1 Каднебӧг 11 - Коми Библия 2023

Давид ӧксы босьтӧ Ерусалим изкар

¹ Израильсаяс чукӧртчисны Давид дінӧ Хевронӧ. Найӧ шуисны: «Миян пытшкын визувтӧ ӧти вир.

² Водзын, кор Саул вӧлі ӧксыӧн, Израиль войтыркӧд тэ ветлывлін тышъясӧ. Господь, тэнад Енмыд, шуліс тэныд: ”Тэ кутан видзны Менсьым Израиль войтырӧс да лоан налы юралысьӧн”».

³ Хевронын Господь водзын Давид кӧрталіс израильса юрнуӧдысьяскӧд йитӧд. Найӧ мавтыштӧмӧн пуктісны Давидӧс Израиль войтырлы ӧксыӧ. Тадзи иніс Самуил пыр висьталӧм Господьлӧн кывйыс.

⁴ Ӧтчыд Давид израильса тышкайӧзкӧд петіс тышӧ, медым босьтны Ерусалим, мӧд ногӧн кӧ, Евус кар. Сэні олісны евуссаяс.

⁵ Найӧ шуисны Давидлы: «Татчӧ тэ он пыр». Но Давид босьтіс Сион изкар. Бӧрынджык изкарсӧ нимтісны Давид карӧн.

⁶ Саруялӧн Йоав пиыс медводдзаӧн пырис изкарӧ да лои тышкайӧзлӧн юралысьӧн, ӧд Давид шуліс: «Коді медводдзаӧн виас евуссаӧс, лоас тышкайӧзлӧн юралысьӧн».

⁷ Давид овмӧдчис изкарӧ, та вӧсна изкарсӧ кутісны нимтыны Давид карӧн.

⁸ Милло гӧгӧр керкаяссӧ лэптіс Давид, а сэсянь водзӧ карсӧ выльысь лэптіс-кыпӧдіс Йоав.

⁹ Господь Саваоф вӧлі Давидкӧд, та вӧсна сійӧ лои вына юралысьӧн.

Давидлӧн нималана тышкайӧз

¹⁰ Тані лыддьӧдлӧма тышкайӧзлысь юралысьясӧс, кодъяс Израиль войтыркӧд сулалісны Давидлӧн ӧксыалӧм дор, медым пуктыны сійӧс ӧксыӧ Израиль йылысь Господьлӧн шуӧм серти.

¹¹ Давидлӧн тышкайӧзысь тӧдчанлунныс серти торъялісны комынӧн. Медтӧдчанаыс на пиысь вӧлі Хакмонилӧн Яшовам пиыс. Аслас шыӧн сійӧ ӧтчыдӧн виис вӧрӧглысь куимсё мортӧс.

¹² Мӧдыс вӧлі Элазар, Ахоах Додолӧн пиыс. Сійӧ вӧлі куим медтӧдчана тышкаморт пиысь ӧти.

¹³ Сійӧ вӧлі Давидкӧд Пас-Даммимын, кытчӧ филистимсаяс чукӧртчисны тыш вылӧ. Пас-Даммимын вӧлі кӧдзӧм ид му. Израильса тышкайӧз кутісны пышйыны филистимсаясысь,

¹⁴ а кӧдзӧм мусӧ видзӧм могысь тайӧ куим тышкамортыс сувтісны му шӧрас да сэні виалісны филистимсаясӧс. Тадзи Господь сетіс Израильлы ыджыд вермӧм.

¹⁵ Ӧтчыд комын веськӧдлысь пиысь куим мортыс мунісны Давид дінӧ адулламса кырта горсйӧ. Филистимса тышкайӧз чукӧртчисны Рефаим ковтысӧ.

¹⁶ Давид вӧлі сайӧдчанінын, а филистимсаяслӧн тышкакотырыс – Виплиемын.

¹⁷ Давидлӧн горшыс кутіс косьмыны. Сійӧ шуис: «Коді эськӧ ваяс меным юкмӧсысь ва Виплием дзиръя дорысь!»

¹⁸ Сэки тайӧ куим мортыс мунісны филистимсаяслӧн сувтанінӧ, тышкасьӧмӧн матыстчисны Виплием дзиръя дорӧ да гумовтісны юкмӧсысь васӧ. Сэсся вайисны Давидлы. Но Давид эз кут юны тайӧ васӧ, а кисьтіс сійӧс Господьлы вись пыдди.

