1 Тимофейлы 4 - Коми Библия 2023

Ылӧгвелӧдысьяс

¹ Лов веськыда висьталӧ, мый бӧръя кадас кодсюрӧ кежасны эскӧмысь. Найӧ пондасны кывзыны ылӧдчысь ловъясӧс да кутчысясны пеж ловъяслӧн велӧдӧмӧ.

² Татшӧм велӧдӧмыс петӧ пӧръясьысьяссянь, кык бана шаньгаяссянь, кодъяс воштӧмаӧсь яндзимнысӧ.

³ Найӧ оз лэдзны гӧтрасьны да сёйны сійӧ, мый Енмыс вӧчис. Но Енмыс вӧчис сёянсӧ, медым эскысьяс, збыльсӧ тӧдысьяс, сёйисны сійӧс Енсӧ аттьӧалӧмӧн.

⁴ Енмыслӧн став вӧчӧмторйыс бур. Сёян кӧ аттьӧалӧмӧн, сэки нинӧмысь повнысӧ.

⁵ Кевмысьӧмыд да Енлӧн кывйыс вежӧдӧны сёянтӧ.

Павел туйдӧдӧ Тимофейӧс

⁶ Туйдӧд тадзи вокъястӧ, сэки тэ лоан Исус Кристослӧн бур кесъялысьӧн. Тадзи тшӧтш асьтӧ пӧткӧдан эскӧмлӧн кывъясӧн да бур велӧдӧмӧн, мый серти олан.

⁷ Ылӧг да ковтӧм мойдъясысь ылыстчы, велӧдчы овны вежавидзӧмӧн.

⁸ Вир-яйтӧ ёнмӧдӧмысь бурыс этша, а вежавидзана олӧмысь – уна, ӧд сійӧ сетӧ лача ӧнія да локтана олӧм вылӧ.

⁹ Тайӧ висьталӧмыс эскана, сійӧс шогмӧ сибӧдны сьӧлӧмад.

¹⁰ Ми ёна мырсям да нуам лёкӧдӧмсӧ, ӧд лачанымӧс кутам ловъя Ен вылӧ. Сійӧ – быдӧнлы Мездысь, торйӧн нин эскысьяслы.

¹¹ Туйдӧд-велӧд татчӧ.

¹² Некод мед оз увтырт тэнӧ томлун вӧснаыд. Тэнад сёрниыд, оласногыд, муслуныд, сьӧлӧмыд, эскӧмыд да сӧстӧмлуныд мед лоӧ шогмана, мед эскысьяс вермисны овны тэ моз.

¹³ Менам локтӧдз лыддьы Енлысь кывсӧ да туйдӧд-велӧд йӧзсӧ.

¹⁴ Видз Енсянь сетӧмторсӧ, кодӧс вӧлі сетӧма тэныд пророклӧн висьталӧмыс пыр вичкоса юрнуӧдысьяслӧн ки пуктылігӧн.

¹⁵ Тӧждысь та вӧсна, ставсӧ вӧч сьӧлӧмсяньыд, сэки быдӧн аддзас тэнсьыд вермӧмтӧ.

¹⁶ Видзӧд ас бӧрсяыд, кыдзи олан да мыйӧ велӧдан. Вӧч тайӧс дугдывтӧг, ӧд тадзи вӧчигӧн тэ асьтӧ мездан, тшӧтш тэнӧ кывзысьясӧс.