2 Каднебӧг 16 - Коми Библия 2023

Аса корӧ отсӧг арамейяслӧн ӧксылысь

¹ Асалӧн комын квайтӧд ӧксыалан воӧ израильса Ваас ӧксы уськӧдчис Иуда му вылӧ да лэптіс Рамаын изкар, медым некод эз вермы пырны Иуда муӧ Аса ӧксы дінӧ либӧ петны сы дінысь.

² Аса босьтіс Господьлӧн крамса да ӧксы керкаса озырлун видзанінъясысь эзысь-зарни да мӧдӧдіс Дамаскӧ арамейяслӧн Бен-Хадад ӧксылы. Тшӧктіс висьтавны сылы:

³ «Тэа-меа костын йитӧдным мед лоӧ миян батьяслӧн кодь. Ме ыста тэныд эзысь-зарни да кора орӧдны израильса Ваас ӧксыкӧд йитӧдтӧ, медым сійӧ ылыстчас менам муысь».

⁴ Бен-Хадад вӧчис Аса ӧксылӧн корӧм серти. Сійӧ мӧдӧдіс аслас тышкайӧзӧн веськӧдлысьясӧс израильса каръяслы паныд тышӧ. Найӧ пасьвартісны Ийон, Дан, Авел-Маим каръяс да Неффалим муысь став карсӧ, кӧні видзисны нянь да эмбур.

⁵ Ваас кор кыліс та йылысь, сійӧ дугдіс лэптыны Рама изкар, эновтіс ассьыс уджсӧ.

⁶ Аса ӧксы вайӧдіс сэтчӧ Иуда войтырӧс. Найӧ петкӧдісны сэтысь став изсӧ да керсӧ, мыйысь Ваас вӧлі лэптӧма изкарсӧ. Тайӧ изсьыс да керсьыс Аса лэптіс Гева да Миспа изкаръяс.

⁷ Сэки иудаса Аса ӧксы дінӧ локтіс Ханани нима пророк да шуис сылы: «Тэ шыасин отсӧгла арамейяслӧн ӧксы дінӧ, а эн аслад Господь Ен дінӧ. Та вӧсна арамса ӧксылӧн тышкайӧзыс оз лоны тэнад кипод улынӧсь.

⁸ Эфиопияса да ливияса тышкайӧзлӧн вӧлі лыдтӧм-тшӧттӧм тарантас да верзьӧма, но Господь сетіс найӧс тэнад киӧ, ӧд тэ лача кутін Господь вылӧ.

⁹ Господьлӧн синмыс аддзӧ ставнас мусӧ. Сійӧ вынсьӧдӧ найӧс, кодъяслӧн сьӧлӧмныс йитчӧма Сыкӧд. Тэ вӧчин мывкыдтӧма, та вӧсна ӧнісянь тэнад муын лоӧны тышъяс».

¹⁰ Аса ёна скӧрмис пророк вылӧ да йӧртіс сійӧс дзескыдінӧ. Войтырысь ӧткымынӧс Аса тшӧтш дзескӧдіс сійӧ кадас.

¹¹ Аса ӧксыалӧм дырйи лоӧмторъяс йылысь водзысяньыс и помӧдзыс гижӧма иудаса да израильса ӧксыяслӧн небӧгӧ.

¹² Комын ӧкмысӧд ӧксыалан воӧ Асалӧн чорыда висьмис кокыс, и висьӧмыс ёна топӧдіс сійӧс. Но висигас сійӧ шыасис эз Господь дінӧ, а бурдӧдысьяс дінӧ.

¹³ Нелямын ӧтиӧд ӧксыалан воас Аса куліс да вуджис батьясыс дінӧ.

¹⁴ Сійӧс дзебисны Давид карӧ дзебанінӧ, мый сійӧ водзвыв вӧлі дасьтӧма аслыс. Куйланіныс вӧлі тырӧма чӧскыд ӧвтанторъясӧн да мавтасъясӧн. Асаӧс казьтывлӧм могысь пестісны ыджыд бипур.