1 Коринфӧ 9 - Коми Библия 2023

Павел дорйысьӧ мыждысьяс водзын

¹ Ме ӧмӧй абу апостол? Ме ӧмӧй кӧртасьӧма мыйӧнкӧ? Ме ӧмӧй эг аддзыв Исус Кристосӧс, миянлысь Господьӧс? Ті – Господь пытшкынӧсь. Тайӧ ӧмӧй абу менам уджлӧн вотӧсыс?

² Гашкӧ, мукӧдыслы ме абу апостол, но тіянлы апостол. Ті – Господь пытшкынӧсь, и тайӧ висьталӧ, мый ме збыльысь апостол.

³ Менӧ мыждысьяс водзын ме тадзи дорйыся.

⁴ Гашкӧ, миянлы оз позь сёйны-юнысӧ?

⁵ Гашкӧ, миянлы оз позь мукӧд апостолыс моз босьтны аскӧд эскысь гӧтырӧс? Ӧд тадзи вӧчӧны Господьлӧн вокъяс да Кифа.

⁶ Гашкӧ, сӧмын меным да Варнавалы колӧ уджавнысӧ, медым аслыным кынӧмпӧт перйыны?

⁷ Тышкаморт ӧмӧй ас тшӧт весьтас олӧ? Виноград быдтысь оз ӧмӧй виноград вотӧссӧ сёй? Ыж-мӧс видзысь оз ӧмӧй налысь йӧвсӧ ю?

⁸ Тадзи мӧвпалӧны оз сӧмын йӧзыс, тадзи висьталӧ тшӧтш Индӧдыс.

⁹ Мӧисейлӧн Индӧдас гижӧма: «Вартысь ӧшкӧс сёйӧмысь эн кут». Енмыс ӧмӧй ӧш вӧсна тӧждысьӧ?

¹⁰ Абу ӧмӧй тайӧс миянлы висьталӧма? Ӧд миянлы гижӧма: «Гӧрысь да вартысь уджалӧны лачаӧн, медым босьтны ассьыныс пай».

¹¹ Ми кӧдзим тіян сьӧлӧмӧ Ловсянь кӧйдыс. Тіянлы ӧмӧй лоӧ сьӧкыд, вичмӧданныд кӧ миянлы быдлунъя олӧм вылӧ?

¹² Мукӧдыслы кӧ ті вичмӧданныд, сідзкӧ, ми ёнджыка на вермам та вылӧ лача кутны. Но ми нинӧм эгӧ корлӧй тіянлысь. Мӧдарӧ, ми нуам став сьӧкыдсӧ, медым эгӧ вӧлӧй крукӧдӧн Кристослӧн Бур Юӧрлы.

¹³ Ті ӧд тӧданныд, мый крамын кесъялысьяс пӧткӧдӧны асьнысӧ крамӧ вайӧмторйӧн, а висьпуктанінын кесъялысьяс босьтӧны аслыныс пай висьпуктанін вылӧ вайӧмторйысь.

¹⁴ Евангелльӧ висьталысьяслы Господь тшӧтш тадзи тшӧктіс вӧчны: пӧткӧдчыны Бур Юӧр висьталӧм помысь.

¹⁵ Но ме некор тадзи эг вӧчлы. Ме гижа та йылысь ог аслым мыйкӧ босьтӧм могысь, ӧд бурджык меным кувны тадзи вӧчӧм дорысь! Но тайӧн ошйысьӧмысь некод оз вермы дугӧдны менӧ.

¹⁶ Ме кӧ висьтавла Бур Юӧр, меным нинӧмӧн ошйысьнысӧ, ӧд тайӧс меным Енмыс тшӧктіс вӧчны. Курыд шог меным, ог кӧ висьтавлы сійӧс!

¹⁷ Ме кӧ висьтавла Бур Юӧрсӧ ас кӧсйӧм серти, сэки меным удждон лоӧ. Ог кӧ ас кӧсйӧм серти, сэки индӧм удж вӧча.

¹⁸ Сідзкӧ, кутшӧм менам удждонӧй? Удждонӧй менам – висьтавлыны Кристос йылысь Бур Юӧрсӧ дон босьттӧг. Дерт, ме верма Бур Юӧр висьтавлӧмысь дон босьтны, но ог кӧсйы тадзи вӧчны.

¹⁹ Ме некодлы абу кесйӧг, но лои кесйӧгӧн быдӧнлы, медым унджык йӧзӧс вайӧдны Кристос дінӧ.

²⁰ Иудейяскӧд ме куті ачымӧс иудей моз, медым вайӧдны найӧс Кристос дінӧ. Индӧд серти олысьяскӧд куті ачымӧс на моз, медым вайӧдны найӧс Кристос дінӧ.

²¹ Индӧдтӧг олысьяскӧд куті ачымӧс тшӧтш на моз, медым вайӧдны найӧс Кристос дінӧ. Дерт, ме абу Индӧдтӧг олысь, ӧд ме ола Кристослӧн индӧд серти.

²² Жеб эскысьяскӧд куті ачымӧс тшӧтш на моз, медым вайӧдны найӧс Кристос дінӧ. Ме вӧчи став позянасӧ, медым эськӧ кымынкӧ мортӧс верми мездыны.

²³ Ставсӧ тайӧс вӧча Евангелльӧ вӧсна, мед меным тшӧтш вичмас сылӧн бурсиӧмыс.

²⁴ Ті ӧмӧй онӧ тӧдӧй, мый панласигӧн котӧртӧны унаӧн, но тырдоныс вичмӧ сӧмын ӧтилы. Сідзкӧ, котӧртӧй, медым тайӧ тырдоныс вичмис тіянлы.

²⁵ Быд панласьысь ёна зільӧ да кутӧ асьсӧ киас, медым котӧртӧм бӧрас сылы вичмис юркытш. Но тайӧ юркытшыс сісьмана. А ми кутам асьнымӧс киын, медым миянлы вичмис сісьмытӧм юркытш.

²⁶ Та вӧсна некытчӧ кежтӧг котӧрта помӧдз да тышкася ог весьшӧрӧ, менам быд вартӧм веськалӧ коланаинӧ.

²⁷ Ме топӧда ассьым вир-яйӧс да тшӧкта сійӧс кывзысьны, медым мукӧдлы Бур Юӧр висьтавлігӧн ачым вӧлі шогманаӧн.