¹⁹ «Енмӧй, ме ог вермы юны тайӧ васӧ! Тайӧ – йӧзлӧн вир, найӧ дасьӧсь вӧліны воштыны олӧмнысӧ», – шуис Давид и эз кут юны. Татшӧм уджъяс вӧчисны тайӧ куим тышкамортыс.

²⁰ Йоавлӧн Авишай вокыс веськӧдліс тышкайӧзлӧн куим юралысьӧн. Сійӧ виис аслас шыӧн куимсё мортӧс. Тайӧ куим юралысьыс моз сійӧ вӧлі нималана

²¹ да пыдди пуктана. Сійӧ веськӧдліс наӧн, но накӧд сійӧс он ӧткодяв.

²² Кавцелысь Бенай, Иодайлӧн пиыс, вӧлі збой тышкасьысь да нималіс аслас ыджыд уджъясӧн. Сійӧ виис моавса Ариллысь кыкнан писӧ. Коркӧ лым усигӧн сійӧ лэччис косьмӧм вайӧртӧдӧ да виис сэні левӧс.

²³ Нӧшта сійӧ виис ыджыд тушаа египетсаӧс, коді вӧлі вит гырддза судта. Египетса кутіс киас шы, и шыыс вӧлі шӧрт гартан юранӧш кодь кыз, а Бенай петіс сылы паныд беддьӧн. Бенай мырддис египетсалӧн киысь шысӧ да бытшкис сійӧс.

²⁴ Со татшӧмторъяс вӧчис Иодайлӧн Бенай пиыс. Сійӧ тшӧтш нималіс куим юралысьыс моз.

²⁵ Комын нималана тышкаморт пӧвстын Бенай вӧлі тӧдчана морт, но тайӧ куим юралысьыскӧд сійӧс он ӧткодяв. Давид пуктіс сійӧс веськӧдлыны аслас видзысьясӧн.

²⁶ Давид ӧксылӧн нималана тышкайӧз лыдӧ пырисны: Йоавлӧн Асаил вокыс, Виплиемысь Додолӧн Элханан пиыс,

²⁷ Харорысь Шаммот, Пелонысь Хелец,

²⁸ Текоя карысь Икешлӧн Ир пиыс, Анатотысь Авиэзер,

²⁹ Хушаысь Сиббекай, Ахоахысь Илай,

³⁰ Нетофаысь Махрай да Баанлӧн Хелед пиыс,

³¹ Гиваысь Венямин чужанкотырысь Рибайлӧн Иттай пиыс, Пиратонысь Бенай,

³² Нахле-Гаашысь Хурай, Арбаысь Авиэл,

³³ Бахарумысь Азмавет, Шаалбонысь Элияхаб,

³⁴ Гизонысь Хашемлӧн пиян, Харарысь Шагейлӧн Ионафан пиыс,

³⁵ Харарысь Сакарлӧн Ахиам пиыс, Урлӧн Элифал пиыс,

³⁶ Мекераысь Хефер, Пелонысь Ахий,

³⁷ Кармилысь Хецро, Эзбайлӧн Наарай пиыс,

³⁸ Йоиль, Нафанлӧн вокыс, Хагрилӧн Мивхар пиыс,

³⁹ аммон войтырысь Целек, Беротысь Нахарай – Саруялӧн Йоав пилысь шыпуртсӧ новлӧдлысь,

⁴⁰ Итриысь Ир да Гарев,

⁴¹ хеттей Урий, Ахлайлӧн Завад пиыс,

⁴² Шизлӧн Адин пиыс – Рувим чужанкотырлӧн юралысь да сылӧн комын тышкаморт,

⁴³ Мааклӧн Ханан пиыс, Митниысь Иосафат,

⁴⁴ Аштаротысь Уззай, Ароэрысь Хотамлӧн Шама да Евэл пиян,

⁴⁵ Шимрилӧн Едиэл пиыс да Тизиысь сылӧн Иох вокыс,

⁴⁶ Махавысь Элиэл, Элнаамлӧн Еривай да Иошавий пиян, моавса Итмай,

⁴⁷ Элиэл, Овид да Мецоваысь Ясиэл.