1 Иоан 3 - Коми Библия 2023

Ми – Енлӧн ныв-пи

¹ Видзӧдӧй, кутшӧм мусаӧсь ми Батьлы: Сійӧ сетіс миянлы лоны да шусьыны Енлӧн ныв-пиӧн. Муюгыдсаыс оз тӧд миянӧс, Сійӧс оз тӧд да.

² Мусаясӧй, ӧні ми Енлӧн ныв-пи, а кодӧн лоам, эз на воссьы. Тӧдам сӧмын, кор воссяс, лоам Сы кодьӧсь, ӧд сэки аддзам Сійӧс сэтшӧмӧн, кутшӧм Сійӧ эм.

³ Сы вылӧ татшӧм лача кутысь сӧстӧммӧдӧ асьсӧ, мед лоны Сы кодь сӧстӧмӧн.

⁴ Мыжсӧ вӧчысь торкӧ Индӧдсӧ, ӧд мыжыс и эм Индӧд торкӧм.

⁵ Ті тӧданныд, мый Кристос локтіс босьтны миянлысь мыжъяс. Сы пытшкын мыжыс абу.

⁶ Сы пытшкын олысь оз вӧч мыжсӧ. А мыжсӧ вӧчысь эз аддзыв да оз тӧд Сійӧс.

⁷ Челядь, энӧ сетӧй ылӧдны тіянӧс некодлы. Веськыда вӧчысь Кристос кодь веськыд.

⁸ А мыжсӧ вӧчысь – омӧльсянь, ӧд омӧльыс водзысянь мыжсӧ вӧчӧ. Та вӧсна Ен Пи и локтіс, мед жугӧдны омӧльыслысь уджъяссӧ.

⁹ Енсянь чужысь оз вӧч мыжсӧ, сы пытшкӧ бур кӧйдыс вужъясьӧма. Татшӧмыс мыжсӧ вӧчны оз вермы, ӧд сійӧ Енсянь чужӧма.

¹⁰ Коді оз веськыда вӧч, коді мустӧмтӧ воксӧ, сійӧ абу Енсянь. Та серти тӧдмалам Енлысь ныв-писӧ да омӧльлысь йылӧмсӧ.

Радейтӧй ӧта-мӧднытӧ

¹¹ Миянлы колӧ радейтны ӧта-мӧднымӧс. Тайӧ юӧрсӧ ті кывлінныд водзысяньыс.

¹² Огӧ лоӧй Каин кодьӧсь, ӧд сійӧ вӧлі омӧльсяньыс да виис ассьыс воксӧ. Мыйла виис? Каинлӧн уджъясыс вӧліны лёкӧсь, а вокыслӧн – веськыдӧсь.

¹³ Энӧ шензьӧй, вокъясӧй, муюгыдсаыс кӧ мустӧмтӧ тіянӧс.

¹⁴ Ми вуджим кулӧмысь олӧмӧ. Ми тӧдам тайӧс, ӧд радейтам вокъяснымӧс. Коді оз радейт воксӧ, кольӧ кулӧмас.

¹⁵ Воксӧ мустӧмтысь эм морт виысь. Ті тӧданныд, мый морт виысь пытшкын помтӧм олӧмыс абу.

¹⁶ А муслунсӧ ми тӧдмалім сы серти, мый Кристос сетіс Ассьыс олӧмсӧ миян вӧсна. Сідзкӧ, миянлы тшӧтш колӧ сетны олӧмнымӧс вокъясным вӧсна.

¹⁷ Вермас-ӧ Енлӧн муслуныс лоны сійӧ морт пытшкас, кодлӧн ставыс эм, но вокыслысь гӧльлунсӧ аддзигӧн сійӧ чорзьӧдӧ сьӧлӧмсӧ да оз отсав сылы?

¹⁸ Челядьӧй, кутам радейтны ӧта-мӧднымӧс огӧ кывъясӧн да сёрниӧн, но збыль сертиыс да уджъясӧн.

^19-20 Та серти тӧдмалам, мый ми збыльыслӧн. Сьӧлӧм кӧ мыждӧ миянӧс, ми вермам лӧньӧдны сьӧлӧмнымӧс Ен водзын. Енмыс ӧд ыджыдджык миян сьӧлӧмысь, Сійӧ ставсӧ тӧдӧ.

²¹ Мусаясӧй, сьӧлӧмным кӧ оз мыжды миянӧс, ми вермам повтӧг локны Ен водзӧ.

²² Сэки мый корам, босьтам Сысянь, ӧд олам Сылӧн тшӧктӧмъяс серти да вӧчам Сылы шогманасӧ.

²³ А Сійӧ тшӧктіс, медым ми эским Сылӧн Пилы, Исус Кристослы, да тшӧктӧмыс серти радейтім ӧта-мӧднымӧс.

²⁴ Коді кутчысьӧ Сылӧн тшӧктӧмъясӧ, сійӧ олӧ Кристос пытшкын, а Кристос – сы пытшкын. Ловсянь, кодӧс Кристос сетіс миянлы, ми тӧдам, мый Сійӧ миян пытшкын.