1 Каднебӧг 9 - Коми Библия 2023

Ерусалимын олысьяс

¹ Тадзи став Израиль войтырсӧ вӧлі лыддьӧдлӧма рӧд сертиныс да гижалӧма израильса ӧксыяслӧн небӧгӧ. Енсӧ эновтӧм вӧсна Иуда войтырӧс вӧлі нуӧдӧма пленӧ Вавилонӧ.

² Медводдзаясӧн Вавилонысь Израильӧ локтісны попъяс, левитъяс да крамбердса кесйӧгъяс. Найӧ овмӧдчисны асланыс му юкӧнӧ, асланыс карӧ.

³ Ерусалимын олісны Иуда, Венямин, Ефрем да Манассей чужанкотырысь йӧз.

⁴ Иуда чужанкотырысь Ерусалимын оліс Парес рӧдысь Аммиудлӧн Утай пиыс. Аммиуд вӧлі Омрилӧн пи, Омри – Имрилӧн, а Имри – Банилӧн.

⁵ Ерусалимын олісны Шелай рӧдысь сылӧн медводдза чужысь Асай пиыс да Асайлӧн пияныс,

⁶ а Зерах рӧдысь – Еуэл аслас рӧднас. Ставнас – квайтсё ӧкмысдас морт.

^7-8 Венямин чужанкотырысь Ерусалимын олісны Саллу, Ивней, Элай да Мешуллам. Саллу вӧлі Мешулламлӧн пи, Мешуллам – Ходавийлӧн, Ходавий – Сенуйлӧн. Ивней вӧлі Ерохамлӧн пи. Элай вӧлі Уззейлӧн пи, Уззей – Микрилӧн. Мешуллам вӧлі Шефатайлӧн пи, Шефатай – Регуэллӧн, Регуэл – Ивнейлӧн.

⁹ Чужанвуж гижӧд серти налӧн лыдыс вӧлі ӧкмыссё ветымын квайт морт. Ставныс найӧ вӧліны рӧдкутысьяс.

¹⁰ Попъяс пӧвстысь Ерусалимын олісны Едай, Ехоярив, Якин,

¹¹ да Азарий, Енлӧн крамын веськӧдлысь. Азарий вӧлі Хилкилӧн пи, Хилки – Мешулламлӧн, Мешуллам – Садоклӧн, Садок – Мерайотлӧн, Мерайот – Ахитувлӧн.

¹² Ерусалимын олісны тшӧтш Адай да Маасай попъяс. Адай вӧлі Ерохамлӧн пи, Ерохам – Пашхурлӧн, Пашхур – Малкийлӧн. Маасай вӧлі Адиэллӧн пи, Адиэл – Яхзерлӧн, Яхзер – Мешулламлӧн, Мешуллам – Мешиллемотлӧн, Мешиллемот – Иммерлӧн.

¹³ Ерусалимын олісны тшӧтш налӧн чужанкотырысь рӧдкутысьяс. Ставнас – сюрс сизимсё квайтымын морт, кодъяс вермисны кесъявны Енлӧн крамын.

^14-16 Левитъяс пӧвстысь Ерусалимын олісны Шемай, Бакбакар, Хереш, Галал, Маттанай, Авдий да Берек. Шемай вӧлі Хашшувлӧн пи, Хашшув – Азрикамлӧн, Азрикам – Хашавийлӧн, Хашавий – Мерарилӧн пи. Маттанай вӧлі Микалӧн пи, Мика – Зикрилӧн, Зикри – Асафлӧн. Авдий вӧлі Шемайлӧн пи, Шемай – Галаллӧн, Галал – Едутунлӧн. Берек вӧлі Асалӧн пи, Аса – Элканлӧн, коді оліс нетофасаяслӧн сиктъясын.

¹⁷ Крам дзиръя видзысьяс пӧвстысь Ерусалимын олісны Шаллум, Аккув, Талмон, Ахиман да налӧн рӧдвужыс. Налӧн веськӧдлысьнас вӧлі Шаллум.

¹⁸ Ӧніӧдз найӧ видзисны крам асывладорысь Ӧксы дзиръя. А водзынджык найӧ видзисны левитъяслысь чомъяссӧ.

¹⁹ Шаллум вӧлі Корелӧн пи, Коре – Эвиасафлӧн, Эвиасаф – Корейлӧн. Шаллум да сылӧн бать рӧдысь вокъясыс кесъялісны-видзисны вежаинлысь пыранінсӧ. Налӧн батьясныс видзисны Господь войтырлӧн чомъяс сулаланінӧ пыранінсӧ.

