Mark 3 - Badon Tolagan Na Biblia

Sema Dahin Otik I Diwa Tho

¹ Idi sa-kin akow, kimowan mowan si Jesus chiwa synagog et simekep chiwan.

² Gwariy dahid man a otik i diwa tho. Gwara ngo pay iriy toon chiyan bantayes Jesus say amtaen cha no pemapteng to ma too no timpo na Sabbath. Tep man-aanap ira na kagol a pengicharoman ched si-katho.

³ Kigwan Jesus chiwa dahin otik i diwa tho i “Gomalid ja sangoanan mi.”

⁴ Et kigwan tod ma echom i “Nengoy iyaypalobos chiwa dinteg tayon pesing tayo no timpo na Sabbath? Mengemag na mapteng ono ngaaw? Mena-cha na too ono memono na too?” Nem imeke-eket ira.

⁵ Kebonget si Jesus iy towan si-nenga ira, nem kaengos ngo tep aingel ira. Et kigwan tod ma dahi i “Iokjad moy diwam.” In-okjad toy diwa tho et mimapteng men kosto.

⁶ Idi iyakcheng ma iwan, iyamtik ira ma Pharisees et engaspol iren chakos na olop Herod say tabtabalen cha no nengo emoy pesing chen memonon Jesus.

Iyonod Na Chakel A Toos Jesus

⁷ Et kimowan si Jesus tan disipolos tod ma kilig na baybay na Galilee, et iyonod na chakel a toon edafo di ired Galilee, Judea,

⁸ Jerusalem, sahop na Idumea, piig na kolos a Jordan, tan cha Tyre tan Sidon tan doga-dogad a sahop cha. Kimowan ira ma tood kad-an Jesus tep chimag chiy emiin a inpasi-pasing to.

⁹ Kagol a chakel a pasiyay too, kigwan Jesus cha disipolos to i mengeda ira na bangka say ontokkong chiwan, et say nat setseten na too.

¹⁰ Tep chakel i inpamapteng to, isonga sema iren mansekit, ebo-bo-ngol ired si-katho say kapkafen cha.

¹¹ Sema ngo iren toon iyangka-janan na dimonyos, idi mita res Jesus, naiyantalimohod ired sangoanan to, et sema iren dimonyos, nainpakeljaw cha iren nakigwan cha i “Si-kam i Anak Afo Chiyos!”

¹² Nem tiyengteng iren Jesus i eg cha ipaamta no siyes si-katho.

Emispis Si Jesus Na Sawal Na Chegwen Apostolis

¹³ Et timiyed si Jesus cha chontog a tiya-gway toy toon piyan to et ekiolop ira.

¹⁴ Et emispis si Jesus na sawal na chegwed si-karen ngiyaranan to na apostolis. Kigwan to i “Pinispis tahejo tep say mekiolo-olop kayod si-kak. Ito-no tahejo pay a mankasaba

¹⁵ tan i-kan koy karebengan jon menagchag na dimonyos.”

¹⁶ Sema iren pinispis Jesus, si Simon a ngiyaranan to pay na Peter,

¹⁷ si James ni John a san-ahin anak iren Zebedee a ngiyaranan Jesus na Boanerges a sema banag to, anak ira na kirol,

¹⁸ si Andrew, si Philip, si Bartholomew, si Matthew, si Thomas, si James a anak Alphaeus, si Thaddaeus, si Simon a iyanngaran na Zealot tep intakchel toy ili tho,

¹⁹ tan si Judas Iscariot a enraidor Jesus.

Si Jesus Tan Si Beelzebul

²⁰ Et bimetik ires Jesus. Gwara mowan iriy chakel a tothoon esa-sa-nop alid kad-an to, isonga nagwariy pesing iren Jesus a mengan.

²¹ Idi inki-ngelan ira na bonat Jesus i ima-imag to, kimowan ired kad-an to say odofen cha tep gwariy echom a naengowan i etoneng.

²² Gwara ngo iriy mamaistoro na dinteg a edafod Jerusalem a naengowan i “Si Beelzebul a afo na dimonyos, iyay-ejan cha Jesus. Si-kathoy naengi-kan na panakabalin Jesus a menagchag na dimonyos.”

²³ Isonga, tiya-gway iren Jesus, et engiarig a kigwan to i “Ngoy pesing Satanas a menagchag na angel to?

²⁴ No manbabakal i tood ili, mechechal iwa ili.

²⁵ Inges to ngod pamilja. No manbabakal ira, mechechal ira.

²⁶ Inges to ngod Satanas. No towan chagchaga iriy echom ton dimonyos, say piyan ton a-seden, towan bakala ira, et sema pantorayan to, nat onbayag, no diket mepokaw.

²⁷ “Si Satanas, inges toy mahedsang a toon naiyanbantay na baliy to. Nagwariy mahaskep cha baliy ton mengibot na kameng to, kampet bedoren cha nin. Et mebedin men ibetik chiy kameng to.

²⁸ “Sejay a konen kod si-kayo, podnon emiin a basol na too tan ngaaw a ese-esel cha maypangkep na echom cha, mebedin a mepekawanan.

²⁹ Nem sema ngon toon mengowan na ngaaw maypangkep na Ispirito Santo, eg mepeka-pekawanan tep basol to man na ingked ingka.”

³⁰ Kigwan Jesus iwan tep nadiyamsis iren ma mamaistoro na dinteg i Ispirito Santo nonta kigwan cha i “Si Jesus, iya-janan na dimonyo.”

Si Inen Jesus Tan Sema Iren Aahi Thon Daleki

³¹ Et si inen Jesus tan sema iren aahi thon daleki, mimothok ired ma kad-an to. Imakgwat ired awas et inpata-gway cha.

³² Sema iren toon ketinokkong cha dikmot Jesus, kigwan cha i “Igwa ires inam tan aahim cha awas a chiyan ipata-gway ka kono.”

³³ Et kigwan Jesus i “Ahow, nem igwa ngo iriy echom a kowan ibilang a inak tan aahik.”

³⁴ Idi towan si-nenga ira ma ketinokkong cha dikmot to, kigwan to i “Sejay iriy inak tan aahik

³⁵ tep sema iren naengamag na piyan Afo Chiyos, si-kariy naiyaybilang a inak tan aahik.”