1 Фессалоникаӧ 4 - Коми Библия 2023

Олӧй Ен водзын шогмана ногӧн

¹ Вокъяс, тіянлы висьтавлім нин, медым олінныд Ен водзын шогмана ногӧн. Дерт, ті дзик тадзи и оланныд. Но Исус Кристос нимӧн ышӧдам да корам тіянӧс: олӧй нӧшта на бурджыка.

² Ті ӧд тӧданныд, кутшӧм тшӧктӧмъяс ми сетім тіянлы Господь Исуссянь.

³ Енмыс кӧсйӧ, медым ті вӧлінныд вежаӧсь да видзинныд асьнытӧ кырсалӧмысь.

⁴ Тіян пиысь быдӧн мед видзӧ ассьыс вир-яйсӧ вежаӧн да шогмана ногӧн,

⁵ медым ентӧдтӧмъяс моз некод оз сетчы ыпъялан лёкколӧмас, ӧд Енсӧ найӧ оз тӧдны.

⁶ Эскысь мед оз вӧч лёксӧ мӧд эскысьлы, оз ылӧдлы сійӧс, ӧд Господь мыждас таысь. Та йылысь висьтавлім нин тіянлы да ӧлӧдлім тіянӧс.

⁷ Енмыс корис миянӧс овны вежа оласногӧн, а эз пеж оласногӧн.

⁸ Сідзкӧ, тайӧ тшӧктӧмсӧ ӧтдортысь оз мортӧс ӧтдорт, а Енсӧ, коді сетіс миянлы Ассьыс Вежа Ловсӧ.

⁹ Эскысьяс дінӧ муслун йылысь абу колана гижны тіянлы, ӧд Ачыс Енмыс велӧдіс тіянӧс радейтны ӧта-мӧднытӧ.

¹⁰ Ті збыльысь радейтанныд Македония пасьтала став эскысьсӧ. Вокъяс, корам тіянӧс: радейтӧй ӧта-мӧднытӧ нӧшта на ёнджыка.

¹¹ Зільӧй овны лӧня. Быдӧн мед вӧчӧ ассьыс удж, ас ки помысь шедӧдӧ олӧм вылас. Тадзи ми велӧдлім тіянӧс.

¹² Сэки эскытӧмъяс тшӧтш кутасны пыдди пуктыны тіянӧс, тіян ставыс лоӧ тырмымӧн.

Кристослӧн локтӧм

¹³ Вокъяс, кӧсъя, мед ті тӧдінныд, мый лоӧ кулӧмаяскӧд. Сэки эскытӧмъяс моз онӧ кутӧй шогсьыны кулӧмаяс йылысь, ӧд эскытӧмъяслӧн лачаныс абу.

¹⁴ Ми кӧ эскам, мый Исус куліс и ловзис, сідзкӧ, Исускӧд Енмыс вайӧдас Ас дінас тшӧтш найӧс, коді эскис Исуслы, но куліс нин.

¹⁵ Ӧні висьталам тіянлы Господьлысь кывсӧ: ми, кодъяс ловъяӧсь на Господь локтӧдз, огӧ пановтӧй кулӧмаясӧс.

¹⁶ Кор кылас чукӧстӧм шы, кор шыасяс архангел да кылас Енлӧн труба шыыс, Ачыс Господь лэччас енэжсяньыс. Сэки медводз ловзясны кулӧмаяс, кодъяс эскисны Кристослы.

¹⁷ Сэсся миянӧс, ловъяясӧс, накӧд тшӧтш лоӧ кыпӧдӧма кымӧръяс вылын сынӧдас, медым аддзысьны сэні Господькӧд. Тадзи пыр лоам Господькӧд.

¹⁸ Сідзкӧ, ышӧдӧй ӧта-мӧднытӧ тайӧ кывъяснас.