²⁰ Сійӧ кадас наӧн веськӧдліс Элазарлӧн Пинес пиыс, и Господь вӧлі сыкӧд.

²¹ Мешелемлӧн Закар пиыс видзис вежаинлысь пыранінсӧ.

²² Кыксё дас кык мортӧс вӧлі бӧрйӧма видзны вежаинлысь пыранінсӧ. Найӧс вӧлі лыддьӧдлӧма чужанвуж гижӧдын сиктъясныс серти. Давид да Самуил пророк индісны найӧс тайӧ кывкутана уджыс вылӧ,

²³ медым видзны вежаинлысь, Господьлӧн керкалысь, дзиръяяссӧ.

²⁴ Видзысьяс сулалісны нёльлаын: асыввылын, рытыввылын, войвылын да лунвылын.

²⁵ Кадысь кадӧ налӧн рӧдысь видзысьяс, кодъяс олісны сиктъясын, волывлісны сизим лун кежлӧ, медым кесъявны накӧд ӧтвылысь.

²⁶ Нёль левит, кодъяс кывкутісны дзиръя видзысьяслӧн удж вӧсна, тӧждысисны Ен крамлӧн вежӧсъяс да озырлун видзанінъяс вӧсна.

²⁷ Видзысьясыс коллялісны войсӧ Енлӧн крам дорын, медым видзны крамсӧ. Асывнас найӧ восьтлісны дзиръяяссӧ.

²⁸ Кодсюрӧӧс на пӧвстысь вӧлі индӧма тӧждысьны крамын кесъялан-вӧдитчан дозмук-кӧлуй вӧсна. Найӧ арталӧмӧн вайлісны дозмук-кӧлуйсӧ, и арталӧмӧн бӧр нулісны сійӧс.

²⁹ Мукӧдсӧ на пӧвстысь вӧлі индӧма тӧждысьны вежаинса став дозмук-кӧлуй вӧсна, пызь, вина, вый, ладан да чӧскыд ӧвтанторъяс вӧсна.

³⁰ Попъяс пӧвстысь кодсюрӧ вӧчлісны-дасьтывлісны чӧскыд ӧвтанторъяс.

³¹ Маттитай нима левитӧс, Корей рӧдысь Шаллумлысь медводдза писӧ, вӧлі индӧма кывкутны нянь пӧжалӧм вӧсна.

³² Кааф рӧдысь кодсюрӧ тӧждысисны нянь вӧсна, медым быд шойччан лунӧ вайны крамӧ нянь.

³³ Левий рӧдысь сьылысьяс, кодъяс вӧліны рӧдкутысьясӧн, олісны крам вежӧсъясын. Мукӧд уджсӧ найӧ эз вӧчны, ӧд найӧ лун и вой сьылісны-кесъялісны крамын.

³⁴ Ставныс найӧ вӧліны Левий чужанкотырлӧн рӧдкутысьяс, найӧс лыддьӧдлӧма рӧдныс серти. Найӧ олісны Ерусалимын.

Саул ӧксылӧн рӧдыс

³⁵ Гаваон карлы подув пуктысь Евэл да сылӧн Маака гӧтырыс олісны Гаваонын.

³⁶ Сылӧн медводдза пиыс вӧлі Авдон, нӧшта сылӧн вӧліны Цур, Кис, Ваал, Нир, Надав,

³⁷ Гедор, Ахио, Закар да Миклот пиян.

³⁸ Миклотлӧн чужис Шимеам. Асланыс рӧдвужкӧд найӧ олісны Ерусалимын.

³⁹ Нирлӧн чужис Кис, Кислӧн – Саул, Сауллӧн чужисны Ионафан, Малкисуй, Авинадав да Эшбаал.

⁴⁰ Ионафанлӧн вӧлі Мерибал нима пи. Мерибаллӧн чужис Микей.

⁴¹ Микейлӧн вӧліны Питон, Мелек, Тарей да Ахаз пиян.

⁴² Ахазлӧн чужис Ярей, Ярейлӧн чужисны Алемет, Азмавет да Зимри. Зимрилӧн чужис Моцай,

⁴³ Моцайлӧн – Биней, Бинейлӧн – Рефай, Рефайлӧн – Элас, Эласлӧн – Ацел.

⁴⁴ Ацеллӧн вӧлі квайт пи: Азрикам, Бокру, Измаил, Шеарий, Авдий да Ханан. Ставныс найӧ вӧліны Ацеллӧн пиян.