1 Каднебӧг 21 - Коми Библия 2023

Господь мыждӧ Давидӧс войтырсӧ лыддьӧмысь

¹ Сӧтана кыпӧдчис Израильлы паныд да ыззьӧдіс Давидӧс артавны Израиль войтырлысь лыдсӧ.

² Давид шуис Йоавлы да Израиль войтырлӧн мукӧд юралысьяслы: «Мунӧй да арталӧй лунвыв Бер-Шевасянь войвыв Данӧдз Израиль войтырлысь лыдсӧ, сэсся юӧртӧй меным».

³ Йоав шуис Давидлы: «Господь мед сё пӧвстӧн содтас Аслас войтырлысь лыдсӧ. Ӧксыӧй-ыджыдӧй, найӧ ӧд ставныс тэнад кесйӧгъяс. Ыджыдӧй, мыйла тэ кӧсъян лыддьыны найӧс? Тайӧ мыжыс ӧд лоӧ Израиль вылын».

⁴ Но Йоавлы колӧ вӧлі вӧчны ӧксылӧн тшӧктӧм серти. Сійӧ муніс, кытшовтіс Израиль му да бӧр локтіс Ерусалимӧ.

⁵ Йоав юӧртіс Давидлы войтырлысь лыдсӧ. Вӧлӧмакӧ, Израильын миллион сё сюрс морт, кодъяс вермӧны тышӧ петны, а Иудаын – нёльсё сизимдас сюрс морт.

⁶ Левий чужанкотырысь да Венямин чужанкотырысь йӧзсӧ Йоав эз лыддьы, ӧд ӧксылӧн тшӧктӧмыс вӧлі мустӧм сылы.

⁷ Енмыслы шогмытӧм вӧлі йӧзсӧ лыддьӧмыс, и Сійӧ мыждіс Израильӧс.

⁸ Давид шуис Енлы: «Ме, Тэнад кесйӧг, мыжа сыысь, мый лыдди войтырӧс. Кора Тэнӧ, вешты ме вылысь мыжӧс. Ме мывкыдтӧг вӧчи».

⁹ Господь шуис Гадлы, Давидлӧн тӧдысь-аддзысьлы:

¹⁰ «Мун да юӧрт Давидлы, мый Господь тадзи висьталӧ: куим мыждӧм Ме вӧзъя тэныд. Мый бӧръян, сійӧс Ме и вӧча».

¹¹ Гад локтіс Давид дінӧ да шуис: «Господь тадзи висьталӧ: ”Бӧрйы.

¹² Лоас-ӧ куим во чӧж тшыгъялӧм? Кутан-ӧ тэ куим тӧлысь чӧж пышъявны вӧрӧгъясысь, кодъяс шыпуртӧн пондасны вӧтлысьны тэ бӧрся? Либӧ кутас-ӧ куим лун чӧж тэнад муын ыджыдавны пӧрӧс висьӧм – Господьлӧн шыпуртыс дойдас Израиль войтырӧс, кор Господьлӧн анделыс кутас бырӧдны найӧс Израиль му пасьтала?” Мӧвпышт да шу меным, мый висьтавны менӧ Мӧдӧдысьлы».

¹³ Давид шуис Гад пророклы: «Ыджыд шог суис менӧ. Но морт киӧ веськалӧм дорысь бурджык шедны Господьлӧн мыждӧм улӧ, ӧд Сылӧн буралӧмыс зэв ыджыд».

¹⁴ Господь ыстіс Израиль войтырлы пӧрӧс висьӧм. Куліс сизимдас сюрс морт.

¹⁵ Енмыс мӧдӧдіс анделӧс, медым бырӧдны Ерусалим. Кор андел пондіс бырӧдны йӧзсӧ, Господь видзӧдліс Ерусалим вылӧ да вежис кывсӧ. Сійӧ шуис бырӧдысь анделлы: «Тырмас. Вешты китӧ». Господьлӧн анделыс сэки сулаліс евусса Орнанлӧн гумла дорын.

¹⁶ Давид лэптіс синсӧ да аддзис Господьлысь анделсӧ, коді сулаліс енэжа-муа костас. Киас сійӧ кутіс перйӧм шыпурт. Шыпуртсӧ вӧлі нюжӧдӧма Ерусалимлань. Давид да израильса юрнуӧдысьяс усисны чужӧм выланыс. Найӧ вӧлі пасьтасьӧмаӧсь шогалан паськӧмӧ.

¹⁷ Давид шуис Енмыслы: «Войтырыслысь лыдсӧ тшӧкті лыддьыны-артавны ме. Ме мыжаыс. Ме вӧчи та ыджда лёкторсӧ, а тайӧ ыжъясыс абу мыжаӧсь. Господьӧй Енмӧй, мыжды менӧ да менсьым рӧдӧс, но Ассьыд войтыртӧ эн бырӧд!»

¹⁸ Гад пророк пыр Господьлӧн анделыс тшӧктіс Давидлы мунны евусса Орнанлӧн гумла вылӧ да сувтӧдны сэтчӧ Господьлы висьпуктанін.

¹⁹ Давид муніс, медым вӧчны Гадлӧн шуӧм серти, мый сійӧ висьталіс Господь нимсянь.

²⁰ Орнан аслас нёльнан пиыскӧд вӧлі вартӧ-изӧ шобдісӧ гумла вылын. Орнан бергӧдчис да аддзис анделӧс. Орнанлӧн пияныс дзебсисны.

²¹ Давид локтіс Орнан дінӧ. Давидӧс аддзигӧн Орнан петіс гумла вывсьыс да муӧдзыс копыртчис Давидлы.

²² Давид шуис Орнанлы: «Вузав меным гумлатӧ сійӧ донсьыс, мыйта сійӧ сулалӧ. Ме сувтӧда сэтчӧ Господьлы висьпуктанін, медым Господь вештас войтырыс вылысь кулана висьӧмсӧ».

²³ Орнан шуис: «Ӧксыӧй-ыджыдӧй, босьт аслыд ставсӧ да вӧч, мый кӧсъян. Ассьым ӧшъясӧс ме сета сотан вись пыдди, доддьӧс – пес пыдди, шобдіӧс – нянь вись пыдди. Ставсӧ ме сета тэныд».

²⁴ Но Давид ӧксы шуис Орнанлы: «Ог босьт, ме ньӧба. Ме ог вермы вайны Господьлы сійӧ, мый абу менам, ог вермы вайны вись пыдди сійӧ, мыйысь эг вештысь».

²⁵ Гумлаысь Давид сетіс Орнанлы квайтсё сикель зарни.

²⁶ Сэсся гумла вылас вӧчис Господьлы висьпуктанін да сы вылын вайис сотан да бурасян висьяс. Давид шыасис Господь дінӧ, и Господь вочавидзис сылы да висьпуктанін вылӧ ыстіс енэжсянь би.

²⁷ Господьлӧн тшӧктӧм серти андел бӧр сюйис шыпуртсӧ пуртӧсас.

²⁸ Кор Давид аддзис, мый евусса Орнанлӧн гумла вылын Господь кыліс сійӧс, водзӧ сэні кутіс вайны Господьлы вись.

²⁹ Сійӧ кадас Господьлӧн вежа чомйыс, кодӧс Мӧисей вӧчис овтӧминын, да сотан висьяслы висьпуктаніныс вӧліны гаваонса ыб вылын.

³⁰ Давид эз вермы мунны сэтчӧ, медым шыасьны Енмыс дінӧ, ӧд Господьлӧн шыпурта анделыс ёна повзьӧдіс сійӧс.