1 Коринфӧ 12 - Коми Библия 2023

Ловсянь сетӧмторъяс

¹ Вокъяс, кӧсъя, мед ті тӧдінныд Ловсянь сетӧмторъяс йылысь.

² Кор ті вӧлінныд ентӧдтӧмъясӧн на, тіянӧс ёна кыскис сёрниттӧм идолъяс дінӧ. Ті асьныд тӧданныд та йылысь.

³ Та вӧсна висьтала тіянлы: морт пытшкас кӧ эм Енлӧн Лолыс, сійӧ некор оз кут ёрны Исусӧс. И мӧдарӧ, некод оз вермы шуны Исусӧс Господьӧн, абу кӧ сы пытшкын Вежа Лов.

⁴ Сетӧмторйыс унапӧлӧс, но Лолыс ӧти.

⁵ Кесъялӧмыс унапӧлӧс, но Господь ӧти.

⁶ Вӧчанногыс унапӧлӧс, но быдӧн пытшкын ставсӧ вӧчӧ ӧти Ен.

⁷ Сійӧ сетӧ Ловлы быдӧн пыр петкӧдчыны ас ногыс, ӧта-мӧдлы бур вылӧ.

⁸ Ӧтилы Лолыс сетӧ мывкыд кывъяс, мӧдлы – тӧдӧмлун, мед юксьыны мукӧдкӧд,

⁹ кодлыкӧ Лолыс сетӧ эскӧм, кодлыкӧ – сямлун бурдӧдны.

¹⁰ Мукӧдыслы Лолыс сетӧ вын вӧчны шензьӧданаторъяс, кодлыкӧ – пророкавны, кодлыкӧ – сямлун тӧдмавны быдпӧлӧс ловсӧ. Мукӧдыслы Лолыс сетӧ сямлун сёрнитны мукӧд кывъяс вылын, а кодлыкӧ – гӧгӧрвоӧдны тайӧ сёрнисӧ.

¹¹ Ставсӧ тайӧс вӧчӧ ӧти Лов. Ас кӧсйӧм сертиыс Сійӧ быдӧнлы торйӧн юклӧ тайӧ сетӧмторъяссӧ.

Юкӧныс уна, вир-яйыс ӧти

¹² Босьтны кӧ мортлысь вир-яйсӧ, сійӧ артмӧма уна юкӧнысь, но ӧтвылысь найӧ артмӧдӧны ӧти вир-яй. Тайӧс позьӧ шуны тшӧтш Кристос йылысь.

¹³ Ӧд ми: иудейяс и грекъяс, кесйӧгъяс и мездлуна йӧз – ставным пыртчим ӧти Лов отсӧгӧн ӧти вир-яйӧ, ставным юим ӧти Ловсянь.

¹⁴ Мортлӧн вир-яйыс артмӧма уна юкӧнысь, абу ӧтиысь.

¹⁵ Шуас кӧ кок: «Ме абу ки, сідзкӧ, ме абу вир-яйлӧн юкӧн», сійӧ ӧд оз дугды лоны вир-яйлӧн юкӧннас.

¹⁶ Шуас кӧ пель: «Ме абу син, сідзкӧ, ме абу вир-яйлӧн юкӧн», сійӧ ӧд оз дугды лоны вир-яйлӧн юкӧннас.

¹⁷ Вир-яйлӧн кӧ эм сӧмын син, сэки мыйӧн кутас кывзыны? Вир-яйлӧн кӧ эм сӧмын пель, сэки мыйӧн кутас исавны?

¹⁸ Но Енмыс Ас кӧсйӧм сертиыс быд юкӧн пуктіс вир-яяс коланаинӧ.

¹⁹ Ӧд быд юкӧн кӧ вӧлі сӧмын ӧтипӧлӧс, сэки эськӧ вир-яйыс эз артмы.

²⁰ Та вӧсна юкӧныс уна, а вир-яйыс ӧти.

²¹ Син оз вермы шуны килы: «Тэ меным ковтӧм». Юр оз вермы шуны коклы: «Тэ меным ковтӧм».

²² Мӧдарӧ, вир-яйлӧн жебджык юкӧнъясыс ёнджыка на коланаӧсь.

²³ Вир-яйлысь ӧткымын юкӧнсӧ ми огӧ ёна донъялӧй, но найӧс бура вевттям.

²⁴ Ми зілям бура вевттьыны миянӧс янӧдысь юкӧнъяссӧ, а мичаджык юкӧныслы вевттьӧдыс абу колана. Но Енмыс вир-яйсӧ тадзи лӧсьӧдӧма: Сійӧ ёнджыка на донъялӧ сійӧ юкӧнсӧ, кодӧс ми огӧ ёна донъялӧй,

²⁵ медым вир-яй пытшкын эз вӧвны вензьӧмъяс. Сэки быд юкӧн кутас ӧтмоза тӧждысьны ӧта-мӧд вӧснаыс.

²⁶ Сьӧкыдалӧ кӧ вир-яйлӧн ӧти юкӧн, сыкӧд тшӧтш сьӧкыдалӧ мукӧд юкӧныс. Ошкӧны кӧ вир-яйлысь ӧти юкӧн, сыкӧд тшӧтш нимкодясьӧ мукӧд юкӧныс.

²⁷ Ӧтвылысь ті лоанныд Кристослӧн вир-яйӧн, а торйӧнсӧ – Сылӧн юкӧнъясӧн.

²⁸ Вичкоын Енмыс медводз сувтӧдіс апостолъясӧс, сэсся пророкъясӧс, сэсся велӧдысьясӧс. Мукӧдыслы Енмыс сетіс вын вӧчны шензьӧданаторъяс, мукӧдыслы – сямлун бурдӧдны, кодлыкӧ – отсасьны йӧзыслы, кодлыкӧ – веськӧдлыны, а кодлыкӧ – сёрнитны мукӧд кывъяс вылын.

²⁹ Гашкӧ, ми быдӧн апостол? Гашкӧ, быдӧн пророк либӧ велӧдысь? Гашкӧ, быдӧн вӧчам шензьӧданаторъяс?

³⁰ Гашкӧ, быдӧн вермам бурдӧдны? Гашкӧ, быдӧн сёрнитам мукӧд кывъяс вылын да вермам сійӧс гӧгӧрвоӧдны?

³¹ Сідзкӧ, зільӧй босьтны Ловсянь медбур сетӧмторсӧ. Ӧні ме петкӧдла тіянлы медбур туйсӧ.