ESTHER 1 - BAIBEL KANGTHIR (BSI)

Ahasuras Recho Alam Vashti Rechopi Kepatepek

¹ Ahasuras arni ahut, Ahasuras India pen Ethiopia an 127 alongri aputhak recho cholo,

² halabangso ahut Ahasuras recho methang recho anghoi Susa pu det arongsopi kethe alongsi chingnilo,

³ alangli recho kecho un kethom aningkan alangli rechoso do-an lapen kepangri atum do-an aphan atheke Parsia lapen Media adet ron apinpo atum lapen arlengkethe atum lapen longri-heihei a-Govornor atum anta alangli ingno dosi alangli kecho-kejun pilo,

⁴ alangli det adak atur akeplang lapen ahir asang lapen alangli recho apun akepaklang penang an arni aphan atheke ni 180 an paklang-lo.

⁵ Lahei arni plengdet aphi recho Susa det arongsopi kethe kedo-an armu, kethe lapen kebi atum an aphan recho ahem aberi arlo atikup along kecho-kejun ni 7 an pilo.

⁶ Hadak kebeng ape kelok-heihei lapen pe kelir-heihei pajangnoisi linen kanglit lapen hepi arje ari pen ha rup avaikang along lapen ha marbol anujok along thit-het-lo, lapen ser lapen rup ahongplang-heihei ke kangtangrak checharphlot a-arlong ke-er, marbol, chopi abor lapen adorsopik a-arlong-heihei pen keselam aklong athak bilo.

⁷ Akaprek kaprek ser aharlung-heihei pen pajunlo lapen recho ahorlang ke-ongdung atengsi aninghang an papitoilo.

⁸ Aron pensi pajuntoilo, lapen badu aphanta pabor-itoite det-lo pima ahem kepangri atum an aphan bida thosi pulo, abangphutin amethang aningkehang an pajun nang.

⁹ Lapen ke Vashti rechopita Ahasuras recho ahem kedo arloso atum an aphan kecho-kejun pilo.

¹⁰ Throksi arni recho drakha alang pen ning arong ahut alangli ingno kam keklem bang throksi kasi-entang atum atheke Mehuman, Biztha, Harbona, Bigtha, Abagtha, Zethar lapen Karkas aphan bida thosi pulo,

¹¹ rat atum lapen rechoso atum aphan rechopi a-arjekeme kepaklangji aphan la ser aphutup pen pen Vashti rechopi recho angno pavannang, pima la arje langmepik.

¹² Bonta Vashti rechopi kasi-entang atum pen kepi recho ahukum kroikresi vangvedet-lo. La amat recho aning thihak-lo, lapen alangli ning arlo aningkethi hamhedet-lo.

¹³ Ansi ahut kechini kethek-kere atum aphan recho pulo, (pima aron lapen kangsaithek atum aphan keklem angdeng recho lasonsi arju

¹⁴ lapen alangli dun atum, Karshena, Shethar, Admatha, Tarshish, Meres, Marshena, lapen Memukan helo la Parsia lapen Media adet arechoso bang throksi recho amahang thek-longver lapen det angbong kechengsi anghoi kelong atum.)

¹⁵ “Aron ateng pen Vashti rechopi aphan pisi klem nangjima? Athe kasi-entang atum pen kevan recho Ahasuras ahukum kroikredet-lo.”

¹⁶ Ansi Memukan recho aphan lapen rechoso atum angno pulo, “Vashti rechopi recho aphanchot kali bonta Ahasuras recho alongri kedo rechoso an lapen rat atum an aphansi kechokche klemlo,

¹⁷ pima rechopi keklem bangso akam kadokave a-arloso atum an aphan pachethangpo lapen halatum apenan aphan langrempo, pima ‘Ahasuras recho amethang angno Vashti rechopi vantu pusi hukum pilo bonta la vangvedet-lo’ pusi pupo.

¹⁸ Bangso arni amat Parsia lapen Media adet a-arloso akethe atum rechopi a-ot arjulongsi recho arechoso atum aphan thanpo, lapen kelangrem dopo lapen ning kethi plengsetpo.

¹⁹ Jongsi recho aning dok pulote alangli hin pen recho ahukum papinang lapen la pharlep un-e detjile Parsia lapen Media atum aron-heihei angbong patok nang, atheke non pen anpar rechopi puthot Ahasuras recho angno pavang longle nang lapen la rechopi aman la apar kememu abangpi kaprek aphanle recho papinang.

²⁰ Ansi recho kepi ahukum det adang la an akethe seta pachethang lote kadokave kangtui lapen akangdai arloso atum an apenan aphan aman chepipo.”

²¹ Labangso kepare alam recho lapen rechoso atum aning dok-hurlo lapen Memukan alam atengsi recho klemlo.

²² Alangli det longri do-an alongritin amethang methang amek lapen akheitin amethang methang alam pen ketok aloh losi pulo, pinso abangphutin amethang ahem ahemphu cheplang nangji lapen amethang arat alam chelangsi ningje nangji.