1 Тимофейлы 3 - Коми Библия 2023

Вичкоса веськӧдлысь

¹ Коді кӧсйӧ вичкоӧн веськӧдлыны, сійӧ бур удж кӧсйӧ вӧчны – тайӧ тадзи.

² Вичкоса веськӧдлысьӧн вермӧ лоны сӧмын сӧстӧм оласнога, ӧти гӧтыра, садь да сюсь вежӧра, бур оласнога морт. Ветлысь-мунысьӧс сибӧдӧ, кужӧ велӧдны,

³ оз ю, оз тышкась, аслыс оз курав, рам сьӧлӧма, оз пинясь, сьӧм вылӧ оз горшась,

⁴ аслас гортсанас бура веськӧдлӧ. Сылӧн ныв-пиыс кывзысьӧны сылысь да пыдди пуктӧны сійӧс.

⁵ Сійӧ кӧ оз сяммы веськӧдлыны гортсанас, вермас-ӧ тӧждысьны Енлӧн вичкоыс вӧсна?

⁶ Вичкоса веськӧдлысьӧн оз вермы лоны морт, коді сӧмын на бергӧдчис Ен дінӧ. Ӧд сійӧ вермас вылӧ кыпӧдчыны да омӧльыс моз веськавны мыждӧм улӧ.

⁷ Зэв колана, медым вичкоысь ӧтдор мукӧдыс тшӧтш пыдди пуктісны сійӧс. Сэки лёк сёрниыс сы йылысь оз паськав, и сійӧ оз шед омӧльыслӧн налькйӧ.

Вичкоса отсасьысьяс

⁸ Вичкоса отсасьысьяс мед лоасны мывкыдаӧсь, сёрнитасны веськыда, оз кодавны, аслыныс оз куравны,

⁹ сӧстӧм сьӧлӧмӧн видзасны эскӧмлысь гусяторсӧ.

¹⁰ Найӧс колӧ водзвыв тӧдмавны, сэсся, шогманаӧсь кӧ, мед кесъялӧны.

¹¹ Аньяс мед тшӧтш лоасны мывкыдаӧсь, садь вежӧраӧсь, быдторйын эсканаӧсь да оз суклясьны.

¹² Вичкоса отсасьысь мед вӧлі ӧти гӧтыра, бура веськӧдліс гортнас да ныв-пинас.

¹³ Бура кесъялысьӧс вылӧ донъяласны, сійӧ повтӧг кутас висьтавлыны Исус Кристослы эскӧм йылысь.

¹⁴ Лача кута, мый регыд локта тэ дінӧ. Гижа тайӧс,

¹⁵ медым, падма кӧ, тэ тӧдін, кыдзи кутны асьтӧ Ен керкаын, ловъя Енлӧн вичкоын. Ӧд вичкоыс эм збыльыслӧн сюръяыс да подулыс.

¹⁶ Кывшутӧг, миян эскӧмлӧн гусяторйыс ыджыд: Енмыс восьтіс Асьсӧ вир-яйын, Лолыс петкӧдліс Сылысь веськыдлунсӧ, Сійӧс аддзылісны анделъяс, Сы йылысь юӧртісны ентӧдтӧмъяслы, Сылы эскисны муюгыдас, Сійӧ кыпӧдчис дзирдлунас.