1 Коринфӧ 7 - Коми Библия 2023

Гозъякост олӧм

¹ Ті меным гижлінныд да юалінныд гӧтрасьӧм йылысь. Та вылӧ вочавидза тадзи. Дерт, бур, мортыс кӧ оз гӧтрась,

² но медым некод эз кырсав, быд мортлӧн мед лоӧ аслас гӧтыр да быд аньлӧн – аслас верӧс.

³ Вольпасьын верӧс сет асьтӧ гӧтырыдлы, а гӧтыр сет асьтӧ верӧсыдлы.

⁴ Абу гӧтыр аслас вир-яй вылын ыджыдыс, а верӧс. Абу верӧс аслас вир-яй вылын ыджыдыс, а гӧтыр.

⁵ Энӧ ылыстчӧй ӧта-мӧдсьыныд, а ылыстчанныд кӧ, вӧчӧй тайӧс сёрнитчӧмӧн, сӧмын кутшӧмкӧ кад кежлӧ, медым сэки ёнджыка на верминныд видзавны да кевмысьны. Сэсся бӧр ӧтлаын лоӧй, медым сӧтана эз ыштӧд тіянӧс кутчысьтӧм вӧснаныд.

⁶ Дерт, тайӧ абу тшӧктӧм, но ті верманныд тадзи вӧчны.

⁷ Ме эськӧ кӧсйи, медым быдӧн оліс ме моз гӧтыртӧг. Но Енмыс быдӧнлы вичмӧдӧ торъя сетӧмтор: ӧтилы – сэтшӧмӧс, мӧдлы – татшӧмӧс.

⁸ Гӧтыртӧмъяслы да дӧваяслы тадзи висьтала: бурджык тіянлы ме моз ӧткӧн овны,

⁹ но онӧ кӧ вермӧй кутны асьнытӧ, гӧтрасьӧй либӧ верӧс сайӧ петӧй. Ӧд бурджык гӧтрасьны либӧ верӧс сайӧ петны, медым лёкколӧмыс эз ыджыдав тіян вылын.

¹⁰ Гозйӧн олысьяслы ог ме, а Господь тшӧктӧ: гӧтыр мед оз юксьы верӧсыскӧд.

¹¹ А юксяс кӧ, мед ӧтнасӧн олӧ либӧ бӧр бурасьӧ верӧсыскӧд. Верӧс мед тшӧтш оз юксьы гӧтырыскӧд.

¹² Мукӧдыслы висьтала ме, оз Господь: кутшӧмкӧ эскысьлӧн кӧ гӧтырыс оз эскы, но кӧсйӧ овны верӧсыскӧд, тайӧ эскысьыс мед оз юксьы гӧтырыскӧд.

¹³ Тайӧс висьтала тшӧтш эскысь аньлы: сылӧн верӧсыс кӧ оз эскы, но кӧсйӧ овны сыкӧд, тайӧ аньыс мед оз юксьы аслас верӧсыскӧд.

¹⁴ Тадзи эскысь гӧтырыс пыр Енмыс вежӧдӧ эскытӧм верӧссӧ, и мӧдарӧ, эскысь верӧсыс пыр вежӧдӧ эскытӧм гӧтырсӧ. Эз кӧ вӧв тадзи, тіян ныв-пиныд эськӧ вӧліны пежӧсь, но ӧні найӧ вежаӧсь.

¹⁵ Эскытӧм верӧс либӧ эскытӧм гӧтыр кӧ кӧсйӧ юксьыны, мед юксьӧ. Сэки эскысь верӧсӧс либӧ эскысь гӧтырӧс нинӧм оз кут, ӧд Енмыс тшӧктіс овны миянлы лӧня.

¹⁶ Гӧтыр, тэ ӧмӧй верман тӧдны, мый мездан ассьыд верӧстӧ? А тэ, верӧс, верман ӧмӧй тӧдны, мый мездан ассьыд гӧтыртӧ?

Быдӧн мед олӧ Енлӧн шуӧм серти

¹⁷ Быдӧн тіян пиысь мед олӧ Енлӧн шуӧм серти да лоӧ сэтшӧмӧн, кутшӧмӧн вӧлі Господьлӧн коригас. Тадзи ме велӧда быд вичкоын.

¹⁸ Енлӧн коригас кӧ вӧлі вундыштӧма кодӧскӧ, сійӧ мед оз дзеб тайӧс. Абу кӧ вӧлі вундыштӧма – мед оз вундыштчы.

¹⁹ Вундыштӧмыс нинӧм, и вундыштчытӧмыс нинӧм, но медшӧр могыс – овны Енлӧн тшӧктӧм серти.

²⁰ Быдӧн мед лоӧ сэтшӧмӧн, кутшӧмӧн вӧлі Енлӧн коригас.

