1 Петыр 5 - Коми Библия 2023

Вичкоса юрнуӧдысьясӧс туйдӧдӧм

¹ Ӧні ме шыася вичкоса юрнуӧдысьяс дінӧ. Ачым ме тшӧтш вичкоса юрнуӧдысь, ме аддзылі Кристослысь сьӧкыдалӧмсӧ, и меным тшӧтш вичмас воссяна дзирдлуныс. Ме ёна кора тіянӧс:

² видзӧй тіянлы сетӧм Енлысь йӧз чукӧрсӧ. Тӧждысьӧй на вӧсна нимкодьпырысь да Енлы шогмана ногӧн, энӧ мырдӧнпырысь. Вӧчӧй тайӧс сьӧлӧмсяньныд, а энӧ аслыныд мыйкӧ куралӧм могысь.

³ Энӧ ыджыдалӧй Енлӧн йӧз чукӧр вылын, но асланыд оласногӧн петкӧдлӧй налы, кыдзи колӧ овны.

⁴ Медыджыд Видзысьыс локтас да козьналас тіянлы сісьмытӧм дзирдалан юркытш.

Вичкоӧс туйдӧдӧм

⁵ Томджыкъяс, кывзысьӧй вичкоса юрнуӧдысьяслысь. Ставныд кывзысьӧй ӧта-мӧдныдлысь да лоӧй рам сьӧлӧмаӧсь, ӧд вылӧ кыпӧдчысьяслы Енмыс паныд сувтӧ, а рамъяс дінӧ Сійӧ буралӧ.

⁶ Сідзкӧ, раммӧдчӧй Енлӧн вына кипод улӧ, и ас кадӧ Сійӧ кыпӧдас тіянӧс.

⁷ Ассьыныд став тӧжд-могтӧ вайӧй Сылы, ӧд Сійӧ тӧждысьӧ тіян вӧсна.

⁸ Олӧй садь вежӧрӧн да пыр лоӧй дасьӧсь. Ӧд тіянлы паныд сувтысь омӧльыс ветлӧ равзысь лев моз да корсьысьӧ, кодӧс эськӧ ньылыштны.

⁹ Сувтӧй сылы паныд зумыд эскӧмӧн. Тӧдӧй, мый став му пасьталаыс вокъясныд тіян моз тшӧтш нуӧны сьӧкыдсӧ.

¹⁰ Тіянлы этша нин колис сьӧкыдавны. Та бӧрти буралӧмнас озыр Ен, коді корис тіянӧс Исус Кристос пыр Аслас бырлытӧм дзирдлунӧ, мед ёнмӧдас да зумыдмӧдас тіянӧс да вӧчас тыр-буръясӧн.

¹¹ Сылы ошкӧмыс, Сылӧн ыджыдалӧмыс нэмъяс чӧж! Аминь.

Чолӧмалӧм

¹² Тайӧ дженьыдик гижӧдсӧ ме гижи тіянлы Силуан вок отсӧгӧн, кодлы позьӧ эскыны. Кӧсъя эскӧдны да ышӧдны тіянӧс: кутчысьӧй Енлӧн збыль буралӧмас, кодӧс сетӧма тіянлы.

¹³ Тіянӧс чолӧмалӧ вавилонса вичко, кодӧс Енмыс бӧрйӧма тіянӧс моз. Чолӧмалӧ тіянӧс тшӧтш Марк пиӧй.

¹⁴ Чолӧмалӧй ӧта-мӧднытӧ мусапырысь окыштӧмӧн. Лӧнь олӧм ставныдлы, кодъяс Исус Кристос пытшкынӧсь. Аминь.