1 Каднебӧг 16 - Коми Библия 2023

¹ Енлысь кудсӧ вайисны да пуктісны Давидӧн сувтӧдӧм чом шӧрӧ. Та бӧрын вайисны Енлы сотан да бурасян висьяс.

² Вись вайӧм бӧрын Давид бурсиис войтырсӧ Господь нимӧн.

³ Чукӧртчӧм став Израиль войтырлы, быд айловлы да аньлы, сетіс нянь, пражитӧм яйтор да изюм.

⁴ Давид сувтӧдіс левитъясӧс кесъявны Господьлӧн кудйыс водзын: сьывны-ошкыны, аттьӧавны да ыдждӧдлыны Господьӧс, Израильлысь Енсӧ.

⁵ Сьылысьясӧн веськӧдліс Асаф, а Закар отсасис сылы. Евэл, Шемирамот, Ехиэл, Маттитай, Элиав, Бенай, Овед-Эдом да Евэл ворсісны арфаӧн да гуслиӧн. Асаф ворсіс кимвалӧн.

⁶ Бенай да Яхазиэл попъясӧс вӧлі сувтӧдӧма, медым найӧ дугдывтӧг ворсісны трубаӧн Енлӧн Йитӧд куд водзын.

⁷ Сійӧ лунӧ Давид медводдзаысь пуктіс Асафӧс да сылысь вокъяссӧ, медым найӧ сьылӧмӧн ошкисны Господьӧс.

Господьӧс ошкӧм

⁸ – Ошкӧй Господьӧс, шыасьӧй Сы дінӧ, войтыръяс пӧвстын висьтавлӧй Сылӧн уджъясыс йылысь!

⁹ Сьылӧй Сылы, ошкӧй Сійӧс, висьтавлӧй Сылӧн шензьӧдана уджъясыс йылысь!

¹⁰ Ошйысьӧй Сылӧн вежа нимнас! Господьӧс корсьысьлӧн мед нимкодясяс сьӧлӧмыс!

¹¹ Корсьӧй Господьӧс да Сылысь вынсӧ, дугдывтӧг корсьӧй Сылысь чужӧмбансӧ.

^12-13 Ті, Израильсянь чужысьяс, Господьлӧн кесйӧгъяс, Яковлӧн пиян, Господьлӧн бӧрйӧмаяс, энӧ вунӧдӧй Сылысь шензьӧданаторъяссӧ, индысьпасъяссӧ да веськыда мыждӧмсӧ.

¹⁴ Сійӧ – Господь, миян Енным, Сійӧ веськыда мыждӧ став му пасьтала.

¹⁵ Некор энӧ вунӧдӧй Сылысь тіянкӧд кӧрталӧм йитӧдсӧ, Сылысь кывсӧ, мый Сійӧ пыр кежлӧ сетіс водзӧ чужысьяслы.

¹⁶ Энӧ вунӧдӧй Сылысь Ӧвраамкӧд кӧрталӧм йитӧдсӧ, Исааклы сетӧм кывсӧ.

¹⁷ Яковлы Сійӧ вынсьӧдіс Ассьыс кывсӧ, Израилькӧд йитӧдсӧ кӧрталіс пыр кежлӧ.

¹⁸ Сійӧ шуис: «Ме сета тэныд Ханаан му, вичмӧда сійӧс тэныд».

¹⁹ Сэки Израиль войтырлӧн лыдыс вӧлі этша на, Ханаан муын найӧ вӧліны локтысь йӧзӧн.

²⁰ Ӧти войтырсянь найӧ вуджлісны мӧд войтыр дінӧ, ӧти муысь – мӧд муӧ.

²¹ Господь некодлы эз лэдз дзескӧдны найӧс, Сійӧ ӧлӧдліс ӧксыясӧс:

²² «Энӧ вӧрӧдӧй Менсьым мавтыштӧмаясӧс, Менам пророкъяслы энӧ вӧчӧй лёксӧ».

