1 Каднебӧг 22 - Коми Библия 2023

¹ Давид шуис: «Тані лоӧ Господь Енлӧн керкаыс, тайӧ висьпуктанін вылас Израиль войтыр кутасны сотны висьяс».

Давид тшӧктӧ пиыслы лэптыны крам

² Давид тшӧктіс чукӧртны ставнысӧ, кодъяс локтісны йӧз муысь да овмӧдчисны Израиль муӧ. Сійӧ пуктіс найӧс керавны-перйыны изъяс Енлысь крамсӧ лэптӧм вылӧ.

³ Давид дасьтіс дзиръяяслы кӧрттув-потш вӧчӧм могысь уна кӧрт, дасьтіс тшӧтш сы мында ыргӧн, мый эз позь веситнысӧ.

⁴ Нӧшта Давид дасьтіс лыдтӧм-тшӧттӧм сус пу керъяс, ӧд Сидонын да Тирын олысьяс вайисны сылы сус пу керсӧ лышкыда.

⁵ Давид шуис: «Менам Соломон пиӧй том на, сылӧн абу на сямлуныс, а крамыс, мый колӧ вӧчны Господьлы, мед лоӧ медся мичаӧн, ошканаӧн да нималанаӧн став му пасьталаыс. Та вӧсна ме ставсӧ дасьта крам вӧчӧм вылӧ». Аслас кувтӧдз Давид унатор дасьтіс крам вӧчӧм вылӧ.

⁶ Давид корис Соломон писӧ да тшӧктіс сылы лэптыны крам Господьлы, Израильлӧн Енлы.

⁷ Давид шуис Соломонлы: «Пиӧй, ме ачым кӧсйи лэптыны крам Господьлы, менам Енлы.

⁸ Но меным вӧлі Господьсянь кыв: ”Ыджыд тышъяс дырйи тэ кисьтін уна вир. Тэ он лэпты Меным крамсӧ, ӧд Менам син водзын му вылӧ тэ кисьтін уна вир.

⁹ Но тэнад чужас пи, сійӧ лоас лӧня олысь морт. Ме доръя сійӧс став кытшалысь вӧрӧгысь. Сылӧн нимыс лоӧ Соломон, сылӧн веськӧдлан кадӧ Ме сета Израильлы лӧнь олӧм да шойччӧг.

¹⁰ Сійӧ лэптас Меным крам, и сійӧ лоӧ Меным пиӧн, а Ме лоа сылы Батьӧн. Ме пыр кежлӧ вынсьӧда сылысь юралӧмсӧ Израильын”.

¹¹ Господь мед лоас тэкӧд, пиӧй! Сэки тэнад ставыс артмас, и тэ лэптан крам Господьлы, аслад Енлы, Сылӧн водзвыв висьталӧмыс серти.

¹² Господь мед сетас тэныд мывкыдлун да вежӧр, Сійӧ мед сувтӧдас тэнӧ веськӧдлыны Израиль войтырӧн, а тэ ставсӧ вӧч аслад Господь Енлӧн Индӧд серти.

¹³ Тэ кӧ кутан овны индӧд-тшӧктӧмъяс серти, мый Господь сетіс Израиль войтырлы Мӧисей пыр, сэки тэнад ставыс артмас. Ло зумыд да повтӧм! Эн пов, эн майшась!

¹⁴ Сьӧкыдлунъяс вылӧ видзӧдтӧг ме дасьті Господьлысь крамсӧ вӧчӧм вылӧ сё сюрс талант зарни да миллион талант эзысь, а ыргӧнсӧ да кӧртсӧ ме дасьті сы мында, мый веситнысӧ он вермы. Ме дасьті керъяс да изъяс, но тэ чукӧрт нӧшта на унджык.

¹⁵ Тэнад эм уна уджалысь, на пӧвстын эмӧсь из кералысьяс, изйысь да пуысь вӧчасьысьяс да уна мукӧд киподтуя йӧз.

¹⁶ Тэнад эм лыдтӧм-тшӧттӧм зарни, эзысь, ыргӧн да кӧрт. Босьтчы уджӧ, Господь лоӧ тэкӧд».

¹⁷ Израиль войтырлӧн став юралысьыслы Давид тшӧктіс отсавны аслас Соломон пилы.

¹⁸ Давид шуис: «Господь, тіян Енныд, тіянкӧд. Сійӧ быдлаын сетіс тіянлы лӧнь олӧм. Сійӧ сетіс менам кипод улӧ тайӧ муас олысьясӧс, и тайӧ муас юралӧ Господь да Сылӧн войтырыс.

¹⁹ Сідзкӧ, став сьӧлӧмсяньныд да став олӧмнаныд корсьысьӧй Господьӧс, ассьыныд Ентӧ. Лэптӧй Господь Енлы вежаин, нуӧй сэтчӧ Господьлысь Йитӧд кудсӧ да Енлы кесъялан вежа дозмук-кӧлуйсӧ. Крамсӧ сиӧй Господьлы».