²¹ Енлӧн коригас кӧ вӧлін кесйӧгӧн, эн майшась, но позьӧ кӧ мездмыны, бурджыксӧ бӧрйы.

²² Господьлӧн коригас кӧ мортыс кесйӧгӧн вӧлі, ӧні сійӧ Господьлӧн мездлуна морт. А мездлуна кӧ вӧлі, ӧні сійӧ Кристослӧн кесйӧг.

²³ Енмыс ньӧбис тіянӧс ыджыд дон вылӧ, сідзкӧ, энӧ лоӧй мортлӧн кесйӧгӧн.

²⁴ Вокъяс, быдӧн лоӧй Ен водзын сэтшӧмӧн, кутшӧмӧн вӧлінныд Енлӧн коригас.

Гӧтыртӧмъяслы да верӧс сайӧ мунтӧмъяслы

²⁵ Ӧні висьтала верӧс сайӧ мунтӧмъяслы. Тайӧ абу Господьлӧн тшӧктӧм, ме висьтала ассьым видзӧдласӧс, ӧд Господьлӧн буралӧмыс кузя меным позьӧ эскыны.

²⁶ Ме чайта, тайӧ сьӧкыд кадас мортлы бурджык ӧткӧн кольччыны.

²⁷ Тэ кӧ гӧтыра – эн юксьы. Гӧтыртӧм кӧ – эн гӧтрась.

²⁸ Дерт, гӧтрасян кӧ, он мыжмы. Ныв кӧ петас верӧс сайӧ, тшӧтш оз ло мыжа. Но гозъякост олӧмас виччысьӧ тіянӧс уна сьӧкыдлун, да таысь кӧсъя видзны тіянӧс.

²⁹ Вокъяс, кӧсъя шуны тіянлы, мый кадыс коли этша нин. Та вӧсна гӧтыра морт мед олӧ гӧтыртӧм моз,

³⁰ бӧрдысь – бӧрдтӧм моз, гажӧдчысь – гажӧдчытӧм моз, а ньӧбасьысь – быттьӧ нинӧм эз ньӧб.

³¹ Тайӧ мувывса озырлуннас вӧдитчысь мед олӧ сідзи, быттьӧ сылӧн нинӧм абу, ӧд став тайӧ мувывсаыс регыд бырас.

³² Кӧсъя, медым ті нинӧм вӧсна энӧ тӧждысьӧй. Гӧтыртӧм морт тӧждысьӧ Господьлӧн уджъяс вӧсна, медым Господьлы шогмыны,

³³ а гӧтыра морт тӧждысьӧ быдлунъя могъяс вӧсна, медым гӧтырыслы шогмыны. Верӧс сайӧ петӧм ань да верӧстӧм ань ӧта-мӧдсьыс тшӧтш торъялӧны.

³⁴ Верӧстӧм ань тӧждысьӧ, медым Господьлы шогмыны, медым вир-яйнас да ловнас Сы водзын вежаӧн лоны. А верӧс сайӧ петӧм ань тӧждысьӧ быдлунъя могъяс вӧсна, медым верӧсыслы шогмыны.

³⁵ Ме висьтала тайӧс тіянлы бур вылӧ. Ме ог кӧсйы тіянӧс нинӧмӧн сьӧктӧдны. Кӧсъя, медым ті олінныд шогмана ногӧн да некытчӧ ылавтӧг сьӧлӧмсяньныд кесъялінныд Господьлы.

³⁶ Шуам, мортыслӧн эм гӧтырпу. Сійӧ кӧ лыддьӧ лёкторйӧн, мый оз гӧтрась гӧтырпуыс вылӧ и асьсӧ кутны оз вермы, мед ас кӧсйӧм сертиыс вӧчӧ, мед гӧтрасьӧ – тайӧ абу мыж.

³⁷ Но мортыс кӧ зумыда сулалӧ аслас кыв вылын, вермӧ асьсӧ кутны да сьӧлӧмас шуис овны гӧтрасьтӧг, сійӧ бура вӧчӧ.

³⁸ Та вӧсна, мортыс кӧ гӧтрасьӧ – бура вӧчӧ, а оз кӧ – нӧшта на бурджыка.

³⁹ Индӧд серти гӧтыр кӧртасьӧма верӧсыскӧд, кытчӧдз верӧсыс ловъя. Кулӧ кӧ верӧсыс, гӧтыр вермӧ петны верӧс сайӧ, код сайӧ кӧсйӧ, сӧмын верӧсыс мед Господьлы эскис.

⁴⁰ Но бурджык лоӧ, оз кӧ пет верӧс сайӧ. Чайта, Енлӧн Лолыс эм и ме пытшкын, сійӧн тадзи шуа.