1 Тимофейлы 5 - Коми Библия 2023

¹ Пӧрысьясӧс чорыда эн ӧлӧд, туйдӧд найӧс батьтӧ моз, томджыкъясӧс – воктӧ моз.

² Олӧма аньясӧс туйдӧд мамтӧ моз, томджыкъясӧс велӧд сӧстӧм сьӧлӧмӧн чойтӧ моз.

Дӧваяс йылысь

³ Тӧждысь ӧткӧн олысь дӧваяс вӧсна.

⁴ Эм кӧ дӧвалӧн ныв-пи либӧ ныв-пиыслӧн ныв-пи, найӧ мед вежавидзӧмӧн тӧждысясны гортсаыс вӧсна да бурӧн мынтысясны бать-мамыслы да пӧль-пӧчыслы. Тайӧ шогмӧ Енмыслы.

⁵ Ӧткӧн кольӧм дӧва лача кутӧ Ен вылӧ да лун и вой кевмысьӧ Енмыслы,

⁶ а лышкыда олысь дӧва – ловъявывсьыс кулӧма.

⁷ Туйдӧд тадзи дӧваясӧс, медым найӧ олісны сӧстӧма.

⁸ Коді оз тӧждысь матыссаыс вӧсна, торйӧн нин гортсаыс вӧсна, сійӧ эновтӧма эскӧмсӧ да эскытӧм дорысь лёкджык на.

⁹ Дӧва лыдӧ позьӧ пыртны квайтымын арӧсаӧс да сыысь ыджыдджык арлыда аньӧс, вӧлӧма кӧ сійӧ ӧтчыдысь верӧс сайын,

¹⁰ да тӧдӧны кӧ сійӧс бур уджъясыс серти: сійӧ бур ногӧн быдтӧма-велӧдӧма ныв-писӧ, сибӧдӧма ветлысь-мунысьӧс, мыськалӧма вежа войтырлысь кокнысӧ, отсалӧма сьӧкыдалысьяслы да вӧчӧма быд бурсӧ.

¹¹ Томджыкъясӧс дӧваяс лыдӧ эн пырт. Кор найӧ сетчӧны ыштӧмас, сэки ылыстчӧны Кристосысь да тэрмасьӧны петны верӧс сайӧ.

¹² Найӧ мыжмӧны, ӧд ӧтдортчӧны эскӧмысь.

¹³ Керкаысь керкаӧ ветлігӧн найӧ весьшӧрӧ каднысӧ коллялӧны, суклясьӧны, быдлаӧ нырнысӧ сюйӧны да ковтӧм сёрни паськӧдӧны.

¹⁴ Та вӧсна кӧсъя, медым том дӧваяс верӧс сайӧ петісны, кага чужтісны да гортныс вӧсна тӧждысисны. Сэки найӧ оз сетны помкасӧ паныд сувтысьяслы омӧльтны эскысьясӧс.

¹⁵ Кодсюрӧ ӧд кежисны веськыд туй вывсьыс да мунӧны сӧтана бӧрся.

¹⁶ Эскысьлӧн кӧ матыссаяс пӧвстас эм дӧва, сылы колӧ тӧждысьны тайӧ дӧваыс вӧсна, оз ков вичкосӧ сьӧктӧдны. Сэки вичкоыс вермас тӧждысьны ӧткӧн кольӧм дӧваяс вӧсна.

Вичкоса юрнуӧдысьяс

¹⁷ Вичкоса юрнуӧдысьясӧс, кодъяс бура уджалӧны, колӧ вылӧ донъявны, торйӧн нин Ен кыв висьталысьясӧс да велӧдысьясӧс. Колӧ бура мынтысьны налы.

¹⁸ Ӧд Гижӧдыс висьталӧ: «Вартысь ӧшкӧс сёйӧмысь эн кут» и «Уджалысьлы мынтысьӧны уджыс серти».

¹⁹ Вичкоса юрнуӧдысьӧс кӧ мыждӧны мыйыськӧ, тайӧ мыждӧмсӧ эн кывзы, оз кӧ сійӧс вынсьӧдны кык либӧ куим аддзылысь.

²⁰ Мыж вӧчысьӧс янӧд ставныс водзын, медым мукӧдыс тшӧтш полісны.

²¹ Ен водзын, Господь Исус Кристос водзын да бӧрйӧм анделъяс водзын кора тэнӧ: кутчысь тайӧ туйдӧдӧмас. Нинӧм эн вӧч ассяньыд, чужӧм вылӧ видзӧдӧмӧн.

²² Эн тэрмась ки пуктывны кодкӧ вылӧ, медым эн мыжмы сылӧн мыж вӧчӧм вӧсна. Видз асьтӧ сӧстӧма.

²³ Гырк пытшкӧс висьӧмыд да тшӧкыда нёрпалӧмыд вӧсна ваысь ӧтдор юышт тшӧтш винатор.

²⁴ Ӧтияслӧн мыжыс тыдалӧ, и найӧс мыждӧны нин. Мӧдъяслӧн мыжыс воссяс бӧрыннас.

²⁵ Бур уджъясыд тшӧтш тыдалӧны, а оз на кӧ, бӧрыннас воссясны.