1 Каднебӧг 23 - Коми Библия 2023

¹ Кор Давид пӧрысьмис да пӧтіс олан лунъяснас, сэки пуктіс ассьыс Соломон писӧ Израиль войтырлы ӧксыӧ.

Левитъяс да налӧн кесъялӧм

² Давид чукӧртіс Израиль войтырлысь юралысьяссӧ, попъясӧс да левитъясӧс.

³ Вӧлі арталӧма-гижалӧма комын арӧса да ыджыдджык арлыда левитъясӧс. Налӧн лыдыс вӧлі комын кӧкъямыс сюрс морт.

⁴ На пӧвстысь вӧлі индӧма кесъявны Господьлӧн крамын кызь нёль сюрс мортӧс, квайт сюрс мортӧс вӧлі индӧма лоны гижалысьясӧн да ёрдысьясӧн.

⁵ Нёль сюрс мортӧс вӧлі индӧма видзны крам дзиръяяс, нёль сюрс мортӧс – ворсанторъясӧн ошкыны Господьӧс. Та могысь и Давид тшӧктіс вӧчны ворсанторъяссӧ.

⁶ Давид юкліс левитъясӧс куим чукӧр вылӧ Левийлӧн Гирсон, Кааф да Мерари пияныс серти.

⁷ Гирсонлӧн вӧліны Лаедан да Шимей пиян.

⁸ Лаеданлӧн вӧлі куим пи: рӧдкутысь Ехиэл, Зетам да Йоиль.

⁹ Шимейлӧн куим пиыс – Шеломот, Хазиэл да Харан – вӧліны Лаедансянь чужысьяслӧн рӧдкутысьяс.

¹⁰ Шимейлӧн вӧлі нӧшта нёль пи: Яхат, Зиз, Еуш да Берий.

¹¹ Яхат вӧлі рӧдкутысь, Зиз тшӧтш вӧлі рӧдкутысь. Еушлӧн да Берийлӧн пияныс вӧлі этша, та вӧсна найӧс лыддисны ӧти котырӧн.

¹² Каафлӧн вӧлі нёль пи: Амрам, Ицгар, Хеврон да Узиэл.

¹³ Амрамлӧн вӧліны Аарон да Мӧисей пиян. Ааронӧс да сылысь пиянсӧ вӧлі вежӧдӧма, медым найӧ вӧліны вежасьыс-вежаӧсь, да пыр кежлӧ торйӧдӧма, медым найӧ сотісны висьяс Господь водзын, кесъялісны Сылы да бурсиисны Сылӧн нимӧн.

¹⁴ Мӧисей вӧлі Енлӧн морт. Сысянь чужысьяс вӧліны левитъяс.

¹⁵ Мӧисейлӧн вӧліны Гершом да Элизер пиян.

¹⁶ Гершомлӧн вӧлі Шевуэл нима пи, рӧдкутысь.

¹⁷ Элизерлӧн вӧлі Рехавий нима пи, рӧдкутысь. Элизерлӧн сэсся эз вӧв пияныс, а Рехавийлӧн вӧлі уна пи.

¹⁸ Ицгарлӧн вӧлі Шеломот нима пи, рӧдкутысь.

¹⁹ Хевронлӧн пиянысь Ерий вӧлі рӧдкутысь, мӧд пиыс вӧлі Амарей, коймӧдыс – Яхазиэл, нёльӧдыс – Екамам.

²⁰ Узиэллӧн пиянысь Микей вӧлі рӧдкутысь, мӧд пиыс вӧлі Ишший.

²¹ Мерарилӧн вӧліны Махли да Муши пиян. Махлилӧн вӧліны Элазар да Кис пиян.

²² Элазар куліс, но сылӧн эз вӧвны пияныс, вӧліны сӧмын нывъяс. Налӧн воча вокъясыс, Кислӧн пияныс, босьтісны найӧс гӧтырӧ.

²³ Мушилӧн вӧлі куим пи: Махли, Эдер да Еремот.

²⁴ Тайӧ вӧліны Левийсянь чужысьяс, кодъясӧс лыддьӧдлӧма нимъяснаныс асланыс рӧдныс да рӧдкутысьныс серти. Найӧ кесъялісны Господьлӧн крамын кызь арӧссянь.

²⁵ Давид шуис: «Господь, Израильлӧн Ен, сетіс Аслас войтырлы лӧнь олӧм, Сійӧ пыр кежлӧ овмӧдчис Ерусалимӧ.

²⁶ Левитъяслы оз нин ков новлӧдлыны вежа чом да сэні кесъялан дозмук-кӧлуй».

²⁷ Давидлӧн бӧръя тшӧктӧмыс серти вӧлі лыддьӧдлӧма став левитсӧ, кодъяслы вӧлі кызь арӧс да унджык.

²⁸ Левитъяслы колӧ вӧлі отсасьны Ааронсянь чужысьяслы Господьлӧн крамын кесъялӧм дырйи, тӧждысьны крам йӧръяс да вежӧсъяс вӧсна, став вежаторсӧ сӧстӧммӧдӧм вӧсна да Енлӧн крамын кесъялӧм вӧсна.

²⁹ Найӧ кывкутісны вежа нянь вӧсна, нянь вись пыдди ваян шобді пызь вӧсна, шомтӧм сӧчӧнъяс, пӧжалӧм нянь да шомӧс вӧсна, тшӧтш ставсӧ мурталӧм-веситӧм вӧсна.

³⁰ Быд асыв да рыт налы колӧ вӧлі аттьӧавны-ошкыны Господьӧс.

³¹ Налы колӧ вӧлі пыр вайны Господьлы сотан висьяс шойччан лунӧ, выль тӧлысь чужигӧн да гажӧдчан лунъяс дырйи. Быд пӧрйӧ Ен водзын колӧ вӧлі кесъявны сы мында левитлы, мыйта вӧлі шуӧма.

³² Налы колӧ вӧлі видзны вежа чом да вежаин, колӧ вӧлі отсасьны Ааронсянь чужысьяслы, асланыс вокъяслы, Господьлӧн крамын кесъялӧм дырйи.