2 Фессалоникаӧ 3 - Коми Библия 2023

Павел корӧ кевмысьны

¹ Вокъяс, медбӧрти корам тіянӧс: кевмысьӧй миян вӧсна, мед Господьлӧн кывйыс ӧдйӧ паськалас, медым йӧзыс тіян моз сибӧдасны сійӧс пыдди пуктӧмӧн.

² Нӧшта кевмысьӧй, мед Ен видзас миянӧс шогмытӧм да лёк йӧзысь, ӧд оз быдӧн эскы.

³ Но Господь эскана, Сійӧ ёнмӧдас тіянӧс да видзас омӧльысь.

⁴ Господь эскӧдӧ миянӧс, мый ті вӧчанныд нин миян тшӧктӧм серти да водзӧ тадзи кутанныд вӧчны.

⁵ Ачыс Господь мед веськӧдас тіянлысь сьӧлӧмнытӧ Енлӧн муслунас да Кристослӧн зумыдлунас.

Павеллӧн корӧм-тшӧктӧмъяс

⁶ Вокъяс, миян Господь Исус Кристос нимӧн тшӧктам тіянлы: ылыстчӧй эскысь вокысь, коді весь олӧ да оз ов миян велӧдӧм серти.

⁷ Ті ӧд асьныд тӧданныд, мый тіянлы колӧ овны миян моз. Тіян дінын ми весь эгӧ олӧй,

⁸ некодлысь дась нянь эгӧ сёйӧй. Лун и вой пӧсь петтӧдз уджалім, ӧд некодӧс тіян пӧвстысь эгӧ кӧсйӧй сьӧктӧднысӧ.

⁹ Дерт, ми вермим весь овны, но тадзи эгӧ вӧчӧй. Ми кӧсйим, мед ті видзӧдінныд миян вылӧ да олінныд миян моз.

¹⁰ Ӧд тіянӧ волігӧн ми шулім нин: «Коді оз кӧсйы уджавны, сійӧ мед оз сёй».

¹¹ Миянлы кывсис, тіян пӧвстысь пӧ ӧткымынӧн весьшӧрӧ кадсӧ коллялӧны. Найӧ оз уджавны да нырсӧ быдлаӧ сюйӧны.

¹² Татшӧм йӧзсӧ миян Господь Исус Кристос нимӧн корам да ышӧдам: уджалӧй рам сьӧлӧмӧн да ас ки помысь шедӧдӧй аслыныд кынӧмпӧттӧ.

¹³ Вокъяс, бурсӧ вӧчигӧн энӧ лигышмунӧй.

¹⁴ Коді оз вӧч тайӧ гижӧдас висьталӧм серти, сійӧс кутӧй тӧд выланыд. Татшӧм мортыскӧд энӧ кутӧй некутшӧм йитӧд. Тадзи ті янӧданныд сійӧс.

¹⁵ Сӧмын энӧ лыддьӧй сійӧс тіянлы паныд сувтысьӧн, а туйдӧдӧй сійӧс вокӧс моз.

Павеллӧн чолӧмалӧм

¹⁶ Ачыс Господь, лӧньлунсӧ Сетысь, мед быд кадӧ да быдторйын сетас тіянлы лӧньлунсӧ. Господь мед лоас ставныдкӧд тіянкӧд!

¹⁷ Ме, Павел, аслам киӧн гижа тіянлы чолӧмӧс. Тайӧ лоӧ пасӧн, мый гижӧдыс месянь. Быд гижӧдын ме гижа тадзи:

¹⁸ миян Господь Исус Кристослӧн буралӧмыс ставныдкӧд тіянкӧд. Аминь.