Mark 6 - Badon Tolagan Na Biblia

Eg Cha Igwat Si Jesus Cha Nazareth

¹ Et imekal si Jesus chiwan a kimowan chiwa sahop a bimadegan to, et ekiolop ira ma disipolos to.

² Nonta timpo na Sabbath, kimowan si Jesus et iyantorod ma synagog. Sema iren toon gwared ma synagog, idi inki-ngelan ches Jesus, chakel i iyasdaaw a kigwan cha i “Toy edafoan na nemnemnem to i? Toy edafoan na daing to i? Ngoy nainpasing ton naengamag na milagro?

³ Si-kathoy kalpintiron anak Mary, anya? Tan ahi iren James, Joses, Judas, tan si Simon, anya? Tan sema iren aahi ton bibii, naiyan-iyan ngo ired jay.” Et iyasnit ira et eg ira emati.

⁴ Et kigwan men Jesus cha si-kara i “Say profita, nachijaw ched emiin a dogad, malaksid cha dogad to, bonat to, tan pamilja tho ngo.”

⁵ Nat mebedin a engamag si Jesus na chakel a milagrod man. Say imag to bengat, insagpat toy diwa thod ma otik a toon mansekit et inpamapteng to ira.

⁶ Et iyasdaaw si Jesus tep eg ira ematid si-katho. Idi iyakcheng ma, iyangwasgwasgwas mes Jesus a iyantorod ma otik a siyo-siyodad.

Into-non Jesus I Sawal Na Chegwen Disipolos To

⁷ Et tiya-gway to ira ma sawal na chegwen disipolos to, et into-no tho iren sanpaparis, tan in-i-kan toy karebengan chen menagchag na dimonyos.

⁸ Et binidin to ira i “Enog i tahin na kompormid konan jo, malaksid bengat na kosnod. Enog i tahin na mekan, akbot, tan pilak.

⁹ Pansapathos kayo, nem enog i ala na baron pansa-dathan jo.”

¹⁰ Et kigwan to pay i “No gwariy sebien jon siyodad iy gwariy mena-gway kayod baliy to, pekiiyan kayod man ingkathod ibetik jo.

¹¹ Nem no onkowan kayod siyodad et nat sintilen cha kayo na too tan eg cha piyan a manki-ngel na konen jo, betihi yo. Tan no onbetik kayo, pokpohi yoy depok cha seki yo say si-kathoy bancha i si-kara ngoy menongbat Afo Chiyos kagol na imag cha.”

¹² Et kimowan ma iriy disipolos ton kiyaskasabaan chiy toon kigwan cha i mesepol a manbabawi ired basol cha.

¹³ Tan chiyagchag cha ngoy chakel a dimonyos tan iyapjosan cha na danay chakel a mansekit a too et mimapteng ira.

Sema Ingkathiy John A Naemonjag

¹⁴ Nontan ngon timpo, inki-ngelan Ari Herod i maypangkep na nainpasi-pasing Jesus tep echamag cha emiin a dogad. Gwariy echom a engowan i “Si-katho emos John a Naemonjag a iyanpawil. Isonga, gwariy panakabalin ton mengemag iren ma milagro.”

¹⁵ Kigwan ngo na echom i “Si-kathos Elijah a iyanpawil.” Kigwan pay na echom i “Profiten inges toy sa-kin profita nonta bayag da.”

¹⁶ Nem idi inki-ngelan Herod i nakigwan chiy maypangkep Jesus, kigwan to i “Si-kathos John a Naemonjag a inpadengsok i toktok to. Iyanpawil!”

¹⁷ Kigwan Herod iwan tep inpa-da thos John et inpakalebos to. Inpasing Herod iwan tep inimbaliy tos Herodias a sigod imbaliy na ahi thon si Philip.

¹⁸ Tep kigwan John cha Herod i “Iyayparit cha dinteg tayo i imbaliyen moy imbaliy na ahim.”

¹⁹ Isonga, iyowes Herodias si John et piyan ton pebono. Nem nagwariy kebedinan to

²⁰ tep entahot Herod si John tep amta tho i maronong a too tan esantoan, isonga natiyolo-tolongan to. Idi inki-ngelan Herod i nakigwan John, echanagan a pasiya, nem piyan to pay laeng a iki-ngelan.

²¹ Nonta timpo na birthday Herod, gwariy gwayen Herodias a mengipabonon John a Naemonjag. Nontan a akow, ininbitar Herod iriy iyangkekayang a afo na gobirno, sema iren afo na solcharo, tan sema iren ainportantin tood Galilee.

²² Gwariy marikit a anak Herodias a kimowan cha kad-an Herod tan sema iren bisita et iyansada. Kinas chiy sada tho, isonga kigwan men Herod i “Ngoy piyan mo? Kowan mo et say i-kan ko.”

²³ Inkari tho pay i “Angken nengoy ibagam, i-kan kod si-kam angken manbenol na kagachowa na pantorayan ko.”

²⁴ Kimowan iwa marikit cha ineton kigwan to i “Ngoy ibagak?” Insongbat ineto i “Sema toktok John a Naemonjag.”

²⁵ Et kinoan men ma marikit a imolid Ari Herod, et kigwan to i “Piyan kon i-kan mod si-kak a chakos i toktok John a Naemonjag a iyay-ejan cha pingkan.”

²⁶ Iya-ngos a pasiyes Herod nonta inki-ngelan to man, nem kebaing ngo pay a eg menongpal na inkari tho tep insafata thod sangoanan na bisita tho.

²⁷ Isonga, engito-no wa na solcharon kowadjen mengeda na toktok John. Et kimowan iwa solcharod kalebosan et diyengsoan toy toktok John.

