1 Иоан 5 - Коми Библия 2023

Эскӧмыс вермӧ муюгыдсӧ

¹ Эскам кӧ, мый Исус эм Кристос, ми Енсянь чужӧмаӧсь. Муса кӧ миянлы Чужтысьыс, муса и Сысянь чужысьыс.

² Радейтам кӧ Енсӧ да олам Сылӧн тшӧктӧмъяс серти, та серти тӧдам, мый ми Ен челядьӧс тшӧтш радейтам.

³ Тшӧктӧмъяс серти олӧмыс – тайӧ Енсӧ радейтӧм, а Сылӧн тшӧктӧмъясыс абу сьӧкыдӧсь.

⁴ Енсянь чужысь вермӧ муюгыдсӧ. Тайӧ вермӧмыс – миян эскӧм, сы отсӧгӧн муюгыдсӧ вермӧма.

⁵ Коді вермӧ муюгыдсӧ? Сійӧ, коді эскӧ, мый Исус эм Енлӧн Пи.

Енмыс висьталӧ Аслас Пи йылысь

⁶ Исус Кристос локтіс ваӧн, вирӧн да Лолӧн, эз сӧмын ваӧн, но ваӧн да вирӧн. Та йылысь Лов висьталӧ, ӧд Лолыс эм збыльыс.

⁷ Енэжас эскӧдӧны-висьталӧны та йылысь куимӧн: Бать, Кыв да Вежа Лов. Тайӧ куимыс ӧти.

⁸ Му вылас тшӧтш эскӧдӧны-висьталӧны та йылысь куимӧн: Лов, ва да вир. Тайӧ куимыс висьталӧ ӧтитор йылысь.

⁹ Ми сибӧдам мортлысь висьталӧмсӧ, но Енлӧн висьталӧмыс ёна ыджыдджык, ӧд сійӧс Ачыс Енмыс висьталӧ. Сійӧ висьталӧ Аслас Пи йылысь.

¹⁰ Коді эскӧ Ен Пилы, сылӧн сьӧлӧмас эм тайӧ висьталӧмыс. Коді оз эскы Енмыслы, пуктӧ Сійӧс пӧръясьысь туйӧ, ӧд тайӧ мортыс оз эскы Пи йывсьыс Енлӧн висьталӧмыслы.

¹¹ А висьталӧмыс татшӧм: Ен сетӧма миянлы помтӧм олӧм, и тайӧ олӧмыс Пиыс пытшкын.

¹² Кодлӧн эм Пиыс, сылӧн эм олӧмыс. Кодлӧн абу Ен Пиыс, сылӧн олӧмыс абу.

Тіян эм помтӧм олӧм

¹³ Тайӧс гижи тіянлы, Ен Пи нимӧ эскысьяслы, мед ті тӧдінныд, мый Ен Пилы эскӧмныд вӧсна тіян эм помтӧм олӧм.

¹⁴ Ми вермам повтӧг локны Ен водзӧ, ӧд тӧдам: корӧмным кӧ лӧсялӧ Сылӧн кӧсйӧмлы, Сійӧ кылӧ миянӧс.

¹⁵ А тӧдам кӧ, мый Сійӧ кылӧ миянлысь быд корӧм, тӧдам тшӧтш, мый Сійӧ сетас корӧмасӧ.

¹⁶ Кор аддзан, мый вокыд мыжӧ усьӧма, но мыжыс оз вайӧд кулӧмӧ, кевмысь сы вӧсна. Ен сетас сылы олӧм, дерт, мыжыс кӧ оз кулӧмӧ вайӧд. Эм кулӧмӧ вайӧдысь мыж, но ме ог кор кевмысьны татшӧм мыжсӧ вӧчысь вӧсна.

¹⁷ Быд лёк вӧчӧм эм мыж, но оз став мыжыс вайӧд кулӧмӧ.

¹⁸ Ми тӧдам, мый Енсянь чужысьяс мыжсӧ оз вӧчны. Енсянь чужысь видзӧ асьсӧ, да омӧльыс оз вермы инмӧдчыны сы дінӧ.

¹⁹ Тӧдам, мый ми Енсянь, а став муюгыдыс омӧльыслӧн кипод улын.

²⁰ Нӧшта тӧдам, мый Ен Пи локтіс да сетіс миянлы мывкыдлун, мед ми тӧдім збыль Енсӧ. И ми олам тайӧ збыльыс пытшкын, Исус Кристос Пиыс пытшкын. Сійӧ эм збыль Енмыс да помтӧм олӧмыс.

²¹ Челядь, видзӧй асьнытӧ идолъясысь. Аминь.