1 Каднебӧг 13 - Коми Библия 2023

Давид кӧсйӧ вайны Енлысь кудсӧ Ерусалимӧ

¹ Давид сёрнитіс тышкайӧзӧн веськӧдлысьяскӧд да мукӧд юралысьяскӧд.

² Сійӧ шуис чукӧртчӧм Израиль войтырлы: «Тайӧ кӧ Господьсянь, миян Енсянь, да шогмана тіянлы, сідзкӧ, Израиль му пасьтала мӧдӧдам юӧр миян вокъяслы, тшӧтш попъяслы да левитъяслы налӧн кар-сиктъясӧ, медым чукӧртчасны миян дінӧ.

³ Сэсся ми бӧр ваям ас дінӧ миян Енлысь кудсӧ. Сауллӧн ӧксыалігӧн ми эгӧ тӧждысьлӧй та йылысь».

⁴ Чукӧртчӧм йӧзлы тайӧ воис сьӧлӧм вылас, и найӧ шуисны тадзи вӧчны.

⁵ Египетса Шихор ю дорсянь Лево-Хаматӧдз Давид чукӧртіс став Израиль войтырӧс, медым вайны Енлысь кудсӧ Киръят-Яримысь.

⁶ Сэсся накӧд муніс Иуда муӧ Баала карӧ, мӧд ногӧн кӧ, Киръят-Яримӧ, мед вайны сэтысь Господь Енлысь кудсӧ. Кудсӧ вӧлі сиӧма херувимъяс вылын пукалысь Господьлы.

⁷ Енлысь кудсӧ босьтісны Авинадав керкаысь да пуктісны выль тарантасӧ. Тарантасӧн веськӧдлісны Уззай да Ахио.

⁸ Та дырйи Давид да Израиль войтыр Ен водзын нимкодясьӧмӧн йӧктісны, сьылісны, ворсісны гуслиӧн, арфаӧн, тимпанӧн, кимвалӧн да трубаӧн.

⁹ Кор воисны Кидонлӧн гумла дорӧ, ӧшъяс пӧлыньтісны тарантассӧ. Пӧрӧмсьыс кутыштӧм могысь Уззай инмӧдчис Енлӧн кудйӧ.

¹⁰ Господь таысь скӧрмис Уззай вылӧ да дзик пыр виис сійӧс. Уззай куліс Ен водзын.

¹¹ Давид шогӧ усис, мый Господь виис Уззайӧс. Тайӧ местасӧ Давид нимтіс Перез-Узза. Тадзи ӧнӧдз шуӧны.

¹² Сійӧ лунӧ Давид ёна повзис Енмысь. Сійӧ шуис: «Ме ог вермы босьтны Енлысь кудсӧ ас дінӧ».

¹³ Та вӧсна Давид эз босьт кудсӧ ас дінас, Давид карӧ, а мӧдӧдіс сійӧс гефса Овед-Эдом керкаӧ.

¹⁴ Куим тӧлысь чӧж Енлӧн кудйыс вӧлі Овед-Эдом керкаын, и Господь бурсиис Овед-Эдомӧс да став сылысь гортсасӧ.