1 Каднебӧг 4 - Коми Библия 2023

Иудасянь нӧшта чужысьяс

¹ Иудалӧн вӧліны Парес, Хецрон, Карми, Хур да Шовал нима пиян.

² Шоваллӧн вӧлі Реай пи. Реайлӧн чужис Яхат, Яхатлӧн чужисны Ахумай да Лагад. Насянь чужисны Цораын олысьяслӧн рӧдъясыс.

³ Этам карын олысьяс петісны Изреельсянь, Ишмасянь да Идбашсянь. Налӧн вӧлі Гацлелпони нима чой.

⁴ Пенуэл вӧлі Гедорлӧн бать, Эзер – Хушалӧн бать. Пенуэл да Эзер вӧліны Хурлӧн пиян. Хур, Ефрафалӧн медводдза пиыс, вӧлі тшӧтш Виплиемлӧн бать.

⁵ Ашхурлӧн, Текоялӧн батьлӧн, вӧлі кык гӧтыр: Хела да Наара.

⁶ Наара чужтіс Ашхурлы Ахузам, Хефер, Фимни да Ахаштар пиянӧс.

⁷ Хелалӧн вӧліны Церет, Цохар да Этнан пиян.

⁸ Коцлӧн чужисны Анув да Цовев пиян. Коцсянь чужис тшӧтш Харум Ахархеллӧн рӧдыс.

⁹ Аслас вокъяс дорысь Явис нималіс ёнджыка. Мамыс нимтіс сійӧс Явисӧн, ӧд шуис: «Ме сьӧкыда чужті сійӧс».

¹⁰ Явис шыасис Израильлӧн Ен дінӧ: «Енмӧй, Тэ кӧ эськӧ бурсиин менӧ да ыдждӧдін менсьым муӧс, Тэнад киыд кӧ эськӧ кутыштіс менӧ да видзис, медым лёкыс эз су менӧ!» И Енмыс мӧдӧдіс Явислы сійӧ, мый корис.

¹¹ Келувлӧн, Шух воклӧн, чужис Мехир. Мехир вӧлі Эштонлӧн бать.

¹² Эштонлӧн чужисны Бет-Рафай, Пасеах да Техиннай. Техиннай рӧдысь петісны Нахаш карын олысьяс. [Техиннай вӧлі Кенез рӧдысь Селомлӧн вок.] Найӧ вӧліны Рехаын олысьяс.

¹³ Кеназлӧн вӧліны Отниэл да Серай пиян. Отниэллӧн вӧлі Хатат нима пи.

¹⁴ Менотайлӧн чужис Офра, Серайлӧн чужис Йоав. Йоав вӧлі Ге-Харашимлӧн бать. Сысянь чужысьяс вӧліны пуысь вӧчасьысьяс.

¹⁵ Калев вӧлі Ефуннилӧн пи. Калевлӧн вӧліны Ир, Элай да Наам пиян. Элайлӧн вӧлі Кеназ нима пи.

¹⁶ Егаллеллӧн вӧліны Зиф, Зифа, Фирий да Асарел пиян.

¹⁷ Эзрайлӧн вӧліны Етер, Меред, Эфер да Ялон пиян. Етерлӧн чужисны Мирьям, Шаммай да Ишбах. Ишбах вӧлі Эштемлӧн бать.

¹⁸ Мередлӧн гӧтырыс, коді вӧлі Иуда чужанкотырысь, чужтіс Яредӧс, Хеверӧс да Екутиэлӧс. Яред вӧлі Гедорлӧн бать, Хевер – Соколӧн бать, Екутиэл – Заноахлӧн бать. Мередлы пиянӧс чужтіс тшӧтш фараонлӧн Битя нима нылыс, кодӧс Меред босьтіс гӧтырӧ.

¹⁹ Ходийлӧн гӧтырсянь, Нахамлӧн чойсянь, чужисны Кейллӧн Гарми батьыс да Маакаысь Эштем.

²⁰ Шимонлӧн вӧліны Амнон, Риннах, Бен-Ханан да Филон пиян. Ишийсянь чужисны Зохет да Зохетлӧн пиыс.

