1 Каднебӧг 14 - Коми Библия 2023

Давид ӧксыалӧ Ерусалимын

¹ Тирса Хирам ӧксы мӧдӧдіс аслас йӧзкӧд Давидлы сус пуяс, тшӧтш изйысь вӧчасьысьясӧс да тшупсьысьясӧс, медым лэптыны Давидлы ыджыд керка.

² Давидлы вӧлі гӧгӧрвоана, мый Аслас Израиль войтыр вӧсна Господь пуктіс сійӧс ӧксыӧ да зумыдмӧдіс сылысь юралӧмсӧ Израильын.

³ Ерусалимын Давид босьтіс нӧшта аслыс гӧтыръясӧс. Сылӧн чужисны нӧшта на ныв-пи.

⁴ Ерусалимын сылӧн чужисны Шаммуй, Шовав, Нафан, Соломон,

⁵ Ивхар, Элишуй, Элпелет,

⁶ Ногах, Нефег, Яфий,

⁷ Элишам, Белидай да Элипелет пиян.

Давид вермӧ филистимсаясӧс

⁸ Кор филистимсаяс тӧдмалісны, мый Давидӧс мавтыштӧмӧн пуктӧма ӧксыӧ Израиль войтырлы, сэки петісны корсьны сійӧс. Та йылысь кылӧм бӧрын Давид петіс налы паныд.

⁹ Филистимсаяс локтісны да сувтісны Рефаим ковтысӧ.

¹⁰ Давид шыасис Енмыс дінӧ да юаліс: «Петны-ӧ меным филистимсаяслы паныд тышӧ? Сетан-ӧ Тэ найӧс менам киӧ?» Господь вочавидзис: «Пет. Ме сета найӧс тэнад киӧ».

¹¹ Сэки израильсаяс мунісны Ваал-Перацимӧ. Давид пасьвартіс сэні филистимсаясӧс. Давид шуис: «Ытва моз Енмыс нуис-бырӧдіс вӧрӧгӧс менам киӧн». Та вӧсна тайӧ местаыслы сетӧма Ваал-Перацим ним.

¹² Филистимсаяс колисны сэтчӧ ассьыныс бӧлбанъяссӧ. Давидлӧн тшӧктӧм серти бӧлбанъяссӧ сотісны.

¹³ Кад мысти филистимсаяс бара локтісны да сувтісны Рефаим ковтысӧ.

¹⁴ Давид шыасис Енмыс дінӧ. Енмыс шуис: «Воча налы эн пет. Кытшав найӧс бӧрсяньныс да матыстчы на дінӧ пуяс сайсянь.

¹⁵ Кор тэ кылан шы, быттьӧ пуяс йывті кодкӧ восьлалӧ, сэки уськӧдчы. Тӧд, мый Енмыс мунӧ тэ водзвылын, медым пасьвартны филистимса тышкайӧзӧс».

¹⁶ Давид вӧчис, кыдзи тшӧктіс сылы Ен. Израильсаяс пасьвартісны филистимсаясӧс Гаваонсянь Гезерӧдз.

¹⁷ Давидӧс кутісны нимӧдны быд муын, и Господь вӧчис сідзи, мый став войтыръяс кутісны повны Давидысь.