1 Каднебӧг 27 - Коми Библия 2023

Тышкайӧзлӧн юралысьяс

¹ Тані лыддьӧдлӧма Израиль войтырлысь рӧдкутысьяссӧ, тышкайӧзлысь юралысь-веськӧдлысьяссӧ да ӧксылы кесъялысь чина йӧзӧс, кодъяс кывкутісны тышкакотыръяс вӧсна. Быд тышкакотыр кесъяліс ӧти тӧлысь чӧж. Быд котырын вӧлі кызь нёль сюрс морт.

² Медводдза тӧлысьнас кесъялысь тышкакотырӧн веськӧдліс Яшовам, Завдиэллӧн пиыс. Сылӧн тышкакотырын вӧлі кызь нёль сюрс морт.

³ Сійӧ вӧлі Парес рӧдысь. Медводдза тӧлысьнас сійӧ вӧлі тышкайӧзӧн став веськӧдлысьяс вылын юралысьӧн.

⁴ Мӧд тӧлысьнас кесъялысь тышкакотырӧн веськӧдліс Ахоах рӧдысь Додай. Сылӧн тышкакотырын вӧлі кызь нёль сюрс морт. Сыкӧд тшӧтш мӧд веськӧдлысьнас вӧлі Миклот.

⁵ Коймӧд тӧлысьнас кесъялысь тышкакотырӧн веськӧдліс Бенай, Иодай аркирейлӧн пиыс. Сылӧн тышкакотырын вӧлі кызь нёль сюрс морт.

⁶ Бенай вӧлі комын медтӧдчана веськӧдлысь пӧвстысь и вӧлі налӧн юралысьӧн. Сылӧн тышкакотырын кесъяліс Аммизавад пиыс.

⁷ Нёльӧд тӧлысьнас веськӧдліс Асаил, Йоавлӧн вокыс. Сылӧн тышкакотырын вӧлі кызь нёль сюрс морт. Асаиллӧн кулӧм бӧрын веськӧдлысьнас лои сылӧн Зевадай пиыс.

⁸ Витӧд тӧлысьнас веськӧдліс Израхысь Шамхут. Сылӧн тышкакотырын вӧлі кызь нёль сюрс морт.

⁹ Квайтӧд тӧлысьнас веськӧдліс Текояысь Ир, Икешлӧн пиыс. Сылӧн тышкакотырын вӧлі кызь нёль сюрс морт.

¹⁰ Сизимӧд тӧлысьнас веськӧдліс Пелонысь Хелец, коді вӧлі Ефрем чужанкотырысь. Сылӧн тышкакотырын вӧлі кызь нёль сюрс морт.

¹¹ Кӧкъямысӧд тӧлысьнас веськӧдліс Хушаысь Сиббекай, коді вӧлі Зерах рӧдысь. Сылӧн тышкакотырын вӧлі кызь нёль сюрс морт.

¹² Ӧкмысӧд тӧлысьнас веськӧдліс Анатотысь Авиэзер, коді вӧлі Венямин чужанкотырысь. Сылӧн тышкакотырын вӧлі кызь нёль сюрс морт.

¹³ Дасӧд тӧлысьнас веськӧдліс Нетофаысь Махрай, коді вӧлі Зерах рӧдысь. Сылӧн тышкакотырын вӧлі кызь нёль сюрс морт.

¹⁴ Дас ӧтиӧд тӧлысьнас веськӧдліс Пиратонысь Бенай, коді вӧлі Ефрем чужанкотырысь. Сылӧн тышкакотырын вӧлі кызь нёль сюрс морт.

¹⁵ Дас кыкӧд тӧлысьнас веськӧдліс Нетофаысь Хелдай, коді вӧлі Отниэл рӧдысь. Сылӧн тышкакотырын вӧлі кызь нёль сюрс морт.

