1 Каднебӧг 10 - Коми Библия 2023

Сауллӧн кулӧм

¹ Филистимсаяс тышкасисны израильсаяскӧд. Гелву керӧс вылын найӧ пасьвартісны израильсаясӧс. Унаӧн израильса пӧвстысь кулісны, а мукӧдыс пышйисны.

² Филистимсаяс суӧдісны Саулӧс да сылысь пиянсӧ. Найӧ виисны Сауллысь Ионафан, Авинадав да Малкисуй пиянсӧ.

³ Чорыд тыш вӧлі Саулкӧд. Сійӧс лыйлісны ньӧвъясӧн, ёна дойдалісны.

⁴ Саул шуис шыпурт новлӧдлысьыслы: «Перйы шыпурттӧ да бытшкы менӧ! Тайӧ вундыштчытӧмъясыс мед оз тешитчыны ме вылын». Но шыпурт новлӧдлысь ёна повзис да эз ви Саулӧс. Сэки Саул босьтіс ассьыс шыпуртсӧ да шыбитчис ёсьладор помас.

⁵ Шыпурт новлӧдлысь кор аддзис, мый Саул куліс, тшӧтш шыбитчис шыпурт ёсьладор помас да куліс.

⁶ Саул, сылӧн куимнан пиыс да став сылӧн йӧзыс кулісны.

⁷ Ковтысын олысь израильсаяс кор кылісны, мый израильса тышкайӧз пышйӧмаӧсь, а Саул пияныскӧд абу нин ловъяӧсь, сэки эновтісны ассьыныс каръяснысӧ да пышйисны. А филистимсаяс локтісны да овмӧдчисны сэтчӧ.

⁸ Мӧд луннас, кор филистимсаяс локтісны шобны виӧмаясӧс, аддзисны Гелву керӧс вылысь Сауллысь да сылӧн пияныслысь шойяссӧ.

⁹ Филистимсаяс пӧрччӧдісны Саулӧс, керыштісны сылысь юрсӧ, босьтісны шыпуртсӧ да мукӧд тышкасянторсӧ. Сэсся ставсӧ тайӧс новлӧдлісны Филистим му пасьтала да юӧртісны асланыс вермӧм йылысь идолъясныс да войтырныс водзын.

¹⁰ Сауллысь тышкасянторъяссӧ пуктісны асланыс енъяслы юрбитанінӧ, а юрсӧ тувъялісны Дагон идоллы юрбитанінса стенмӧ.

¹¹ Галаад муын Явис карын кор кылісны, мый филистимсаяс вӧчӧмаӧсь Саулкӧд,

¹² сэки став збой йӧзыс петісны туйӧ. Найӧ босьтісны Сауллысь да пияныслысь шойяссӧ да вайисны Явис карӧ. Налысь лыяссӧ гуалісны тупу улӧ. Та бӧрын сизим лун чӧж видзалісны.

¹³ Тадзи куліс Саул, ӧд сійӧ эновтіс Господьӧс. Сійӧ мыж вӧчис Господьлы паныд, эз ов Господьлӧн кыв серти, но туйдӧдӧмла шыасис кулӧмаӧс корысь ань дінӧ,

¹⁴ а эз Господь дінӧ. Та вӧсна Господь бырӧдіс сійӧс, а ӧксыӧ пуктіс Давидӧс, Ессейлысь писӧ.