1 Иоан 4 - Коми Библия 2023

Збыль лов да ылӧг лов

¹ Мусаясӧй, энӧ эскӧй быд ловлы, тӧдмалӧй, Енсянь-ӧ сійӧ. Ӧд ӧні муюгыдас уна ылӧгпророкыс.

² Енсянь-ӧ лолыс, тӧдмаланныд тадзи: висьталӧ кӧ лолыс, мый Исус Кристос локтіс вир-яйын, сійӧ Енсянь.

³ Оз кӧ висьтав, мый Исус Кристос локтіс вир-яйын, сійӧ абу Енсянь, сійӧ антикристсянь. Тайӧ – антикристлӧн лолыс, код йылысь ті кывлінныд, мый сійӧ локтас, и ӧні сійӧ муюгыдас нин.

⁴ Челядь, ті Енсянь. Ті верминныд ылӧгпророкъясӧс, ӧд тіян пытшкын Олысьыс ёна ыджыдджык муюгыдсасьыс.

⁵ Найӧ муюгыдсьыс, та вӧсна и сёрнитӧны муюгыдсаыс моз, и муюгыдыс кывзӧ найӧс.

⁶ А ми Енсянь. Енсӧ тӧдысь кывзӧ миянӧс, а коді абу Енсянь, сійӧ оз кывзы миянӧс. Та серти тӧдам збыльыслысь ловсӧ да ылӧгыслысь ловсӧ.

Енмыс эм муслун

⁷ Мусаясӧй, кутам радейтны ӧта-мӧднымӧс, ӧд муслуныс Енсянь. Коді радейтӧ, сійӧ Енсянь чужӧма да тӧдӧ Енсӧ.

⁸ Коді оз радейт, сійӧ оз тӧд Енсӧ, ӧд Енмыс эм муслун.

⁹ Енмыс мӧдӧдіс тайӧ муюгыдас Ассьыс ӧтка Писӧ, медым Сы пыр сетны миянлы олӧм. Тадзи Сійӧ петкӧдліс миян дінӧ Ассьыс муслунсӧ.

¹⁰ Муслуныс абу сыын, мый Енмыс вӧлі муса миянлы, но сыын, мый ми вӧлім мусаӧсь Сылы. Сійӧ сетіс Ассьыс Писӧ вись пыдди, медым вештыны миянлысь мыжнымӧс.

¹¹ Мусаясӧй, Енмыс кӧ татшӧма радейтӧ миянӧс, миянлы тшӧтш колӧ радейтны ӧта-мӧднымӧс.

¹² Енсӧ некод некор эз аддзыв. Но ми кӧ радейтам ӧта-мӧднымӧс, сідзкӧ, Енмыс миян пытшкын да Сылӧн муслуныс тыр-бурӧдз воис сьӧлӧманым.

¹³ Енмыс сетіс миянлы Ассьыс Ловсӧ. Та серти ми тӧдам, мый ми Сы пытшкынӧсь, а Сійӧ миян пытшкын.

¹⁴ Батьыс мӧдӧдіс Писӧ мездыны муюгыдсӧ. Ми ас синмӧн аддзылім тайӧс, и ӧні висьталам та йылысь.

¹⁵ Коді шуӧ Исусӧс Ен Пиӧн, Енмыс сы пытшкын, а сійӧ Ен пытшкын.

¹⁶ Ми тӧдмалім Енлысь миян дінӧ муслунсӧ да эским Сылӧн муслунас. Енмыс эм муслун. Коді олӧ муслун пытшкас, сійӧ Ен пытшкын, а Енмыс сы пытшкын.

¹⁷ Сідзкӧ, муслуныс тыр-бурӧдз воӧма миян пытшкын. Та вӧсна вермам повтӧг сувтны мыждан лунӧ, ӧд ми тайӧ муюгыдас Кристос кодьӧсь.

¹⁸ Муслунас абу полӧмыс, ӧд тыр-бур муслуныс вӧтлӧ полӧмсӧ. Полӧмас олӧ мыждӧм, та вӧсна полысьлӧн муслуныс абу на тыр-бур.

¹⁹ Кутамӧй радейтны Енмӧс, ӧд медводз Сійӧ радейтіс миянӧс.

²⁰ Коді шуӧ, ме пӧ радейта Енсӧ, но мустӧмтӧ ассьыс воксӧ, сійӧ пӧръясьӧ. Оз кӧ радейт воксӧ, кодӧс аддзӧ, вермас-ӧ радейтны Енсӧ, кодӧс оз аддзы?

²¹ Миян эм Енсянь тшӧктӧм: «Енмӧс радейтысь, радейт тшӧтш ассьыд воктӧ».