Чужанкотыръяслӧн юралысьяс

¹⁶ Тані лыддьӧдлӧма израильса чужанкотыръяслысь юралысьяссӧ. Рувим чужанкотырын юралысьнас вӧлі Зикрилӧн Элизер пиыс, Симеон чужанкотырын – Мааклӧн Шефатай пиыс,

¹⁷ Левий чужанкотырын – Кемуэллӧн Хашавий пиыс, Аарон рӧдын – Садок,

¹⁸ Иуда чужанкотырын – Давидлӧн Элиав вокыс, Иссакар чужанкотырын – Микаиллӧн Омри пиыс,

¹⁹ Завулон чужанкотырын – Овадийлӧн Ишмай пиыс, Неффалим чужанкотырын – Азриэллӧн Еримот пиыс,

²⁰ Ефрем чужанкотырын – Азазийлӧн Осий пиыс, Манассейлӧн джын чужанкотырыслӧн юралысьнас вӧлі Педайлӧн Йоиль пиыс,

²¹ Манассейлӧн джын чужанкотырыслӧн, Галаадын олысьяслӧн, юралысьнас вӧлі Закарлӧн Иддо пиыс, Венямин чужанкотырын – Авенирлӧн Ясиэл пиыс,

²² Дан чужанкотырын – Ерохамлӧн Азарэл пиыс. Тайӧ вӧліны Израиль чужанкотыръяслӧн юралысьяс.

²³ Давид эз лыддьы кызь арӧсаясӧс да наысь томджыкъясӧс, ӧд Господьлӧн кӧсйысьӧм серти Израиль войтырлӧн лыдыс вӧлі енэжвыв кодзувъяс мында.

²⁴ Саруялӧн Йоав пиыс пондыліс артавны Израиль войтырлысь лыдсӧ, но эз вермы помавны, ӧд Израиль войтырӧс суис Енлӧн скӧрлуныс. Та вӧсна Давид ӧксылӧн небӧгӧ абу вӧлі гижӧма войтырлысь лыдсӧ.

Ӧксылӧн овмӧс вӧсна кывкутысьяс

²⁵ Ӧксылӧн озырлун видзанінъяс вӧсна кывкутіс Азмавет, Адиэллӧн пиыс. Мукӧд видзанінъяс вӧсна, кодъяс вӧліны видз-му вылын, каръясын, сиктъясын да изкаръясын, кывкутіс Ионафан, Озейлӧн пиыс.

²⁶ Видз-му вылын уджалысьясӧн веськӧдліс Эзри, Келувлӧн пиыс.

²⁷ Виноград йӧръяс вӧсна кывкутіс Рамаысь Шимей, а вина видзанінъяс вӧсна – Шефамысь Завдий.

²⁸ Керӧсбердса муын олив да инжир быдтӧм вӧсна кывкутіс Гедерысь Баал-Ханан, а олив вый видзанінъяс вӧсна – Йоас.

²⁹ Шаронын йирсьысь ӧш-мӧс вӧсна кывкутіс шаронса Шитрай, а ковтысын йирсьысь ӧш-мӧс вӧсна кывкутіс Адлайлӧн Шафат пиыс.

³⁰ Верблюдъяс вӧсна кывкутіс Измаилсянь чужысь Овил, осёлъяс вӧсна – Меронотысь Ехдей,

³¹ а ыжъяс вӧсна кывкутіс Агарсянь чужысь Язиз. Став тайӧ йӧзыс веськӧдлісны Давид ӧксылӧн овмӧсӧн.

Ӧксыӧс туйдӧдысьяс

³² Давидлӧн туйдӧдысьӧн вӧлі сылӧн Ионафан дядьыс. Сійӧ вӧлі гижалысь, сюсь вежӧра морт. Хакмонилӧн Ехиэл пиыс вӧлі ӧксылысь пиянсӧ велӧдысь.

³³ Ахитофел вӧлі ӧксыӧс туйдӧдысь. Аркиысь Хушай вӧлі ӧксылӧн ёрт.

³⁴ Ахитофеллӧн кулӧм бӧрын ӧксыӧс туйдӧдысьясӧн вӧліны Бенайлӧн Иодай пиыс да Авиатар. Йоав вӧлі ӧксы тышкайӧзлӧн юралысь.