Philippians 1 - Badon Tolagan Na Biblia

Sema Kapoanan Na Solat

¹ Si-kawis Paul tan si Timothy a naiyansilbid Cristo Jesus. Sejay i solat mid si-kayon emiin cha Philippi a toon Afo Chiyos tep iyayka-chom kayod Cristo Jesus, pati sema iren naengibalnay cha si-kayo tan sema iren naenolong cha si-kayo.

² Sapay koma ta gwared si-kayoy kaasi tan talnen naedafod Afo Chiyos a Awa thayo tan si Jesu Criston Afo thayo.

Sema Kararag Paul Para Cha Gwara Ired Ma Philippi

³ No nemnemnemen tahejo, naiyansalamathak cha Afo Chiyos.

⁴ Tan no ikararagan tahejo, banay a pasiyay chaksak ko

⁵ tep natiyolongan joak a manpaamta na mapteng a chamag manipod nonta pilmiron akow a inpamati yo ingkathod niman.

⁶ Sigoradoak a si Afo Chiyos a engichogi na mapteng a pangkep tod biyag jo, itolo-toloy to ingkathod metongpal iwa pangkep to no akow na ikowan alin Jesu Cristo mowan.

⁷ Anam to wango no seman i kowan nemnema maypangkep cha si-kayon emiin tep banay a pasiyay kapategan kod si-kayo. Tep inpakida-kam jod si-kak i kaasin Afo Chiyos nonta iyaykalebosak tan tiyaktakchelan ko ngo tan piyanekneknekan koy podno na mapteng a chamag maypangkep Cristo.

⁸ Amten Afo Chiyos i banay i esaw kod si-kayon emiin tep ensemek tahejon inges toy penmek Cristo Jesus cha si-kayo.

⁹ Say kararag ko para cha si-kayo, onda-da-toy semek jod Afo Chiyos tan sema echom iy maramen ma-ma-choman i pengamta yo tan daing jon mengegwat na kosto

¹⁰ say mebedin a onoran jo ma kamaptengan. Tep no setan ma, say ogadi yo, sigoradon mapteng, tan nagwaren polos i kaybasolan jo no akow na ikowan mowan alin Cristo.

¹¹ Babaen na tolong Jesu Cristo, sema mapteng a ogadi yo, manpa-nod banay a mapteng et say mechejaw si Afo Chiyos.

Sema Mapteng A Iyanbanagan Na Ingkaykalebos Paul

¹² Aahi, piyan ko wen ipaamted si-kayo i sema epasamak cha si-kak, nat ngaaw i iyanbanagan, no diket i chima-chen engigwadsak na mapteng a chamag.

¹³ Tep emiin a solcharon naiyanbantay na palasiyo, tan sema iren echom chiyay, amta ra i sema kagol na ekalebosan ko, pansilbik cha Cristo.

¹⁴ Kagol na ekalebosan ko, sema piyal na karakelan a aahi tayod Afo, kimedsang say eg ira entahot, tan mas ontole-toled iren mengowan na esel Afo Chiyos.

¹⁵ Agpayson igwa iriy naiyankasaba maypangkep Cristo tep maapal ired si-kak tan piyan chen ipaamta i mas edaing ira iy say si-kak, nem igwa ngo iriy echom a naiyankasaben mapteng i pangkep cha.

¹⁶ Sejay ira, naiyankasaba tep ensemek chaak. Iyamtaan cha i say kagol na ekalebosan ko, chiyotohan toak Afo Chiyos a manpaneknek na mapteng a chamag.

¹⁷ Nem sema iren maapa-apal, sema pankasaba ra maypangkep Cristo, nat naedafod mapteng a pangkep tep piyan chen ikayang chiy angel cha. Say nemnem cha, no ikasabaan chiy maypangkep Cristo, a-choman chiy digat ko iy gwaraak cha kalebosan.

¹⁸ Nem kosto tep no mapteng i pangkep cha ono ngaaw, basta ikasabaan chiy maypangkep Cristo, kaimdengak. Et itoloy kon man-im-imdeng

¹⁹ tep amtak i babaen na kararag jo tan tolong na Ispiriton Jesu Cristo, sema panpa-noan na diga-digat a kowan da-kami niman, metongpal i kaysalakanan ko.

²⁰ Namnamaen ko ngo tan piyan kon pasiyen nagwara komen polos i mengibaingak cha Afo Chiyos, no diket on-anay i toled ko niman a inges to nontan da say no manbiyagak ono metiyak, chejawen ches Cristo kagol cha si-kak.

²¹ Tep no si-kak ngo, no manbiyagak, mapteng iwan tep si Cristoy pangkep na biyag ko, tan no metiyak, mapmapteng pay iwan tep gwaraak cha si-katho.

²² Nem no ebiyagak pay laeng, mebedin men mansilbiak cha Cristo. Isonga, ekak amta pay no nengoy pispisen ko--manbiyag ono metiy.

²³ Tep mandidigathak a chilin memispis na sa-ki. Piyan kon pasiyen bebtihan iya dobong say mekikadgwaak cha Cristo tep mas mapmapteng iwan.

²⁴ Nem para cha panmaptengan jo, mesepol pay a on-onongak chiya dobong.

²⁵ Menigoradoak niyay, isonga amtak i manbiyagak, et on-onongak cha si-kayon emiin say onkedkedsang i pamati yo, tan ma-ma-choman i chadsak jon naedafod pamati yo.

²⁶ Piyan ko ngon man-iyan chiyay say no on-oliak mowan alid si-kayo, banay a pasiyay chadsak jod Cristo Jesus kagol cha si-kak.

Sema Panbiyag A Onoran Koma Na Naemati

²⁷ Nem angken nengoy mepesamak, tanchaani yo say sema panbiyag jo, may-anam cha mapteng a chamag maypangkep Cristo say no onkowanak chithan a metaen tahejo ono enchi, iki-ngelan ko i mekisa-sa-kiy nemnem jon piyan ton a-seden, ekisa-sa-ki kayon mengitakchel na pamatin iyaybasar cha mapteng a chamag, tan

²⁸ nat tekothan jo ngo ira ma naengontred si-kayo. Tep sema toled jo, kasi-nengan cha si-kara i no sa-ki din akow maysi-jan ired Afo Chiyos na ingked ingka, nem maysalakan kayo. Tan naedafod Afo Chiyos iyay.

²⁹ Tep sema mapteng a in-i-kan Afo Chiyos cha si-kayo, nat pemati yod Cristo bengat, nem pandigat jo ngo kagol cha si-katho say mechejaw.

³⁰ Tan sema digat a jowan da-kami, inges to ngoy digat kon sini-si-neng jo nontan da tan sema inki-ngelan jo ngon emangkepasamak med si-kak.