2 Каднебӧг 13 - Коми Библия 2023

Иуда муын Авийлӧн ӧксыалӧм

¹ Израильса Еровам ӧксылӧн дас кӧкъямысӧд веськӧдлан воӧ Иуда муын ӧксыӧ пуксис Авий.

² Куим во чӧж сійӧ юраліс Ерусалимын. Авийлӧн мамыс вӧлі Микая, Гиваысь Уриэллӧн нылыс. Авий да Еровам костын муніс тыш.

³ Тышсӧ паніс Авий. Сылӧн вӧлі нёльсё сюрс медбур тышкаморт. Еровам петіс сылы паныд кӧкъямыссё сюрс медбур тышкаморткӧд.

⁴ Ефрем керӧсвыв муын Авий кайис Цемараим керӧс йылӧ да шыасис сэсянь: «Кывзӧй менӧ, Еровам да став Израиль войтыр!

⁵ Ті ӧд тӧданныд, мый Господь, Израильлӧн Ен, пыр кежлӧ сетіс Израильын ӧксыалӧмсӧ Давидлы да сысянь чужысьяслы да пыр кежлӧ кӧрталіс накӧд вежсьывлытӧм йитӧд.

⁶ Но Неватлӧн Еровам пиыс, коді кесъяліс Давидлӧн Соломон пилы, кыпӧдчис аслас ыджыдлы паныд.

⁷ Еровам дінӧ чукӧртчисны мывкыдтӧм да шогмытӧм йӧз да кыпӧдчисны Соломонлӧн Ровоам пилы паныд. Ровоам вӧлі том на, сійӧ унатор эз куж да эз вермы водзсасьны налы паныд.

⁸ Ӧні ті мӧвпыштінныд паныд кыпӧдчыны Господьлӧн ӧксыалӧмлы, мый сетӧма Давидсянь чужысьяслы. Ті уна лыдаӧсь, тіян эмӧсь зарни ӧшъяс, кодъясӧс Еровам вӧчис тіянлы ен пыдди.

⁹ Господьлысь попъясӧс – Ааронсянь чужысьясӧс – да левитъясӧс ті вӧтлінныд. Мукӧд войтыръяс моз ті асьныд пуктінныд аслыныд попъясӧс. Быдӧн, коді локтӧ асьсӧ вежӧдӧм могысь да вайӧдӧ ӧшкӧс да сизим межӧс, сійӧ и лоӧ ылӧг енъяслӧн попӧн.

¹⁰ Но миян Енным – Господь, ми эгӧ эновтлӧй Сійӧс. Господьлы кесъялӧны Ааронсянь чужысь попъяс, и левитъяс тшӧтш вӧчӧны ассьыныс уджнысӧ.

¹¹ Быд асыв да рыт найӧ вайӧны Господьлы сотан висьяс да тшынӧдӧны чӧскыд ӧвтанторъяс. Найӧ пуктӧны вежа нянь сӧстӧм пызан вылӧ да быд рыт ӧзтӧны зарни бикок вылын сулалысь би дозъяс. Ми ставсӧ вӧчам асланым Господь Енлӧн индӧд серти, а ті эновтінныд Сійӧс.

¹² Енмыс миянкӧд, Сійӧ – миян юралысьным. Кор Сылӧн попъясыс кутасны тутсыны трубаясӧ, ми петам тышӧ тіянлы паныд. А ті, Израиль войтыр, энӧ тышкасьӧй Господькӧд, тіян батьяслӧн Енкӧд, ӧд тіян оз ло вермӧмыс».

¹³ Аслас тышкайӧз пӧвстысь Еровам мӧдӧдіс кыйӧдчысьясӧс сэтшӧм местаӧ, кысянь позьӧ мышсяньыс уськӧдчыны иудаса тышкайӧз вылӧ, а ачыс мукӧд тышкайӧзыскӧд сувтіс иудаса тышкайӧзлы воча.

¹⁴ Иудаса тышкайӧз бергӧдчисны да аддзисны, мый на вылӧ уськӧдчӧны водзысяньыс и бӧрсяньыс. Сэки найӧ шыасисны Господь дінӧ, а попъяс кутісны тутсыны трубаясӧ.

¹⁵ Иудаса тышкайӧз гораа горӧдісны. Налӧн горӧдӧм дырйи Енмыс пасьвартіс Еровамӧс да израильса тышкайӧзӧс Авий ӧксылӧн да Иуда войтырлӧн син водзын.

¹⁶ Израильса тышкайӧз пышйисны иудаса тышкайӧзысь, но Енмыс сетіс найӧс иудаса тышкайӧзлӧн киӧ.

¹⁷ Авий аслас тышкайӧзкӧд вермис-пасьвартіс израильсаясӧс. Вӧлі виӧма витсё сюрс медбур израильса тышкамортӧс.

¹⁸ Тадзи вӧлі раммӧдӧма Израиль войтырӧс. А Иуда войтыр вӧлі вына, ӧд найӧ лача кутісны батьясныслӧн Господь Ен вылӧ.

¹⁹ Авий вӧтчис Еровам бӧрся да босьтіс сылысь Вефиль, Ешана да Ефрон каръяс да нагӧгӧрса сиктъяс.

²⁰ Авий веськӧдлан кадӧ Еровам эз нин вермы бӧр бергӧдны аслыс нималӧмсӧ. Господь пасьвартіс Еровамӧс, и сійӧ куліс.

²¹ А Авийлӧн юралӧмыс зумыдмис. Сылӧн вӧлі дас нёль гӧтыр, кызь кык пи да дас квайт ныв.

²² Авийлысь олӧмсӧ, сылысь уджъяссӧ да кывъяссӧ гижӧма Иддо пророклӧн гижӧдын.