2 Каднебӧг 15 - Коми Библия 2023

Аса кесъялӧ Господьлы

¹ Енлӧн Лолыс лэччис Одедлӧн Азарий пи вылӧ,

² и сійӧ муніс Аса дінӧ да шуис сылы: «Кывзы менӧ, Аса. Кывзӧй менӧ, Иуда да Венямин чужанкотыръяс. Господь лоӧ тіянкӧд, ті кӧ лоанныд Сыкӧд. Ті кӧ кутанныд корсьны Сійӧс, Сійӧ воссяс тіянлы. А эновтанныд кӧ Сійӧс, Сійӧ тшӧтш эновтас тіянӧс.

³ Дыр кад чӧж Израиль войтыр оліс збыль Ентӧг да Индӧдтӧг, налӧн эз вӧвны туйдӧдысь попъяс.

⁴ Но сьӧкыдалігӧн Израиль войтыр бергӧдчис аслас Господь Ен дінӧ, найӧ корсисны Сійӧс, и Енмыс воссис налы.

⁵ Сійӧ кадас ветлысь-мунысьяс полісны, ӧд сэтчӧс муясын олысьяс вӧлі шызьӧмаӧсь.

⁶ Войтыръяс тышкасисны ӧта-мӧдныскӧд, ӧти карын олысьяс тышкасисны мӧд карын олысьяскӧд. Енмыс мӧдӧдліс налы уна сьӧкыдлун, та вӧсна найӧ шызьывлісны.

⁷ Но ті лоӧй зумыдӧсь, энӧ лэдзӧй кинытӧ, ӧд уджъяссьыныд лоӧ тіянлы тырдон».

⁸ Кор Аса кыліс Азарий пророклысь тайӧ кывъяссӧ да пророкалӧмсӧ, сійӧ збоймис да бырӧдіс став зывӧк идолсӧ Иуда да Венямин муясысь, тшӧтш Ефрем керӧсвывса каръясысь, кодъясӧс сійӧ босьтіс тышын. Сійӧ дзоньталіс Господьлысь висьпуктанінсӧ, коді сулаліс Господьлӧн крам посводзлы воча.

⁹ Аса чукӧртіс Иуда да Венямин чужанкотыръяс, тшӧтш на пӧвстӧ Ефрем, Манассей да Симеон чужанкотыръясысь овмӧдчӧм йӧзӧс. Ӧд Израиль войтыр пӧвстысь унаӧн сувтісны Аса дор, кор найӧ аддзисны, мый сыкӧд Господь, сылӧн Енмыс.

¹⁰ Найӧ чукӧртчисны Ерусалимӧ Асалӧн дас витӧд ӧксыалан воӧ коймӧд тӧлысьнас.

¹¹ Сійӧ лунӧ Господьлы вись пыдди найӧ вайисны тышын шедӧдӧмаысь сизимсё ӧшкӧс да сизим сюрс ыжӧс.

¹² Найӧ кӧрталісны Господькӧд, асланыс батьяслӧн Енкӧд йитӧд, кӧсйысисны став сьӧлӧмсянь корсьны Господьӧс

¹³ да вины быдӧнӧс, коді оз кут корсьны Господьӧс, Израильлысь Енсӧ, том морт-ӧ сійӧ либӧ пӧрысь, айлов-ӧ сійӧ либӧ ань.

¹⁴ Гораа нимкодясьӧмӧн найӧ кыв сетісны Господьлы труба да буксан шы улӧ.

¹⁵ Став Иуда войтыр нимкодясис тайӧ кыв сетӧмсьыс, ӧд найӧ сьӧлӧмсяньныс кыв сетісны да корсисны Господьӧс, и Сійӧ воссис налы. Господь быд боксянь сетіс налы лӧнь олӧм.

¹⁶ Аслас Маака пӧчыслы Аса ӧксы эз лэдз водзӧ лоны ӧксы-мамӧн, ӧд сійӧ сувтӧдіс Астарталы сиӧм зывӧк бӧлбанӧс. Аса кераліс тайӧ зывӧк бӧлбансӧ торпыригӧдз да сотіс сійӧс Кедрон ковтысын.

¹⁷ Вись ваян мылькъяссӧ эз бырӧдны Израильысь, но та вылӧ видзӧдтӧг Асалӧн сьӧлӧмыс вӧлі йитчӧма Господькӧд став олӧм чӧжыс.

¹⁸ Сійӧ вайис Енлӧн крамӧ ассьыс да батьыслысь вежӧдӧм эзысь-зарнисӧ да дозмук-кӧлуйсӧ.

¹⁹ Асалӧн комын витӧд ӧксыалан воӧдз Иуда муын эз вӧвны тышъяс.