2 Каднебӧг 14 - Коми Библия 2023

Иуда муын Асалӧн ӧксыалӧм

¹ Авий куліс да вуджис батьясыс дінӧ. Сійӧс дзебисны Давид карӧ. Авий бӧрти ӧксыӧ пуксис сылӧн Аса пиыс. Сылӧн юралігӧн дас во чӧж Иуда муын эз вӧв некутшӧм тыш.

² Аса вӧчис аслас Господь Ен водзын бурсӧ да шогманасӧ.

³ Сійӧ бырӧдіс ылӧг енъяслы вӧчӧм висьпуктанінъяс да вись ваян мылькъяс, жугліс юрбитан изъяс да пӧрӧдіс юрбитан пуяс.

⁴ Сійӧ тшӧктіс Иуда войтырлы корсьны Господьӧс, асланыс батьяслысь Енсӧ, да вӧчны Сылӧн Индӧдыс да тшӧктӧмъясыс серти.

⁵ Иудаса став карысь сійӧ бырӧдіс вись ваян мылькъяс да тшынӧдчан висьпуктанінъяс. Аса ӧксылӧн веськӧдлан кадӧ Иуда муын овсис лӧня.

⁶ Сійӧ воясӧ, кор Господь сетіс шойччӧг Иуда мулы, и сэні эз вӧвны тышъяс, Аса лэптіс изкаръяс.

⁷ Сійӧ шуис Иуда войтырлы: «Тайӧ каръяс гӧгӧрыс сувтӧдамӧй стенъяс да башняяс, вӧчамӧй дзиръяяс да тасъяс. Муыс миян на, ӧд ми корсим Господьӧс, ассьыным Енмӧс. Ми корсим Сійӧс, и быд боксянь Сійӧ сетіс миянлы лӧнь олӧм». Иуда войтыр лэптісны каръяс, и налӧн ставыс артмис.

⁸ Асалӧн вӧлі Иуда чужанкотырысь куимсё сюрс тышкаморт, кодъяслӧн вӧліны сайӧдъяс да шыяс. Нӧшта сылӧн вӧлі Венямин чужанкотырысь кыксё кӧкъямысдас сюрс тышкаморт, кодъяслӧн вӧліны сайӧдъяс да ньӧввужъяс. Ставныс найӧ вӧліны вына тышкасьысьяс.

⁹ Налы паныд тышӧ петіс Эфиопияысь Зерах. Сылӧн вӧлі миллион тышкаморт да куимсё тарантас. Кор сійӧ матыстчис Мареша кар дорӧ,

¹⁰ сылы паныд тышӧ петіс Аса. Асалӧн тышкайӧзыс дасьтысисны тыш кежлӧ Цефата ковтысын, Мареша кар дорын.

¹¹ Аса шыасис аслас Господь Ен дінӧ: «Господьӧй, Тэ верман отсавны жеблы и выналы. Господьӧй, миян Енмӧй, отсав миянлы! Ӧд Тэ вылӧ ми лача кутам, Тэнад нимӧн ми петім тайӧ лыдтӧм-тшӧттӧм йӧзыслы паныд. Господьӧй, Тэ – миян Ен. Эн лэдз мортлы вермыны Тэнӧ».

¹² Аса да иудаса тышкайӧз водзын Господь пасьвартіс эфиопияса тышкайӧзӧс, и найӧ пышйисны.

¹³ Аслас тышкайӧзкӧд Аса вӧтчис на бӧрся Герар карӧдз. Эфиопияысь локтӧм йӧзыс кулісны, эз коль на пӧвстысь весиг ловъя морт, ӧд Господь Аслас тышкайӧзкӧд пасьвартіс найӧс. Иудаса тышкайӧзлы вичмис тышын зэв уна шедӧдӧмтор.

¹⁴ Найӧ пасьвартісны Герар гӧгӧрысь став карсӧ, ӧд сэні олысьяс пӧвстӧ Господь ыстіс ыджыд полӧм. Иудаса тышкайӧз куштісны став тайӧ каръяссӧ да нуисны сэтысь зэв уна эмбур.

¹⁵ Нӧшта найӧ пазӧдісны ыж-мӧс видзысьяслысь чомъяссӧ да нуӧдісны аскӧдныс верблюдъясӧс да уна ыж, сэсся бӧр бергӧдчисны Ерусалимӧ.