²¹ Иудалӧн вӧлі Шелай нима пи. Шелайлӧн вӧліны Ир да Лаед пиян. Ир вӧлі Лекалӧн бать, Лаед – Марешлӧн бать. Лаедсянь чужисны тшӧтш Бет-Ашбеяын олысь рӧдъяс, кодъяс кыисны вӧсни шабді дӧра.

²² Шелайлӧн вӧліны нӧшта Иоким, Йоас да Сараф пиян. Шелайсянь чужисны тшӧтш Козеваын олысьяс. Йоас да Сараф ыджыдалісны моавсаяс вылын, кодъяс олісны Лехемын. Но тайӧ вӧлі важӧн нин.

²³ Йоассянь да Сарафсянь чужысьяс вӧліны гырнич вӧчысьяс, олісны Нетаймын да Гедераын да уджалісны-кесъялісны ӧксылы.

Симеонсянь чужысьяс

²⁴ Симеонлӧн вӧліны Немуэл, Ямин, Ярив, Зерах да Саул пиян.

²⁵ Сауллӧн вӧлі Шаллум пи, Шаллумлӧн – Мивсам, Мивсамлӧн – Мишмай,

²⁶ Мишмайлӧн – Хаммуил, Хаммуиллӧн – Заккур, Заккурлӧн – Шимей.

²⁷ Шимейлӧн вӧлі дас квайт пи да квайт ныв. Шимей вокъяслӧн пияныс этша вӧлі. Симеон чужанкотыр эз вӧв сэтшӧм ыджыд, кутшӧм вӧлі Иуда чужанкотыр.

²⁸ Симеонсянь чужысьяс олісны Бер-Шеваын, Моладаын, Хацар-Шуалын,

²⁹ Билгаын, Эцемын, Фоладын,

³⁰ Бетуэлын, Хормаын, Сиклагын,

³¹ Бет-Маркавотын, Хацар-Сусаын, Бет-Бириын да Шаараимын. Давидлӧн ӧксыавтӧдз тайӧ каръясыс вӧліны налӧн.

³² Налӧн вӧліны тшӧтш вит кар – Этам, Айн, Риммон, Токен да Ашан –

³³ да Ваалӧдз нагӧгӧрса сиктъяс. Тайӧ кар-сиктас олісны Симеонсянь петӧм рӧдъяс.

³⁴ Амасейлӧн Иоша пиыс, Мешовав, Ямлек,

^35-38 Йоиль, Еху, Элионай, Яковей, Ишохай, Асай, Адиэл, Ишимиэл, Бенай да Зиз вӧліны рӧдкутысьяс. Налӧн рӧдныс ёна содіс-паськаліс. Ехулӧн батьыс вӧлі Иошив, Иошивлӧн – Серай, Серайлӧн – Асиэл. Зизлӧн батьыс вӧлі Шифий, Шифийлӧн – Аллон, Аллонлӧн – Едай, Едайлӧн – Шимри, Шимрилӧн – Шемай.

³⁹ Асланыс ыжъяслы йирсянін корсьӧм могысь найӧ ветлывлісны ковтыс асыввылӧдз, Гедор дорӧдз.

⁴⁰ Сэні найӧ аддзисны бур да пӧтӧса йирсянінъяс да паськыд муяс, кӧні йӧзыс олісны лӧня, и налы нинӧмысь вӧлі повнысӧ. Тайӧ муас воддза олысьясыс петісны Хам рӧдысь.

⁴¹ Вылынджык лыддьӧдлӧм йӧзыс локтісны тайӧ муас иудаса Езекей ӧксылӧн веськӧдлан кадӧ. Найӧ дзикӧдз бырӧдісны Хамсянь чужысьясӧс да налысь оланінъяссӧ быдлаын, кытчӧ мунісны. Асьныс овмӧдчисны налӧн оланінъясӧ, ӧд сэні вӧліны ыжъяслы йирсянінъяс.

⁴² Симеонсянь чужысьяс пӧвстысь витсё морт мунісны Сеир керӧсвыв муӧ. Наӧн веськӧдлісны Ишийлӧн Пелатий, Неарий, Рефай да Узиэл пиян.

⁴³ Найӧ виалісны сэні олысь коляс амалик войтырӧс и асьныс ӧніӧдз сэні олӧны.