1 Каднебӧг 18 - Коми Библия 2023

Давидлӧн вермӧмъяс

¹ Кад мысти Давид пасьвартіс филистимсаясӧс, босьтіс налысь Геф кар да сыгӧгӧрса сиктъяс. Филистимсаяс шедісны Давидлӧн кипод улӧ.

² Давид пасьвартіс тшӧтш моавсаясӧс. Найӧ лоисны Давидлы кесйӧгъясӧн, мынтісны сылы вот.

³ Давид пасьвартіс и цова-хаматса Ададезер ӧксыӧс, коді буретш вӧлі мунӧ, медым босьтны Ефрат ю дорысь муяссӧ.

⁴ Давид босьтіс сылысь сюрс тарантас, сизим сюрс верзьӧмаӧс да кызь сюрс подаӧс. Давид кольӧдіс аслыс тарантаса сё вӧлӧс, а мукӧд вӧлыслысь сӧнсӧ сійӧ вундаліс.

⁵ Цоваса Ададезер ӧксылы отсӧг вылӧ локтісны Дамаскысь арамейяс. Но Давид пасьвартіс найӧс, виис кызь кык сюрс мортӧс.

⁶ Дамаскӧ Давид сувтӧдаліс ассьыс тышкакотыръяссӧ. Тадзи арамейяс шедісны Давидлӧн кипод улӧ да кутісны мынтыны сылы вот. Господь быд тышын отсаліс Давидлы вермыны.

⁷ Давид босьтіс Ададезер тышкайӧзлысь зарни сайӧдъяссӧ да вайис Ерусалимӧ.

⁸ Тивхатысь да Кунысь, Ададезерлӧн каръясысь, Давид вайис зэв уна ыргӧн. Сыысь Соломон вӧчӧдіс вайӧртӧд, сюръяяс да дозмук-кӧлуй.

⁹ Хаматса Тойи ӧксылы кывсис, мый Давид кушӧдз пасьвартӧма цоваса Ададезер ӧксылысь тышкайӧзсӧ.

¹⁰ Сэки сійӧ мӧдӧдіс ассьыс Адорам писӧ Давид ӧксы дінӧ, мед чолӧмавны да аттьӧавны сійӧс Ададезерӧс вермӧмысь. Ӧд Ададезер дугдывтӧг тышкасис Тойикӧд. Аскӧдыс Адорам вайис эзысь, зарни да ыргӧн дозъяс.

¹¹ Давид ӧксы вежӧдіс-торйӧдіс найӧс Господьлы. Нӧшта сиис Господьлы мукӧд войтыръяслысь босьтӧм эзысь да зарни. Эзысь-зарнисӧ сійӧ босьтіс эдом, моав, аммон, филистим да амалик войтыръяслысь.

¹² Саруялӧн Авишай пиыс пасьвартіс Сола ковтысын дас кӧкъямыс сюрс эдомса тышкамортӧс.

¹³ Став Эдом пасьтала сійӧ сувтӧдаліс тышкакотыръяс. Эдомсаяс шедісны Давидлӧн кипод улӧ. Господь быд тышын отсаліс Давидлы вермыны.

¹⁴ Давид ӧксыаліс став Израиль муын. Ассьыс войтырсӧ мыждігӧн сійӧ быдӧнкӧд вӧлі веськыд.

¹⁵ Саруялӧн Йоав пиыс веськӧдліс Давидлӧн тышкайӧзӧн, Ахилудлӧн Иосафат пиыс пасъяліс небӧгӧ вӧвлӧмторъяс.

¹⁶ Ахитувлӧн Садок пиыс да Авиатарлӧн Ахимелек пиыс вӧліны попъясӧн, Шавшай вӧлі гижалысьӧн.

¹⁷ Иодайлӧн Бенай пиыс веськӧдліс ӧксыӧс видзысь керетса да пелетса шыпуртаясӧн. Давид ӧксылӧн ыджыдджык пияныс отсасисны сылы юралӧмын.