1 Коринфӧ 3 - Коми Библия 2023

Ми – Енлӧн уджъёртъяс

¹ Вокъяс, ме эг вермы сёрнитны тіянкӧд Лов серти олысьяскӧд моз. Ме сёрниті тіянкӧд вир-яй серти олысьяскӧд моз, ӧд Кристослы эскӧмын ті кага кодьӧсь на.

² Ме верді тіянӧс йӧлӧн, а эг чорыд сёянӧн, ӧд ті энӧ на вермӧй сёйны чорыдсӧ. Ті ӧнӧдз онӧ вермӧй сёйны сійӧс,

³ ӧд ті вир-яй серти на оланныд. Тіян костын пыр на овлӧ вежалӧм, вензьӧм да юксьӧм. Сідзкӧ, ті вир-яй серти на оланныд, ті пыр на тайӧ муюгыдсаыс кодьӧсь.

⁴ Ӧти шуӧ: «Ме – Павеллӧн», мӧд шуӧ: «ме – Аполослӧн». Тадзи кӧ сёрнитанныд, сідзкӧ, ті дзик на тайӧ муюгыдсаыс кодьӧсь.

⁵ Коді нӧ Павелыс? Коді Аполосыс? Найӧ сӧмын кесъялысьяс, кодъяс пыр ті эскинныд Кристослы. На пиысь быдӧн Господьсянь сетӧм удж вӧчис.

⁶ Ме кӧдзи, Аполос киськаліс, а быдтіс Енмыс.

⁷ Сідзкӧ, кӧдзысьыс да киськалысьыс нинӧм, ӧд быдтысьыс – Енмыс.

⁸ Кӧдзысьыс да киськалысьыс ӧти удж вӧчӧны, но быдӧн на пиысь удждонсӧ уджыс серти босьтас.

⁹ Ми – Енлӧн уджъёртъяс, а ті – Сылӧн кӧдзӧм муыс, Сылӧн тэчасыс.

¹⁰ Енлӧн бурсетӧмыс вӧсна ме лои бур тэчысьӧн да пукті подувсӧ, а мӧд лэптӧ сы вылӧ. Но быдӧн мед видзӧдӧ аслас удж бӧрся.

¹¹ Подувсӧ пуктӧма нин, тайӧ – Исус Кристос. Тайӧ подулыс кындзи мӧд подув некод оз вермы пуктыны.

¹² Тайӧ подув вылас мортыс вермӧ лэптыны тэчассӧ зарниысь, эзысьысь, дона изйысь, пуысь, турунысь либӧ идзасысь,

¹³ но уджыс быдӧнлӧн ас кадӧ тыдовтчас. Тайӧс петкӧдлас мыждан луныс, ӧд сійӧ биӧн воас. Сэки биыс быдӧнлысь уджсӧ тӧдмалас.

¹⁴ Кодлӧн вӧчӧмторйыс кутас зумыда сулавны, сійӧ ассьыс удждонсӧ босьтас.

¹⁵ А сотчас кӧ, сэки удждонсӧ воштас. Дерт, асьсӧ сійӧс лоӧ мездӧма, быттьӧ биысь перъясны.

¹⁶ Ті ӧмӧй онӧ тӧдӧй, мый ті – Енлӧн оланін, мый Енлӧн Лолыс олӧ тіян пытшкын.

¹⁷ Коді жугӧдас Енлысь оланінсӧ, Енмыс сійӧс асьсӧ жугӧдас, ӧд ті – Енлӧн оланін, а Енлӧн оланіныс вежа.

¹⁸ Асьнытӧ энӧ ылӧдлӧй. Тайӧ муюгыдас кӧ лыддьӧ кодкӧ асьсӧ мывкыдаӧн, медводз сійӧ мед лоӧ мывкыдтӧмӧн. Сэки сійӧ збыльысь лоӧ мывкыда.

¹⁹ Ӧд Енмыс тайӧ му вылас олысьяслысь мывкыдлунсӧ лыддьӧ йӧйталӧмӧн. Гижӧма: «Енмыс тывйыштӧ мывкыдаясӧс асланыс наянлунӧ».

²⁰ Нӧшта гижӧма: – Господь тӧдӧ мывкыда йӧзлысь мӧвпъяссӧ, Сійӧ тӧдӧ, мый налӧн мӧвпъясыс ковтӧмӧсь.

²¹ Сідзкӧ, некод мед оз ошйысь мортӧн, ӧд ставыс тіян:

²² Павел-ӧ, Аполос-ӧ, Кифа-ӧ, муюгыдыс-ӧ, олӧмыс-ӧ, кулӧмыс-ӧ, ӧніяыс-ӧ, локтанаыс-ӧ – ставыс тайӧ тіян.

²³ Ті – Кристослӧн, а Кристос – Енлӧн.