Mark 7 - Badon Tolagan Na Biblia

Sema Iyan-afilan Na Toro-toro Na Pharisees Tan Dinteg Afo Chiyos

¹ Sema iren Pharisees tan echom a mamaistoro na dinteg a edafod Jerusalem, esa-sa-nop ired kad-an Jesus.

² Mita ra i mankakakan iriy echom a disipolos to iy ma-non eg nin ira iyanbolo. Chiyan nemnema i ensekig ira ma disipolos Jesus cha nemnem Afo Chiyos tep eg ira iyanbolon inges toy nainpanbolo na Pharisees.

³ Tep sema iren Pharisees tan echom a Hodjos, naiyonoran chiy ogadin iyelbat ched afo-afo ra la, et naiyanbolo nin ira na kosto asan ira mengan.

⁴ No medepo di ired market, naiyandinis ira pay nin asan ira mengan. Gwara pay iriy ogadin naiyonoran chen iyelbat ched afo-afo ra la pati koston pengaskas na tasa, banga, tan kancharo.

⁵ Isonga, sema iren Pharisees tan mamaistoro na dinteg, inbagaan ches Jesus i “Niyana nat onoran iren ma disipolos moy ogadin iyelbat tayod afo-afo thayo la? Apay nga mankakakan ira iy eg ira nin iyanbolo na kosto?”

⁶ Insongbat Jesus i “Si-kayon naengibili-biling a naengamag na mapteng! Podnoy inpadton Isaiah maypangkep cha si-kayo nonta insolat toy kigwan Afo Chiyos a: ‘Sema iren too, nachijaw chaak na ese-esel cha, nem aragwiy nemnemnem ched si-kak.

⁷ Nagwariy silbi na panchejaw ched si-kak tep naintoro chiy bili-bilin na toon nakigwan cha i bili-bilin ko.’

⁸ “Agpayson jowan amagay insolat Isaiah tep nainbiyang joy bili-bilin Afo Chiyos iy naiyonoran joy ogadi na too.”

⁹ Et kigwan Jesus mowan i “Maliksi kayon naengibiyang na bili-bilin Afo Chiyos say onoran joy ogadi yo.

¹⁰ Tep inpaamten Moses ja bilin Afo Chiyos a ‘Chayaw mos awam ni inam,’ tan ‘No gwariy man-a-sel na ngaaw maypangkep aweto ni ineto, mesepol a metiy.’

¹¹ Nem nakigwan jo kitdi i no gwariy itolong na tood aweto ni ineto, angken eg to piyan a i-kan basta manpangbal cha si-karen konen to i ‘Seja komen itolong kod si-kayo, corban.’ (Sema banag na corban, iyaykarin may-i-kan cha Afo Chiyos.)

¹² Et eg jo wa itolok a tolongan toy aweto tan ineto.

¹³ Isonga, seta ogadin nain-elbat jod too, nachichal toy esel Afo Chiyos. Tan chakel pay i nainpasing jon inges nithan.”

Sema Naengipaskig Na Too

¹⁴ Et tiya-gway mowan Jesus i chakel a toon kigwan to i “Si-kayon emiin, iki-ngeli yo say egwathan jo.

¹⁵ Nat sema nasimekep cha tooy naengipaskig, no diket sema nabimo-day cha si-katho.”

¹⁶

¹⁷ Idi bintihan men Jesus ira ma too et simekep chiwa baliy, inbagaan iren ma disipolos to i iiksplikar toy in-arig to.

¹⁸ Kigwan Jesus i “Pati si-kayo, eg jo ngo egwathan? Eg jo amta i sema nasimekep cha temi na too, nat mebedin a peskig to.

¹⁹ Tep sema nakimowanan to, nat cha nemnem to, no diket chiwa ekes to, et nabimo-day.” Idi kigwan Jesus iwan, piyan ton a-seden i mapteng i pengan na kompormin mekan. Nagwariy iyayparit a mekan.

²⁰ Kigwan Jesus pay i “Sema nabimo-day cha nemnem na too, si-kathoy naengipaskig.

²¹ Tep sema nemnem to, si-kathoy naedafoan na emiin a ngaaw a pangkep a naiyanbalin na ngaaw a ogadin inges to ira jay: mekibii tan mekidahi, mengibot, memono, menechog na nat imbaliy to,

²² mengamkam na nat kegwen to, mengemag na ngaaw cha echom, menikap na echom, mengiskig a ogadi, mengepal, mengomang na echom, onpahi-tek, tan egwenggweng.

²³ Emiin men ngaaw, naedafod nemnem na too, et seman iriy naengipaskig cha si-katho.”

Sema Pamati Na Gentile A Bii

²⁴ Et iyamtik si Jesus chiwan a kimowan cha sahop a kad-an na siyodad na Tyre tan Sidon. Iyan-iyan chiwa baliy chiwan et eg to piyan i maamtaan i gwared man, nem echamag ngorechan.

²⁵ Gwariy biin iya-janan i anak ton bii na dimonyo. Idi inki-ngelan to i gwares Jesus chiwan, kimowan a chakos cha kad-an to et iyantalimohod cha sangoanan to.

²⁶ Gentile iwa biin iyay-anak cha sahop na Phoenicia cha Syria. Ekiadok cha Jesus a chagchagen toy dimonyod ma anak to.

²⁷ Nem kigwan Jesus a in-arig to i “Mesepol a pekanen cha nin iriy aanak tep nat mapteng no a-daen chiy kakanen na aanak et ita-boy ched aso.”

²⁸ Nem insongbat na bii i “Ahow mango, Afo, nem angken asod doongan niwa damisaan, nakiyakan cha ngoy dagdag a naiya-kas iy maramen mankakakan ngoy aanak.”

²⁹ Et kigwan Jesus i “Mapteng itha songbat mo. Angken onbetik ka wa. Bimo-day maliy dimonyod anak mo.”

³⁰ Et iyamtik ma iwa bii, et sibi thoy anak ton man-oolig cha katiri. Bintihan ma na dimonyo.

Ingkal Jesus I Toleng Tan Toti Na Dahi

³¹ Et bintihan men Jesus i sahop na Tyre a chidan toy Sidon tan sema sahop na Decapolis et imolid ma baybay na Galilee.

³² Gwariy dahid man a etoleng tan etotin intolod ched kad-an Jesus. Ekiadok ired Jesus i isagpat toy diwa thod ma dahi say ma-kal i toleng tan toti tho.

³³ Et indasin men Jesus iwa dahi, et idi si-kara bengat, indotdot Jesus i kalomot tod ma ngila na dahi, et inchena toy ilol tod ma taytay na dahi.

³⁴ Et tiyangkak men Jesus i dangit a ngima-jas, et kigwan tod ma dahi i “Ephphatha” a sema banag to, “Pandohat ka.”

³⁵ Et mahaki-ngel mowan a chakos iwa dahi. Iya-kal ngoy toti tho et inam-ay men ma-gwathan i esel to.

³⁶ Et kigwan men Jesus i eg cha igwanggwanggwang cha angken siyen too. Nem angken binidi-bidin to ira, ema-men inpasing cha ngorechan.

³⁷ Et sema iren iyanki-ngel na epasamak ma, iyasdaaw iren pasiyen kigwan cha i “Sema emiin a inpasi-pasing Jesus, mapteng. Angken iyangketoleng, naingkal toy toleng cha, tan angken iyangketoti, naingkal toy toti ra ngo.”