²⁸ In-ejan to ma toktok chiwa pingkan a inkowan tod ma marikit et in-awat tod ineto.

²⁹ Idi inki-ngelan na disipolos John a Naemonjag i epasamak, kimowan ali chen ida riy angel John et in-ejan ched bekaan.

Pikan Jesus I Esolok A Dimen Dibon Too

³⁰ Sema iren apostolis a into-non Jesus, imoli di ira et ingwanggwang ched Jesus i emiin a ima-imag cha tan intoro cha.

³¹ Et kigwan men Jesus i “Emoy ired ma iyaydasin a dogad say si-kathayo bengat et say mahainana kayo.” Tep chakel i mansisina-dat a too et nagwariy pesing chen mengan.

³² Et imekal iren iyanbangka a kimowan iren iyaydasin a dogad say agos cha.

³³ Nem chakel i toon emeschi ired si-kara nonta bimetik ira. Isonga, manbebetik iren edafod emiin a siyo-siyodad et edagwas ired konan iren Jesus.

³⁴ Idi mimothok si Jesus et imepas chiwa bangka, mita thoy chakel a too et kiyaasian to ira tep inges toy kalniron nagwariy naiyanbantay cha si-kara. Et intoroan to wa ira na chakel a banag.

³⁵ Idi emangkesalingawngaw, kimowan iriy disipolos Jesus cha kad-an ton kigwan cha i “Ara-chem ma, et ija kiyed iyaydasin a dogad.

³⁶ Ito-nom ira ja tood iyay-esop a siyo-siyodad tan doga-dogad say menongkal ira na kakanen cha.”

³⁷ Nem kigwan Jesus i “I-kani yo ira na kakanen cha.” Et kigwan cha i “Ngoy piyan mon a-seden? Mesepol a mankastos kawi na chegwen dasos a denarii a itongkal mi na kakanen cha.”

³⁸ Et inbaga wen Jesus i “Piyay tinapay a gwared si-kayo? Jo matha.” Idi iyamta iren ma disipolos, kigwan cha i “Dimen tinapay tan chegwen paideng.”

³⁹ Et inbilin Jesus med disipolos to i petokkong cha ira ma too na sanmomokdod ma do-bet.

⁴⁰ Timokkong ma iren emokmokdo. Gwariy sandadasos tan gwara ngoy sandi-men polo.

⁴¹ Et ida wen Jesus iwa dimen tinapay tan chegwen paideng et tiyangkak toy dangit a iyansalamat cha Afo Chiyos. Et piyetpet-ing to iwa tinapay, et in-i-kan to ired ma disipolos to say iap-ap ched too. Inpaiap-ap to pay iwa chegwen paideng.

⁴² Engan iren emiin et iyapsel ira.

⁴³ Et kiyoskos iren ma disipolos iriy ebay-anan a tinapay tan paideng, et pino thoy sawal na chegwen basket.

⁴⁴ Say kabibidang na engan, chanchanin dimen dibon daleki.

Iyan-ahad Si Jesus Cha Tapow Na Chanom

⁴⁵ Et inpankeb-ong men Jesus a chakos iriy disipolos tod bangka say medebas iren onkowan cha Bethsaida a gwared piig niwa baybay iy maramen inpabtik to ngo ira ma chakel a too.

⁴⁶ Idi inpabtik to wa ira, eniyed chiwa chontog a mankararag.

⁴⁷ Nonta edagwi, gwara pay laeng si Jesus chiwa chontog a sa-sa-ki tho iy say sema bangken iyandoganan iren ma disipolos to, gwara ngod kawa na baybay.

⁴⁸ Idi iyoschongan iren Jesus, mita tho iren mandigat a mengipa-kad niwa bangka tep iyaykontray chahem cha si-kara. Idi chanchanin kagwis, man-aahad si Jesus cha tapow na chanom a sibi tho ira ma disipolos to. Istay da-basan to ira,

⁴⁹ nem idi mita ren man-aahad cha tapow na chanom, kin cha i aninit et kimeljaw ira.

⁵⁰ Tep sini-neng chen emiin et timahot iren pasiya. Nem kigwan Jesus a chakos i “Pekedsang joy nemnem jo! Si-kak iyay. Enog i tahot.”

⁵¹ Et iyankeb-ong mes Jesus chiwa bangken ekidogan cha si-kara, et simalcheng i chahem. Iyasdaaw a pasiya ira ma disipolos to

⁵² tep angken mita ra wen inpachakel Jesus iwa tinapay, eg cha pay laeng igwathan i maypangkep na panakabalin to tep singen esa-dinan i nemnem cha.

Inpamapteng Jesus Iriy Mansekit Cha Gennesaret

⁵³ Idi bima-sil ma ires Jesus a sibi riy sahop na Gennesaret, in-iket chiy bangked ma kilig niwa baybay.

⁵⁴ Idi imepas ired ma bangka, piyeschian na toon chakos si Jesus.

⁵⁵ Et imaga-agag ira ma tood ma iyay-esop a otik a siyo-siyodad say a-daen chiy mansekit. Et angken ton dogad a chimag chen kad-an Jesus, chiwan i iyanbangkilan cha na mansekit.

⁵⁶ Et emiin a dogad a kimowa-kowanan Jesus, angken cha babenay a siyodad, oti-otik a siyodad, tan cha payo-payow, nainkowan chiy mansekit cha plasen naengioligan cha, et naekiadok ired Jesus i itolok to ira ma mansekit a mengapkap na angken kilig na baro tho. Et emiin a engapkap niwa baron Jesus, mimapteng ma ira.