1 Коринфӧ 16 - Коми Библия 2023

Ерусалимса вежа войтырлы сьӧм чукӧртӧм

¹ Ӧні сёрнитышта вежа войтырлы сьӧм чукӧртӧм йылысь. Та йылысь ме висьтавлі нин галатса вичкоясын. Сідзкӧ, вӧчӧй менам висьталӧм серти:

² вежонса медводдза лунӧ быдӧн торйӧдӧй сьӧмнытӧ мыйта верманныд да видзӧй сійӧс ас орданыд. Сэки менам локтігкежлӧ тіян лоӧ чукӧртӧма нин.

³ Бӧрйӧй ас пӧвстсьыныд некымын мортӧс. Кор воа тіянӧ, сета налы эскӧдан гижӧд да мӧдӧда найӧс Ерусалимӧ, медым нуасны сэтчӧ чукӧртӧм сьӧмнытӧ.

⁴ Ковмас кӧ аслым сэтчӧ муннысӧ, накӧд тшӧтш муна.

Павел мӧдӧдчӧ туйӧ

⁵ Македония кытшовтӧм бӧрын локта тіян дінӧ, ӧд ме бӧрсӧ кӧсъя локны Македония пыр.

⁶ Гашкӧ, мыйтакӧ олышта тіян дінын, гашкӧ, тӧвъя весиг. Сэсся водзӧ менӧ мӧдӧданныд.

⁷ Ме ог кӧсйы аддзӧдчывны тіянкӧд сӧмын пырмунігмоз. Господь кӧ сетас, кӧсъя дырджык олыштны тіян дінын.

⁸ Ефес карӧ ме кольчча Ветымынӧд лунся гажӧдз,

⁹ ӧд Енмыс меным паськыда восьтіс ӧдзӧсъяс уджавны. Дерт, и паныд сувтысьыс уна.

¹⁰ Локтас кӧ тіян дінӧ Тимофей, тӧждысьӧй сы вӧсна, медым сылы нинӧмысь эз ковмы майшасьны, ӧд сійӧ ме моз кесъялӧ Господьлы.

¹¹ Энӧ увтыртӧй сійӧс! Отсалӧй сылы лӧнь сьӧлӧмӧн бӧр локны ме дінӧ. Тані мукӧд вокъяскӧд ме виччыся сійӧс.

¹² Ме ёна кори Аполос вокӧс, медым вокъяскӧд тшӧтш муніс тіян дінӧ, но ӧні оз на кӧсйы. Вермыны кутас да, локтас.

Павеллӧн туйдӧдӧм

¹³ Лоӧй дасьӧсь да зумыда эскӧй! Лоӧй вынаӧсь да повтӧмӧсь!

¹⁴ Ставсӧ вӧчӧй мусапырысь!

¹⁵ Вокъяс, ті тӧданныд, мый Степан да сылӧн гортсаыс лоины Акайяын медводдза эскысьясӧн. Найӧ сетісны асьнысӧ кесъявны вежа войтырлы. Кора тіянӧс:

¹⁶ кывзысьӧй налысь, тшӧтш накӧд ӧтвыв уджалысьяслысь да кесъялысьяслысь.

¹⁷ Меным нимкодь, мый Степан, Фортунат да Акаик воисны татчӧ, ӧні найӧ тіян пыдди.

¹⁸ Найӧ кыпӧдісны менсьым лолӧс, тшӧтш тіянлысь. Вылӧ пуктӧй татшӧм йӧзсӧ!

Чолӧмъяс

¹⁹ Тіянлы ыстӧны чолӧм асияса вичкояс. Господь нимӧн сьӧлӧмсяньныс чолӧмалӧны тіянӧс Акил, Прискилла да на ордӧ чукӧртчысьяс.

²⁰ Тіянлы ыстӧны чолӧм став вокъяс. Чолӧмалӧй ӧта-мӧднытӧ вежа окыштӧмӧн!

²¹ Ме, Павел, аслам киӧн гижа тіянлы чолӧмӧс.

²² Коді оз радейт Господь Исус Кристосӧс, сійӧс лоӧ ёрӧма. Маран-афа.

²³ Миян Господь Исус Кристослӧн буралӧмыс тіянкӧд.

²⁴ Менам муслунӧй ставныдкӧд, кодъяс Исус Кристос пытшкынӧсь. Аминь.