1 Коринфӧ 10 - Коми Библия 2023

Энӧ юрбитӧй идолъяслы

¹ Вокъяс, кӧсъя казьтыштны тіянлы, мый миян батьяс ставныс ветлісны кымӧр улын да вуджисны саридз вомӧн.

² Найӧ ставныс пыртчисны кымӧрын да саридзын да лоисны Мӧисей бӧрся мунысьясӧн.

³ Найӧ ставныс пӧткӧдчисны ӧти сёянӧн – Ловсянь сёянӧн,

⁴ ставныс юисны ӧти ва – Ловсянь ва. Ӧд найӧ юисны Ловсянь сетӧм изйысь, коді ветлӧдліс накӧд. Тайӧ изйыс вӧлі Кристос.

⁵ Но унджыкыс на пиысь эз шогмыны Енмыслы да кулісны овтӧминын.

⁶ Ставыс тайӧ велӧдӧ миянӧс, медым миян сьӧлӧмын эз вӧв кӧсйӧм – на моз вӧчны лёксӧ.

⁷ Энӧ юрбитӧй идолъяслы, кыдзи вӧчисны кодсюрӧ миян батьяс пӧвстысь. Гижӧдыс висьталӧ: «Йӧзыс сёйисны-юисны, сэсся кутісны гажӧдчыны-ворсны».

⁸ Энӧ кырсалӧй, кыдзи вӧчисны кодсюрӧ миян батьяс пӧвстысь. Сэки ӧти лунӧ куліс на пиысь кызь куим сюрс морт.

⁹ Энӧ дӧзмӧдӧй Кристосӧс, кыдзи дӧзмӧдісны кодсюрӧ миян батьяс пӧвстысь, сэсся найӧ кулісны змейясысь.

¹⁰ Энӧ шуасьӧй, кыдзи шуасисны кодсюрӧ миян батьяс пӧвстысь. Сэсся Андел-Бырӧдысь виис найӧс.

¹¹ Ставыс тайӧ вӧлі накӧд, медым ӧлӧдны йӧзсӧ. Тайӧс гижӧма, медым велӧдны миянӧс, бӧръя кадас олысьясӧс.

¹² Сідзкӧ, чайтан кӧ, мый зумыда сулалан – видзчысь усьӧмысь.

¹³ Тіянӧс кӧ суис сьӧкыдлун, тайӧ быд морткӧд вермӧ лоны. Но Енмыс эскана, Сійӧ оз сет сьӧкыдсӧ вынысь унджык нуны. Мӧдарӧ, сьӧкыдлун дырйи Сійӧ индас тіянлы петан туй, да ті венанныд сьӧкыдсӧ.

¹⁴ Сідзкӧ, мусаяс, энӧ юрбитӧй идолъяслы.

¹⁵ Ме сёрнита тіянкӧд мывкыд йӧзкӧд моз. Ӧні ті асьныд мӧвпалӧй, мый йылысь висьтала тіянлы.

¹⁶ Ми бурсиам чашасӧ да чегъялам няньсӧ. Оз-ӧ тайӧ чашаыс йит миянӧс Кристос виркӧд? Оз-ӧ тайӧ няньыс йит миянӧс Кристос вир-яйкӧд?

¹⁷ Няньыс ӧти. Ми тшӧтш ӧти вир-яй, ӧд ми ставным тайӧ ӧти няньсӧ сёям, кӧть ми унаӧн.

¹⁸ Видзӧдлӧй Израиль войтыр вылӧ: найӧ сёйӧны крамӧ вайӧм вись. Тадзи вӧчигӧн оз-ӧ найӧ висьпуктанінкӧд ӧтувтчыны?

¹⁹ Сідзкӧ, мый кӧсъя шуны тайӧн? Гашкӧ, идолыс либӧ идоллы вайӧм висьыс мыйӧнкӧ тӧдчана?

²⁰ Абу! Кор ентӧдтӧмъяс вайӧны вись, найӧ вайӧны пеж ловъяслы, а оз Енлы. Но ме ог кӧсйы, медым ті ӧтувтчинныд пеж ловъяскӧд.

²¹ Ті онӧ вермӧй ӧтпырйӧ юны Господьлӧн чашаысь да пеж ловъяслӧн чашаысь. Ті онӧ вермӧй ӧтпырйӧ сёйны Господькӧд да пеж ловъяскӧд.

²² Ми огӧ кӧсйӧй дӧзмӧдны Господьӧс, ми ӧд Сыысь абу вынаджыкӧсь.

Ставсӧ вӧчӧй Енмӧс нимӧдӧм могысь

²³ «Меным ставсӧ позьӧ», но абу ставыс бур вылӧ. «Меным ставсӧ позьӧ», но оз ставыс велӧд бурас.

²⁴ Энӧ тӧждысьӧй сӧмын ас вӧснаныд, тӧждысьӧй вӧчны бурсӧ мӧдлы.

²⁵ Повтӧг сёйӧй вузасьысьлысь ньӧбӧм яй. Нинӧм энӧ юасьӧй, медым тіян сьӧлӧмныд эз мыжды тіянӧс.

²⁶ Муыс да ставыс, мый сэні эм – Господьлӧн.

²⁷ Эскытӧмъяс пиысь кӧ кодкӧ корас тіянӧс, да ті мунанныд сы ордӧ, сёйӧй сэні ставсӧ. Нинӧм энӧ юасьӧй сёяныс йылысь, медым тіян сьӧлӧмныд эз мыжды тіянӧс.

²⁸ Но висьталасны кӧ тіянлы, мый сёянсӧ вӧлі вайӧма идоллы вись пыдди, сэки энӧ сёйӧй тайӧ сёянсӧ висьталысьыс вӧсна, медым сылӧн сьӧлӧмыс эз мыжды сійӧс. Ӧд муыс и ставыс, мый эм сы вылын – Господьлӧн.

²⁹ Ме сёрнита ог тіян, а мӧд мортлӧн сьӧлӧм мыждӧм йылысь. Ме нинӧмӧн абу кӧртасьӧма, сідзкӧ, мӧд мортлӧн сьӧлӧмыс оз вермы мыждыны менӧ.

³⁰ Ме кӧ аттьӧала Енсӧ, сідзкӧ, мыйла менӧ мыждынысӧ, ӧд ме аттьӧала Енсӧ сёянысь?

³¹ Та вӧсна сёянныд-ӧ, юанныд-ӧ али нӧшта мыйкӧ вӧчанныд – ставсӧ вӧчӧй Енмӧс ошкӧм могысь.

³² Энӧ лоӧй крукӧдӧн некодлы: ни иудейяслы, ни грекъяслы, ни Енлӧн вичколы.

³³ Олӧй ме моз. Ме быдторйын зіля шогмыны быдӧнлы. Ме ог тӧждысь ас вӧсна, а тӧждыся мукӧдыс вӧсна, медым найӧ мездмисны.