²³ Му вылын олысьяс, сьылӧй Господьлы! Лунысь-лун юӧртӧй, мый Сійӧ мездӧ.

²⁴ Висьтавлӧй войтыръяслы Сылӧн дзирдлуныс йылысь, быд войтырлы – Сылӧн шензьӧдана уджъясыс йылысь.

²⁵ Ошкӧй Господьӧс, ӧд Сійӧ ыджыд, мукӧд енмыс дорысь медъёна Сыысь колӧ повны.

²⁶ Войтыръяслӧн енъясыс – идолъяс, а Господь енэжъяс вӧчис.

²⁷ Сылӧн эм ыджыдалӧм да дзирдлун, Сылӧн вежаинын – вын да нимкодьлун.

²⁸ Войтыръяс, кыпӧдӧй ошкӧм Господьлы, ошкӧй-нимӧдӧй Господьӧс,

²⁹ ошкӧй Господьлысь нимсӧ, локтӧй Сы водзӧ, вайӧй Сылы козинъяс, копыртчӧй Господьлы Сылӧн мича вежаинын!

³⁰ Му вылын олысьяс, полӧй-тіралӧй Сыысь! Муюгыдыс сулалӧ зумыда, сійӧ оз вӧрзьыв.

³¹ Мед гажӧдчас енэжыс, мед нимкодясяс муыс, мед шуасны войтыръяс пӧвстын: «Господь ӧксыалӧ!»

³² Мед шызяс саридзыс да став сэні олысьыс, мед нимкодясяс видз-муыс да ставыс, мый сэні эм,

³³ мед гажӧдчасны вӧрса пуяс Господь водзын, ӧд Сійӧ локтӧ мыждыны муюгыдсӧ.

³⁴ Ошкӧй Господьӧс, ӧд Сійӧ бур, Сылӧн буралӧмыс оз помасьлы!

³⁵ Шуӧй: Енмӧй, миян Мездысьӧй, мезды миянӧс, чукӧрт миянӧс войтыръяс пӧвстысь. Сэки ми ошкам Тэнсьыд вежа нимтӧ, кутам ошйысьны Тэнад дзирдлунӧн.

³⁶ Ошкӧм Господьлы, Израильлӧн Енлы, нэмъяс чӧж! Став войтырыс шуис: «Аминь!» да ошкис Господьӧс.

Левитъяслӧн кесъялӧм

³⁷ Давид тшӧктіс Асафлы да сылӧн вокъяслы, медым найӧ дугдывлытӧг кесъяласны Господьлӧн Йитӧд куд водзын, быд лун вӧчасны, мый колӧ вӧчны сійӧ лунӧ.

³⁸ Едутунлысь Овед-Эдом писӧ, сылӧн рӧдысь квайтымын кӧкъямыс мортӧс да Хосӧс Давид индіс крам дзиръя видзысьясӧн.

³⁹ Садок попӧс да сылӧн рӧдысь мукӧд попъясӧс Давид индіс кесъявны Господьлӧн вежа чом водзын гаваонса ыб вылын.

⁴⁰ Быд асыв и рыт налы колӧ вӧлі висьпуктанін вылын вайны сотан висьяс Господьлы да ставсӧ вӧчны сідзи, кыдзи гижӧма Индӧдас, мый Господь сетіс Израильлы.

⁴¹ Накӧд тшӧтш кесъялісны Еман, Едутун да мукӧд бӧрйӧм йӧз, кодъясӧс вӧлі индӧма нимнас, медым найӧ ошкисны Господьӧс, кодлӧн буралӧмыс оз помасьлы.

⁴² Еманӧс да Едутунӧс индісны ворсны трубаӧн, кимвалӧн да мукӧд ворсанторйӧн, медым ошкыны Енмӧс. Едутунлысь пиянсӧ пуктісны видзны вежа чомлысь пыранінсӧ.

⁴³ Став войтырыс разӧдчис асланыс гортаныс. Давид тшӧтш муніс, медым бурсины ассьыс гортсасӧ.