1 Каднебӧг 20 - Коми Библия 2023

¹ Во мысти, буретш сійӧ кадӧ, кор ӧксыяс петавлӧны тышӧ, Йоав уськӧдчис израильса тышкайӧзкӧд аммон войтыр вылӧ. Сійӧ бырӧдіс-пазӧдіс аммон войтырлысь мусӧ, кытшаліс Равва кар да пасьвартіс сійӧс. А Давид тайӧ кадас вӧлі Ерусалимын.

² Давид босьтіс аммон войтырлӧн ӧксы юр вылысь зарни юркытшсӧ да пуктіс аслас юр вылӧ. Юркытшлӧн сьӧктаыс вӧлі ӧти талант. Сійӧс вӧлі мичмӧдӧма дона изъясӧн. Уна озырлун Давид петкӧдіс Равва карысь.

³ Карса олысьясӧс тшӧтш петкӧдіс. Сійӧ сьӧкыда уджӧдіс найӧс: ӧтияс уджалісны чер-пилаӧн, мӧдъяс – кӧрт коканӧн. Тадзи Давид вӧчис аммон войтырлӧн быд карын, а сэсся аслас тышкайӧзкӧд бӧр локтіс Ерусалимӧ.

Филистимсаяскӧд тыш

⁴ Бӧрынджык Гезерын вӧлі филистимсаяскӧд тыш, кӧні Хушаысь Сиббекай виис Рефай рӧдысь Сиппай нима мортӧс. Филистимсаясӧс вӧлі вермӧма.

⁵ Сэсся вӧлі филистимсаяскӧд мӧд тыш. Яирлӧн Элханан пиыс виис гефса Голиафлысь Лахми воксӧ. Голиафлӧн шы беддьыс вӧлі шӧрт гартан юранӧш кодь кыз.

⁶ Гефын тшӧтш пансис тыш. Сэні вӧлі зэв ыджыд тушаа морт, сійӧ тшӧтш вӧлі Рефай рӧдысь. Сылӧн быд ки-кокын вӧлі квайт чунь – ставнас вӧлі кызь нёль чунь.

⁷ Тайӧ мортыс омӧльтіс израильсаясӧс, но Давидлӧн Шимей вокыслӧн Ионафан пиыс виис сійӧс.

⁸ Давид да сылӧн йӧзыс виисны Рефай рӧдысь тайӧ гефсаяссӧ.