1 Каднебӧг 5 - Коми Библия 2023

Йӧрдан юсянь асыввылын олысь чужанкотыръяс

¹ Рувим вӧлі Израильлӧн медводдза пи, но сійӧ узис аслас батьыслӧн гӧтыръяс пиысь ӧтикӧд да воштіс медводдза чужысьлысь нимсӧ. Медводдза чужысьлӧн нимыс вуджис Израильлӧн Ӧсип пиянлы.

² Иуда вӧлі медся тӧдчана аслас вокъяс пӧвстын, и сылӧн рӧдысь петіс юралысь, но медводдза чужысьлӧн нимыс вуджис эз сылы, а Ӧсиплы.

³ Рувимлӧн, Израильлӧн медводдза пилӧн, вӧліны Енок, Паллу, Хецрон да Карми пиян.

⁴ Йоильлӧн вӧлі Шемай пи, Шемайлӧн – Гог, Гоглӧн – Шимей,

⁵ Шимейлӧн – Микей, Микейлӧн – Реай, Реайлӧн – Ваал,

⁶ Вааллӧн – Бера. Ассурса Тиглатпаласар ӧксы нуӧдіс Бераӧс пленӧ. Бера вӧлі Рувим чужанкотырлӧн юралысь.

⁷ Чужанвуж гижӧдын рӧд сертиныс вӧлі лыддьӧдлӧма сылысь вокъяссӧ: рӧдкутысь Евэл, Закар

⁸ да Азазлӧн Белай пиыс. Азазлӧн батьыс вӧлі Шемай, Шемайлӧн батьыс – Йоиль. Белайлӧн рӧдыс оліс Ароэрын, налӧн муыс нюжаліс Невоӧдз да Ваал-Меонӧдз.

⁹ Асыввылын Рувимсянь чужысьяслӧн оланіныс нюжаліс овтӧминӧдз, коді помасис Ефрат ю дорын, ӧд Галаадын налӧн ыж-мӧсныс ёна рӧдмис-содіс.

¹⁰ Сауллӧн веськӧдлан кадӧ найӧ тышкасисны Агарсянь чужысьяскӧд да пасьвартісны найӧс. Асьныс пондісны овны чомъясын Галаадсянь асыввылын.

¹¹ Гадсянь чужысьяс олісны Васан муын Салка карӧдз, Рувим чужанкотырсянь рытыввылын.

¹² Васанын рӧдкутысьнас вӧлі Йоиль, сы бӧрся Шафам, сэсся Янай да Шафат.

¹³ Налӧн рӧдысь вӧліны Микаил, Мешуллам, Шевей, Иорай, Якан, Зиа да Эвер – сизим рӧдкутысь.

¹⁴ Тайӧ вӧліны Абихайллӧн пиян. Абихайллӧн батьыс вӧлі Хури, Хурилӧн – Яроах, Яроахлӧн – Галаад, Галаадлӧн – Микаил, Микаиллӧн – Ешишай, Ешишайлӧн – Яхдо, Яхдолӧн – Буз.

¹⁵ Ахи тшӧтш вӧлі рӧдкутысь. Сылӧн батьыс вӧлі Авдиэл, Авдиэллӧн – Гуни.

¹⁶ Гадсянь чужысьяс олісны Галаад да Васан муясын, тайӧ муяслӧн киподувса сиктъясын да Шарон гӧгӧрса став видз вылын.

¹⁷ Гадсянь чужысьяслысь став тайӧ нимъяссӧ вӧлі лыддьӧдлӧма чужанвуж гижӧдын иудаса Иотам ӧксылӧн да израильса Еровам ӧксылӧн веськӧдлан кадӧ.

¹⁸ Рувимсянь да Гадсянь чужысьяс пӧвстын да Манассейлӧн джын чужанкотырыс пӧвстын вӧлі нелямын нёль сюрс сизимсё квайтымын тышкаморт. Найӧ вӧліны вынаӧсь, новлӧдлісны сайӧд да шыпурт, кужисны лыйсьыны ньӧввужйысь да тышкасьны.

¹⁹ Кор найӧ уськӧдчисны Агарсянь, Етурсянь, Нафишсянь да Нодавсянь чужысьяс вылӧ,

²⁰ Енмыс отсаліс налы да сетіс налӧн киӧ Агарсянь чужысьясӧс да на дор сулалысьясӧс. Енмыс кыліс Сы вылӧ лача кутысьяслысь кевмӧмсӧ, кор найӧ тыш дырйи шыасисны Сы дінӧ.

²¹ Найӧ мырддисны вӧрӧглысь ветымын сюрс верблюдӧс, кыксё ветымын сюрс ыжӧс да кык сюрс осёлӧс, нӧшта босьтісны пленӧ сё сюрс мортӧс.

²² Унаӧс вӧлі виӧма, ӧд тышыс вӧлі Енсянь. Рувимсянь да Гадсянь чужысьяс да Манассей джын чужанкотырыс олісны вӧрӧглысь босьтӧм муын пленӧ нуӧдан кадӧдз.

²³ Манассейлӧн уна лыда джын чужанкотырыс оліс сійӧ муас, мый нюжаліс Васансянь Ваал-Ермон, Сенир да Ермон керӧсъясӧдз.

²⁴ Налӧн рӧдкутысьяснас вӧліны Эфер, Иший, Элиэл, Азриэл, Еремей, Ходавий да Яхдиэл. Ставныс найӧ вӧліны вына тышкасьысьяс, асланыс рӧдын юралысьяс.

²⁵ Но Рувимсянь да Гадсянь чужысьяс да Манассейлӧн джын чужанкотырыс эновтісны асланыс батьяслысь Енсӧ да кырсалысь ань моз сетчисны тайӧ муас олысь войтыръяслӧн енъяслы. Тайӧ войтыръяссӧ Енмыс коркӧ бырӧдіс на водзысь.

²⁶ Израильлӧн Ен ышӧдіс ассурса Пул ӧксыӧс, мӧд ногӧн кӧ, Тиглатпаласар ӧксыӧс, нуӧдны пленӧ Рувимсянь да Гадсянь чужысьясӧс да Манассейлысь джын чужанкотырсӧ. Найӧс вайӧдісны Халахӧ да Хараӧ, тшӧтш Хавор ю дорӧ да Гозанын визувтысь ю дорӧ. Найӧ ӧнӧдз на сэні олӧны.