Mateo 1 - Badon Tolagan Na Biblia

Sema Tonton Jesus

¹ Sejay i tonton Jesu Criston polin David tan si Abraham.

² Si Abraham, awen Isaac; si Isaac, awen Jacob; si Jacob, awen Judah tan sema iren ahi to.

³ Si Judah, awen Perez ni Zehar, tan si Tamar i inecha. Si Perez, awen Hezron, tan si Hezron, awen Ram.

⁴ Si Ram, awen Amminadab; si Amminadab, awen Nahshon; si Nahshon, awen Salmon;

⁵ si Salmon, awen Boaz, tan si Rahab i ineto. Si Boaz, awen Obed, tan si Ruth i inen Obed. Si Obed, awen Jesse,

⁶ tan si Jesse, awen Ari David. Si David, awen Solomon, tan sema imbaliy den Uriah i ineto.

⁷ Si Solomon, awen Rehoboam; si Rehoboam, awen Abijah; si Abijah, awen Asa.

⁸ Si Asa, awen Jehoshaphat; si Jehoshaphat, awen Joram; si Joram, awen Uzziah.

⁹ Si Uzziah, awen Jotham; si Jotham, awen Ahaz; si Ahaz, awen Hezekiah.

¹⁰ Si Hezekiah, awen Manasseh; si Manasseh, awen Amos; si Amos, awen Josiah.

¹¹ Si Josiah, awen Jechoniah tan ahi to nonta timpon epilit iriy Hodjos a imekal cha ili chen iyanbalin iren bagaen cha Babylonia.

¹² Nonta iyakcheng a epilit iriy Hodjos a imekal cha ili cha, in-anak Jechoniah si Shealtiel. Si Shealtiel, awen Zerubbabel.

¹³ Si Zerubbabel, awen Abiud; si Abiud, awen Eliakim; si Eliakim, awen Azor.

¹⁴ Si Azor, awen Zadok; si Zadok, awen Achim; si Achim, awen Eliud.

¹⁵ Si Eliud, awen Eleazer; si Eleazer, awen Matthan; si Matthan, awen Jacob.

¹⁶ Si Jacob, awen Joseph, tan si Joseph, imbaliy Maria a engianak Jesus a ngichanan cha na Cristo.

¹⁷ Isonga, sema emi-emiin, manipod nonta timpon Abraham ingkathod timpon David, sawal na epat i afo-afo tho. Manipod nonta timpon David ingkathod timpon epilit iriy Hodjos a imekal cha ili cha, sawal na epat ngoy afo-afo tho. Manipod nonta timpon gwara iriy Hodjos cha Babylonia ingkathod ingkay-anak na Cristo, sawal na epat ngoy afo-afo tho.

Sema Ingkay-anak Jesu Cristo

¹⁸ Sejay i istoriya na ingkay-anak Jesu Cristo. Si Maria a ineto, iyaykarin mekiimbaliy cha Joseph, nem idi eg ira nin iyantakchol, aamtaan i iyabchel si Maria babaen na panakabalin na Ispirito Santo.

¹⁹ Si Joseph a imbaliy to, napiyati tho na olay i dinteg Moses, nem eg to piyan a baingan si Maria, isonga niyemnem ton isi-jan a eg to ipaamted chakel a too.

²⁰ Idi niyemnemnem Joseph iwan, iyanparang i anghil Afo Chiyos a kiyokip ton kigwan to i “Joseph a polin David, enog i chanag a imbaliyen mos Maria tep sema inbechel to, epasamak na panakabalin na Ispirito Santo.

²¹ Mengi-nak na dahi, et panngaran mo na Jesus tep si-kathoy mengisalakan na tothoo thod basol cha.”

²² Epasamak a emiin ira jay say metongpal i inpangowan Afo Chiyos cha profita a:

²³ “Mebchel i biin eg enarog na dahi, et mengi-nak na dahin mengechanan na Emmanuel.” (Sema banag na Emmanuel, gwares Afo Chiyos cha si-kathayo.)

²⁴ Idi bimangon si Joseph, imag to ma kigwan niwa anghil Afo Chiyos, et inbetik tos Maria a imbaliy tod baliy to,

²⁵ nem eg to chichog ingkathod iyay-anak iwa nga-nga. Idi iyay-anak iwa nga-nga, ngichanan to na Jesus.