1 Каднебӧг 15 - Коми Библия 2023

Енлысь кудсӧ вайӧны Ерусалимӧ

¹ Давидлӧн карын Давид вӧчис аслыс керкаяс, дасьтіс Енлӧн кудлы места да вӧчис чом, медым кудсӧ пуктыны сэтчӧ.

² Давид шуис, мый Енлысь кудсӧ вермасны новлӧдлыны сӧмын левитъяс, ӧд Господь бӧрйис найӧс пыр кежлӧ, медым найӧ новлӧдлісны Господьлысь кудсӧ да кесъялісны Господьлы.

³ Став Израиль войтырӧс Давид чукӧртіс Ерусалимӧ, медым Господьлысь кудсӧ вуджӧдны местаас, мый Давид дасьтіс кудлы.

⁴ Давид чукӧртіс Ааронлысь рӧдсӧ да левитъясӧс.

⁵ Кааф рӧдысь чукӧртіс Уриэл веськӧдлысьӧс да сё кызь мортӧс,

⁶ Мерари рӧдысь – Асай веськӧдлысьӧс да кыксё кызь мортӧс,

⁷ Гирсон рӧдысь – Йоиль веськӧдлысьӧс да сё комын мортӧс,

⁸ Элицафан рӧдысь – Шемай веськӧдлысьӧс да кыксё мортӧс,

⁹ Хеврон рӧдысь – Элиэл веськӧдлысьӧс да кӧкъямысдас мортӧс,

¹⁰ Узиэл рӧдысь – Аминадав веськӧдлысьӧс да сё дас кык мортӧс.

¹¹ Давид корис ас дінас Садок да Авиатар попъясӧс, Уриэл, Асай, Йоиль, Шемай, Элиэл да Аминадав левитъясӧс.

¹² Налы шуис: «Ті, левитъяслӧн рӧдкутысьяс, вежӧдӧй-сӧстӧммӧдӧй асьнытӧ да вокъяснытӧ, сэсся вайӧй Израильлӧн Господь Енлысь кудсӧ сійӧ местаас, мый ме дасьті сылы.

¹³ Водзынджык энӧ ті новлӧдлӧй кудсӧ, та вӧсна Господь, миян Енным, мыждіс миянӧс, ӧд ми эгӧ шогмана ногӧн шыасьлӧй Сы дінӧ».

¹⁴ Попъяс да левитъяс вежӧдісны-сӧстӧммӧдісны асьнысӧ, медым вермисны нуны Израильлӧн Господь Енлысь кудсӧ.

¹⁵ Потшъяс отсӧгӧн левитъяс нуисны пельпом выланыс Енлысь кудсӧ, кыдзи Мӧисей тшӧктіс вӧчны Господьлӧн шуӧм серти.

¹⁶ Левитъяслӧн веськӧдлысьяслы Давид тшӧктіс сувтӧдны левитъяс пӧвстысь сьылысьясӧс, нӧшта арфаӧн, гуслиӧн да кимвалӧн ворсысьясӧс, медым найӧ гораа да нимкодясьӧмӧн сьылісны-ворсісны.

¹⁷ Левитъяс индісны Йоильлысь Еман писӧ да сылӧн рӧдысь Береклысь Асаф писӧ, нӧшта Мерари рӧдысь Кушайлысь Этан писӧ.

¹⁸ Налы отсасьысьясӧн индісны Закарӧс, Бенӧс, Язиэлӧс, Шемирамотӧс, Ехиэлӧс, Уннийӧс, Элиавӧс, Бенайӧс, Маасейӧс, Маттитайӧс, Элифелейӧс, Микнейӧс, Овед-Эдомӧс да Евэлӧс. Овед-Эдом да Евэл вӧліны дзиръя видзысьяс.

¹⁹ Еман, Асаф да Этан гораа ворсісны ыргӧн кимвалъяс вылын,

²⁰ а Закар, Азиэл, Шемирамот, Ехиэл, Унний, Элиав, Маасей да Бенай ворсісны вӧсни шыа арфаӧн.

²¹ Маттитай, Элифелей, Микней, Овед-Эдом, Евэл да Азазий ворсісны гуслиӧн, медым веськӧдлыны ворсысьясӧн.

²² Кенаний веськӧдліс сьылысь-ворсысь левитъясӧн, ӧд сылӧн вӧлі та вылӧ сямлун.

²³ Берек да Элкан видзисны Енлысь кудсӧ.

²⁴ Овед-Эдом да Ехий тшӧтш видзисны кудсӧ. Шеваний, Иосафат, Нафанаил, Амасай, Закар, Бенай да Элизер попъяс ворсісны трубаӧн Енлӧн куд водзын.

²⁵ Тадзи Давид, израильса юрнуӧдысьяс да сюрс тышкамортӧн веськӧдлысьяс нимкодясьӧмӧн мунісны, медым Господьлысь Йитӧд кудсӧ вайны Овед-Эдомлӧн керкаысь.

²⁶ Енмыс отсаліс Господьлысь Йитӧд кудсӧ нуысь левитъяслы, та вӧсна найӧ вайисны Енмыслы вись пыдди сизим ӧшкӧс да сизим межӧс.

²⁷ Давид вӧлі пасьтасьӧма вӧсни шабдіысь кыӧм ризаӧ, тадзи жӧ вӧлі пасьтасьӧмаӧсь Енлысь кудсӧ нуысь левитъяс, сьылысьяс да Кенаний – сьылысьясӧн да ворсысьясӧн веськӧдлысь. Давид вылын нӧшта вӧлі шабді ефод.

²⁸ Тадзи буксан да труба шы улӧ гораа нимкодясьӧмӧн, кимвалӧн, арфаӧн да гуслиӧн ворсӧмӧн став Израиль войтыр вуджӧдіс Господьлысь Йитӧд кудсӧ.

²⁹ Кор Господьлысь Йитӧд кудсӧ пыртісны Давид карӧ, Сауллӧн Мелкола нылыс видзӧдіс ӧшиньӧдыс. Сійӧ аддзис, мый Давид ӧксы чеччалӧ-йӧктӧ, да омӧльтіс сійӧс ас пытшкас.