасий сьӧлӧмсяньыс кесъяліс Господьлы.

¹⁷ Венямин чужанкотырысь тышкайӧзӧн веськӧдлісны Элиад нима вына тышкасьысь, кодлӧн кипод улын вӧлі кыксё сюрс ньӧввужъя да сайӧда тышкаморт,

¹⁸ да Ехозавад, кодлӧн кипод улын вӧлі сё кӧкъямысдас сюрс тышкаморт.

¹⁹ Став тайӧ тышкайӧзыс кесъялісны ӧксылы. Наысь ӧтдор вӧліны тышкайӧз, кодъясӧс ӧксы индіс, медым найӧ кесъялісны иудаса изкаръясын.