2 Каднебӧг 12 - Коми Библия 2023

Египетса ӧксы уськӧдчӧ Ерусалим вылӧ

¹ Кор Ровоамлӧн юралӧмыс зумыдмис, и сійӧ лои вына юралысьӧн, сэки сійӧ да став Израиль войтырыс эновтісны Господьлысь Индӧдсӧ.

² Найӧ эновтісны Господьӧс, та вӧсна Ровоам ӧксылӧн витӧд веськӧдлан воӧ египетса Шишак ӧксы аслас тышкайӧзкӧд уськӧдчис Ерусалим кар вылӧ.

³ Египетысь Шишаккӧд локтісны квайтымын сюрс верзьӧма да лыдтӧм-тшӧттӧм тышкайӧз Ливияысь, Эфиопияысь да сукки войтырысь. Тышкайӧзлӧн вӧлі сюрс кыксё тарантас.

⁴ Найӧ босьтісны иудаса изкаръяс, сэсся матыстчисны Ерусалимлань.

⁵ Шемай пророк локтіс Ровоам дінӧ да иудаса юралысьяс дінӧ, кодъяс Шишакысь пышйигӧн чукӧртчисны Ерусалимӧ. Шемай шуис налы: «Господь тадзи висьталӧ: ”Ті эновтінныд Менӧ, та вӧсна Ме тшӧтш эновта тіянӧс да сета тіянӧс Шишаклӧн киӧ”».

⁶ Сэки иудаса юралысьяс да ӧксы раммӧдчисны да шуисны: «Господь веськыда вӧчӧ!»

⁷ Кор Господь аддзис налысь раммӧдчӧмсӧ, Шемайлы вӧлі Господьсянь кыв: «Найӧ раммӧдчисны, та вӧсна Ме ог бырӧд найӧс, регыд мезда найӧс. Шишак ки отсӧгӧн Менам скӧрлунӧй оз бырӧд Ерусалим кар.

⁸ Но найӧ лоӧны сылӧн кесйӧгъясӧн, медым тӧдісны, мыйӧн торъялӧ Меным кесъялӧмыс мувывса ӧксыяслы кесъялӧмысь».

⁹ Египетса Шишак ӧксы пырис Ерусалимӧ да босьтіс Господьлӧн крамысь да ӧксылӧн керкаысь став озырлунсӧ, босьтіс тшӧтш Соломонӧн вӧчӧдӧм зарни сайӧдъяссӧ.

¹⁰ На пыдди Ровоам ӧксы вӧчӧдіс ыргӧн сайӧдъяс да сетіс найӧс веськӧдлысьяслы, кодъяс видзӧдісны ӧксы керкаӧ пыранін видзысьяс бӧрся.

¹¹ Кор ӧксы вӧлі мунӧ Господьлӧн крамӧ, ӧксыӧс видзысьяс босьтлісны аскӧдныс тайӧ сайӧдъяссӧ, а бӧрыннас бӧр пуктывлісны найӧс видзанінӧ.

¹² Ровоам раммӧдчис, та вӧсна Господьлӧн скӧрлуныс вешйис сы вылысь, эз дзикӧдз бырӧд сійӧс. Ӧд Иуда муын мыйкӧ бурыс вӧлі на.

¹³ Ровоам ӧксылӧн юралӧмыс зумыдмис Ерусалим карын. Ӧксыӧ пуксигас Ровоамлы вӧлі нелямын ӧти арӧс. Дас сизим во чӧж сійӧ юраліс Ерусалим карын. Израильса чужанкотыръяслӧн каръясысь Господь бӧрйис тайӧ карсӧ, медым сэні вӧлі Сылӧн нимыс. Ровоамлӧн мамыс вӧлі аммон войтырысь Наама.

¹⁴ Ровоам вӧчис лёксӧ, ӧд сійӧ эз сьӧлӧмсяньыс корсь Господьӧс.

¹⁵ Ровоам ӧксыалӧм дырйи лоӧмторъяс йылысь водзысяньыс и помӧдзыс гижӧма Шемай пророклӧн гижӧдъясӧ да Иддо нима тӧдысь-аддзысьлӧн чужанвуж небӧгӧ. Ровоам да Еровам костын пыр муніс тыш.

¹⁶ Сэсся Ровоам куліс да вуджис батьясыс дінӧ. Сійӧс дзебисны Давид карӧ. Ровоам бӧрти ӧксыӧ пуксис сылӧн Авий пиыс.